ကမ္ဘေားဒီးယား နိုင်ငံ ဆွိုင်းရီယမ်ပြည်နယ် ဗီယက်နမ်နယ်စပ်အနီးက ဘာဗက်မြို့ မှာ ဖွင့်လှစ်ထားတဲ့ အွန်လိုင်း ငွေလိမ်ဂိုဏ်း(ကျားဖြန့်)စခန်းကို ကမ္ဘောဒီးယား အာဏာပိုင်တွေက ဝင်ရောက်စီးနင်း ဖမ်းဆီးတာမှာ မြန်မာ၁၇၉ဦးအပါအဝင် နိုင်ငံခြားသား ၂၀၀၀ကျော် ဖမ်းခံရတယ်လို့ ကမ္ဘောဒီးယား ပြည်ထဲရေးဝန်ကြီးဌာနရဲ့ ထုတ်ပြန်ထားချက်အရသိရပါတယ်။

 

ဇန်နဝါရီ ၃၁ရက်မနက်ပိုင်းမှာ ရဲတပ်ဖွဲ့ဝင် အင်အား ၇၀၀ကျော်နဲ့ ဝင်ရောက်စီးနင်းတာ ဖြစ်ပြီး အဖမ်းခံရတဲ့ နိုင်ငံခြားသား ၂,၀၀၀ ကျော်အထဲမှာ တရုတ်နိုင်ငံသား ၁,၇၉၂ ဦး၊ မြန်မာနိုင်ငံသား၁၇၉ဦး၊ဗီယမ်နမ်နိုင်ငံသား ၁၇၇ဦး၊အိန္ဒိယနိုင်ငံသား၃၆ဦး၊နီပေါနိုင်ငံသား၃၀ဦး၊ထိုင်ဝမ်နိုင်ငံသား၅ဦး၊လာအို နိုင်ငံသား၂ဦး၊မလေးရှားနိုင်ငံသား၁ဦးနဲ့ မက္ကဆီကိုနိုင်ငံသား ၁ဦးတို့ ပါဝင်တယ်လို့ သိရပါတယ်။

 

အဆောက်အအုံ ၂၂ လုံးပါဝင်တဲ့ ၄င်းနေရာဟာ ကာစီနိုရုံအသွင် ဟန်ဆောင်ထားပေမယ့် တကယ်တမ်းမှာတော့ ဆက်သွယ်ရေးနဲ့ အွန်လိုင်းလိမ်လည်မှုလို တရားမဝင်လုပ်ငန်းတွေ လုပ်ကိုင်နေတာ ကြာမြင့်နေပြီဖြစ်တယ်လို့ သိရပါတယ်။

အဖမ်းခံရတဲ့ တရုတ်နိုင်ငံသားတွေကို ပေကျင်းအစိုးရ လက်သို့ လွှဲပြောင်းပေးမှာ ဖြစ်ပေမယ်​့ မြန်မာနိုင်ငံသား ၁၇၉ဦးကို မည်သို့ လုပ်ဆောင်မယ်ကိုတော့ ထုတ်ပြန်ထားတာမရှိပါဘူး။

 

ကမ္ဘောဒီးယားနိုင်ငံမှာ ပြီးခဲ့တဲ့ ၇ လအတွင်း နိုင်ငံပေါင်း ၂၃ နိုင်ငံက အွန်လိုင်းငွေလိမ်ဂိုဏ်း သံသယရှိသူ ၅၁၀၆ ဦးကို ဖမ်းဆီးခဲ့ပြီး အဲဒီအထဲက ၄၅၃၄ ဦးကို နေရပ်ပြန်ပို့ခဲ့ပြီး ဖြစ်တယ်လို့ သိရပါတယ်။

 

လက်တလောမှာလည်း စစ်ကော်မရှင်က ကမ္ဘောဒီးယားနိုင်ငံအတွင်း ကအွန်လိုင်းလိမ်လည်လောင်းကစားမှုတွေမှာ အကြောင်းအမျိုးမျိုး ကြောင့် ပါဝင်ပတ်သက်ခဲ့ပြီး ၎င်းတို့အစီအစဉ်ဖြင့် ကမ္ဘောဒီးယားနိုင်ငံရှိ မြန်မာနိုင်ငံသံရုံးသို့ သတင်းပေးပို့မှု အရ လည်းကောင်းကမ္ဘောဒီးယားရဲတပ်ဖွဲ့နဲ့ ဌာနဆိုင်ရာတွေ က လွှဲပြောင်းပေးတဲ့ မြန်မာနိုင်ငံသားတွေကို မြန်မာနိုင်ငံသို့ ပြန်လည်ခေါ်ယူပေးလျက်ရှိကြောင်း သိရပါတယ်။