ထိုင်းအလုပ်သမားဝန်ကြီးဌာနက ထိုင်း-ကမ္ဘောဒီးယားနယ်စပ် တင်းမာမှုအခြေအနေကြောင့် ကမ္ဘောဒီးယားအလုပ်သမားတွေအတွက် မှတ်ပုံတင်ခြင်းနှင့် အလုပ်လုပ်ခွင့်ပါမစ်များ သက်တမ်းတိုးခြင်းကို အကန့်အသတ်မရှိ ရပ်ဆိုင်းထားလိုက်ပြီး ၎င်းတို့နေရာတွင် မြန်မာ၊ဗီယက်နမ်၊ လာအိုလုပ်သားများ အမြန်အစားထိုးနိုင်ရန်စီစဥ်နေကြောင်းထိုင်းအစိုးရအလုပ်သမားဝန်ကြီး မစ္စစ် ထရီနွတ်ချ် ထီယန်ထောင်းက နိုဝင်ဘာ ၁၁ ရက်မှာပြောကြားခဲ့ပါတယ်။
အလုပ်သမားရှားပါးမှုကိုကာကွယ်ရန်အတွက် မြန်မာ၊ ဗီယက်နမ်၊ လာအို အစရှိသည့်သုံးနိုင်ငံမှ အလုပ်သမားများအတွက် မှတ်ပုံတင်ခြင်းကို အရှိန်မြှင့်တင်သွားမည်ဖြစ်ပြီး နိုင်ငံတွင်း ခိုလှုံနေသော မြန်မာအလုပ်သမား ၄၀,၀၀၀ ခန့်ကိုလည်း ထိုင်းအလုပ်သမားစနစ်အတွင်းသို့ဝင်ရောက်နိုင်ရန်အရှိန်မြှင့်တင်သွားမည်ဖြစ်ကြောင်းဝန်ကြီးကပြောကြားခဲ့ပါတယ်။
ထိုင်း-ကမ္ဘောဒီးယားနယ်စပ်တွင် မငြိမ်မသက်မှုများအတွင်း ကမ္ဘောဒီးယားလုပ်သားများကို အဓိကထား အလုပ်ခန့်ထားသော စိုက်ပျိုးရေးကဏ္ဍတွင် အလုပ်သမားရှားပါးမှုသက်ရောက်မှုရှိလာနိုင်သည့်အပေါ် လက်ရှိတွင် အခြားရွေးချယ်စရာလုပ်သားများကို အစားထိုးခန့်အပ်နိုင်ရန်ပြင်ဆင်နေကြောင်းဝန်ကြီးကပြောပါတယ်။
ထိုင်းနိုင်ငံတွင် ကမ္ဘောဒီးယားအလုပ်သမား ၄၅၀,၀၀၀ ခန့်ရှိပြီး တရားမဝင် ရွှေ့ပြောင်းနေထိုင်သူများနှင့် သက်တမ်းကုန်ဆုံးသွားသော အလုပ်လုပ်ခွင့်ပါမစ်ရှိသော အလုပ်သမားများ အပါအဝင် တရားမဝင် ကမ္ဘောဒီးယား အလုပ်သမား ၁၀၀,၀၀၀ ခန့် ရှိကြောင်းထိုင်းအလုပ်သမားဝန်ကြီးဌာနရဲ့စစ်တမ်းများအရသိရပါတယ်။
