NEWS

ရေဘေးသင့်ပြည်သူ တွေအတွက် မြန်မာသံရုံးက ထိုင်းရောက်မြန်မာ အလုပ်သမားတွေဆီ အလှူခံနေ

CoverLogo
407 Views

မြန်မာနိုင်ငံ မှာ ဖြစ်ပေါ်နေတဲ့  ယာဂီမုန်တိုင်းနှင့် ဆက်စပ်ပြီး ဖြစ်ပွားနေတဲ့ ရေကြီး နစ်မြုပ် တာတွေ ကြောင့် ရေဘေးသင့်နေတဲ့ ပြည်သူတွေ ကို လှူဒါန်းလိုပါကမြန်မာသံရုံးကို လှူဒါန်းနိုင်တယ်လို့ ထိုင်းရောက်မြန်မာအလုပ်သမားတွေ ကို မြန်မာသံရုံးဗန်ကောက်က  စက်တင်ဘာ၁၅ရက်မှာ အသိပေးကြေညာထားပါတယ်။

ရေဘေးသင့်ပြည်သူများအတွက် ထိုင်းနိုင်ငံ မှာ ရောက်ရှိနေတဲ့  မြန်မာနိုင်ငံသားများ အနေဖြင့် မြန်မာသံရုံး (ဗန်ကောက်)၊ ကောင်စစ်ဝန်ချုပ်ရုံး (ချင်းမိုင်) တို့ဖြင့် ဆက်သွယ်၍ လှူဒါန်းလျက်ရှိတာမှာစက်တင်ဘာ ၁၄ရက်အထိ   ဆန် ၄၀၃ အိတ်နှင့် ငွေသား ၁၁၉၁၁၁ ဘတ် လက်ခံရရှိတယ်လို့ ကြေညာချက်မှာဖေါ်ပြထားပါတယ်။

ဒါ့အပြင် ဆန်အိတ်လှူဒါန်းလိုသူတွေ အနေနဲ့  ဆန်တစ်အိတ် (၂၄ ပြည်)ကို  ၆၅၀ ဘတ် နဲ့ သတ်မှတ်လှူဒါန်းနိုင်တယ်လို့ ဆိုပါတယ်။

ရေကြီးမှုမတိုင်ခင်က ပြည်ပရောက်မြန်မာလုပ်သားတွေ ထံက အခွန် ၂ ရာခိုင်နှုန်းကောက်ခံဖို့နဲ့ အလုပ်သမားတွေရဲ့အခြေခံလစာရဲ့ ၂၅ ရာခိုင်နှုန်းကို ပြည်တွင်းက မိသားစုထံမဖြစ်မနေလွှဲပြောင်းဖို့ ဖိအားပေးကာ မလိုက်နာပါက ပြည်ပထွက် အလုပ်လုပ်ခွင့်မပေးတော့ဘူးလို့  ခြိမ်းခြောက်မှုတွေ ပြုလုပ်ထားတဲ့နောက် အခုလို ရေဘေးအလှူခံတဲ့အပေါ် ရွှေ့ပြောင်းလုပ်သားတစ်ဦးက သူ့အမြင်ကိုမှတ်ချက်ပြုပါတယ်။ 

" အရင်က ဥပဒေအရအုပ်ချုပ်ခဲ့တဲ့ အစိုးရတွေလက်ထက်တုန်းကဆိုရင် ပြည်သူတွေကလှူကြမှာ အမှန်ဘဲ။ အမှန်တကယ်ဒုက္ခသည်တွေဆီရောက်မှာကိုယုံကြည်ဖွယ်ရှိလို့လေ။ အခုဟာကရေခြားမြေခြားမှာကို နိုင်ငံသားတွေ ဒုက္ခမရောက်ရောက်အောင်လုပ်နေတဲ့ မြန်မာသံရုံးရဲ့ကြေညာချက်ကိုတော့ ဘယ်သူမှ တကူးတကလှူမယ်မထင်ဘူး။ သံရုံးမှာဗီဇာကိစ္စ၊ ပတ်စပို့ကိစ္စ၊ ထောက်ခံစာလုပ်သူတွေလောက်ပဲ မဖြစ်မနေမို့ထည့်ဖြစ်မယ်ထင်တယ်။ တကယ်မြေပြင်မှာ ဘာဖြစ်သွားသလဲဆိုတာ ပြည်သူတွေမျက်ဝါးထင်ထင်မြင်ခဲ့ပြီလေ။ ဘယ်သူတွေက တကယ်လှူဒါန်းတာတွေ၊ ကယ်ဆယ်ရေးလုပ်သူတွေကို ဘယ်သူတွေက ဟန့်တားတွေကို ပြည်သူတွေမြင်နေရတယ်လေ။ ပြည်သူအပေါ်ဒုက္ခရောက်သထက်ရောက်အောင်လုပ်နေတဲ့ သံရုံးနဲ့တော့ ဘယ်မြန်မာနိုင်ငံသားမှအလှူရေစက်မဆုံချင်တာတော့ အမှန်ဘဲ""လို့ ထိုင်းရောက်မြန်မာအလုပ်သမားတစ်ဦးကပြောပါတယ်။

သံရုံးကြေညာချက်မှာတော့ လှူဒါန်းလိုသူတွေ အနေနဲ့ ဆန်အိတ် သို့မဟုတ် ငွေသား (မိမိလှူဒါန်းလိုသ၍) ကို မြန်မာ သံရုံး (ဗန်ကောက်) တွင် သံမှူး ဒေါ်ဆန်းသစ်ရည် (06-2731-3515) သို့လည်းကောင်း၊ ကောင်စစ်ဝန်ချုပ်ရုံး (ချင်းမိုင်) တွင် ပထမအတွင်းဝန် ဒေါ်နေခြည်ဝင်းဆွေ (094-945-0362) သို့လည်းကောင်း ဆက်သွယ်လှူဒါန်းနိုင်တယ်လို့ အသိပေးထားပါတယ်။

ဓါတ်ပုံ- မြန်မာသံရုံး


Related posts

Cover
စစ်ကောင်စီရဲ့ညမထွက်ရအမိန့် တညတာ ပယ်ဖျက်မှုအပေါ် လူငယ်တွေယုံကြည်မှုမရှိဟုဆို
Dec 31, 2024
Cover
အဖမ်းအဆီးတွေကြောင့် အလုပ်သွားလာရေးအတွက် စိုးရိမ်သောကများနေရ
Dec 30, 2024
Cover
sinsay အမှတ်တံဆိပ်ချုပ် စက်ရုံလုပ်ငန်းခွင်အတွင်း အလုပ်သမားကို ကိုယ်ထိလက်ရောက် ကျူးလွန်ပြီး ခံစားခွင့်တစ်စုံတစ်ရာမရှိဘဲ  အလုပ်မှထုတ်ပယ်
Dec 28, 2024
Cover
နှစ်သစ်ကူး ရုံးပိတ်ရက်ကြေညာမှု စက်ရုံ အလုပ်ရုံ လုပ်ငန်းရှင်နဲ့ အလုပ်သမားတွေကြား ရှုပ်ထွေးမှုတွေဖြစ်နေ
Dec 28, 2024
Cover
ပြည်ပလုပ်သားစေလွှတ်ခွင့်လိုင်စင်ရယူထားသူ ၆၀၀ ကျော်ရှိလာ
Dec 27, 2024
Cover
တရားဝင် အလုပ်လုပ်ခွင့် သက်တမ်းတိုးကြေး သုံးဆ အထိတိုးမြှင့်ဖြတ်တောက်ခံနေရလို့ တောင်းဆိုရာ စက်ရုံ ၁၀၀ ကျော်အောင်မြင်မှုရ
Dec 26, 2024
Cover
ကိုရီးယားနိုင်ငံက ဝန်ဆောင်မှုလုပ်ငန်း အမျိုးအစားများအတွက် အမျိုးသမီးအလုပ်သမား လျှောက်လွှာများ လက်ခံတော့မည်
Dec 25, 2024
Cover
ဇန်နဝါရီ ၁ ရက်ကစပြီး အခြေခံလုပ်အားခ တိုးမြင့်မည်
Dec 25, 2024