ထိုင်းနိုင်ငံ ၊ ကန်ချနပူရီပြည်နယ် ၊ ကန်ချနပူရီ-ဘော့ဖလွိုင်းလမ်းတနေရာရှိ တောအုပ်အတွင်း ယာဉ်မောင်းသူတွေ ပစ်ထားခဲ့တဲ့ မြန်မာရွှေ့ပြောင်းလုပ်သား ၇၅ ဦး ကို ထိုင်းရဲတပ်ဖွဲ့ကဖမ်းဆီးခဲ့တယ်လို့ ထိုင်းသတင်းတွေမှာဖေါ်ပြထားပါတယ်။

 

စက်တင်ဘာ ၈ ရက် နေ့လည်ပိုင်းမှာ လူအုပ်စုကြီးတစ်စု တောထဲ မှာ ပုန်းအောင်းနေကြောင်း ဒေသခံ ရွာသားတွေ က တွေ့ရှိတဲ့ အတွက် အာဏာပိုင်တွေထံသတင်းပေးတိုင်ကြားတာကြောင့် သွားရောက်စစ်ဆေးရာ မှ ဖမ်းမိခဲ့ တာလို့ ရဲတပ်ဖွဲ့ကပြောပါတယ်။

 

တိုင်ကြားတဲ့နေရာကို သွားရောက်စစ်ဆေးချိန်မှာ လည်း မိုးရွာသွန်းနေတဲ့အတွက် မြန်မာလုပ်သားတွေ ကို လာရောက်ခေါ်ဆောင်တယ်လို့ ယူဆရတဲ့ ပစ်ကပ်ကား ၃စီးဟာ မောင်းနှင်ထွက်ပြေး လွတ်မြောက်သွားတယ်လို့ သတင်းမှာဖေါ်ပြထားပါတယ်။

 

အဖမ်းခံရတဲ့ မြန်မာလုပ်သား ၇၅ ဦး တွင် အမျိုးသား ၅၂ ဦးနဲ့ အမျိုးသမီး ၂၃ ဦး တို့ ပါဝင်ကာ ဘုရားသုံးဆူဘက်မှလာရောက်ခဲ့ ပြီး ဆန်ခလာပူရီရှိ နယ်စပ်လမ်းကြောင်းက တစ်ဆင့် ထိုင်းနိုင်ငံသို့ တရားမဝင် ဝင်ရောက်လာတာလို့ ဆိုပါတယ်။

 

၎င်းတို့ဟာ ထိုင်းနိုင်ငံတွင်း အလုပ်လုပ် ဖို့ အတွက် ခရီးအကွာအဝေးပေါ် မူတည်ပြီး ပွဲစားခ ဘတ် ၂၀,၀၀၀ မှ ၃၀,၀၀၀ ကြား ပေးချေခဲ့ရတယ်လို့ ရဲတပ်ဖွဲ့ရဲ့စစ်ဆေးချက်အပေါ် မြန်မာလုပ်သားတွေက ထွက်ဆိုထားပါတယ်။

 

မြန်မာနိုင်ငံသား ၇၅ ဦး ကို တရားမဝင် ဝင်ရောက်နေထိုင်မှု နဲ့ အရေးယူနိုင် ဖို့ ကန်ချနပူရီ ရဲစခန်းသို့ လွှဲပြောင်းပေးခဲ့ကြောင်း ထိုင်းသတင်းကဖော်ပြထားပါတယ်။

 

ထိုင်းနိုင်ငံ အတွင်း အထောက်အထားမပါဘဲ နယ်စပ်ဖြတ်ကျော် ဝင်ရောက်တဲ့ အတွက် အဖမ်းခံရတဲ့ မြန်မာလုပ်သား မှာ ဩဂုတ်လ ၁ ရက်မှ စက်တင်ဘာ ၈ ရက်အထိ လူဦးရေ ၁၀၀၀ ကျော် ရှိပြီ ဖြစ်တယ်လို့ အဖမ်းခံရတဲ့သတင်းထုတ်ပြန်ချက် စာရင်းတွေအရသိရပါတယ်။

Ref-โจโฉ