စစ်ရှောင်အများအပြားရွှေ့ပြောင်းရောက်ရှိလာတဲ့ရန်ကုန်မြို့မှာအိမ်ငှား ရမ်းခတွေမြင့်တက်လာသလိုအိမ်ရှင်တွေရဲ့သတ်မှတ်ချက်နှုန်းထားတွေဟာလည်းအရင်ကထက်များလာတယ်လို့ငှားရမ်းနေထိုင်သူတွေဆီကသိရပါတယ်။
လက်ရှိမှာအိမ်ငှားရမ်းခတွေဟာအရင်ကထက်နှစ်ဆနီးပါးဖြစ်လာပြီးမြို့ထဲပိုင်းမှာတင်မကဘဲမြို့ပြင်ဘက်တွေမှာပါမြင့်တက်လာတာဖြစ်ပါတယ်။လက်ရှိမှာ သာမန်မိသားစုတစ်စု နေထိုင်ရုံ တိုက်ခန်းအငှား ဈေးနှုန်းတွေအနေနဲ့ တလလျှင် ၄ သိန်းကနေ ၇ သိန်း၀န်းကျင်အထိ ဈေးပေါက်နေပါတယ်။
လက်ရှိမှာအိမ်ရှင်တွေကငှားရမ်းခကိုအနည်းဆုံးခြောက်လ ထိတောင်းခံပြီးတစ်လချင်း ပေးလိုသူတွေ ၊ ငှားရမ်းခ လျှော့ပေးစေလိုသူ တွေကိုစပေါ်သိန်းရာချီတောင်းယူတာတွေလည်းရှိနေပါတယ်။ "တစ်လ ၃ သိန်း ခွဲ၊ ၄ သိန်း တန်လောက်ဆို ခပ်ကျဥ်းကျဥ်းရမယ် တော်တော်တော့ရှာရခက်မယ် မြို့ထဲ မှာ ရှားသွားပြီ"လို့ အိမ်ငှားနေသူတစ်ဦးကပြောပါတယ်။
ရန်ကုန်က မြို့နယ်အချို့မှာ အိုးအိမ်က တည်ဆောက်ပေးထားတဲ့ အငှားအိမ်ရာတွေမှာလည်း အခန်းလွတ်မရှိသလောက်ဖြစ်တာကြောင့် အိမ်ငှားနေသူဦးရေရဲ့ ရာခိုင်နှုန်း အနည်းငယ်သာ ငှားရမ်း နေထိုင်ခွင့်ရနေတာပါ။ဒါ့အပြင်အိမ်ခြံမြေအကျိုးဆောင်တွေကလည်းဝန်ဆောင်ခကို ငှားရမ်းခ တစ်လစာထိတောင်းခံနေတာကြောင့်အိမ်ငှားရမ်းနေထိုင်သူတွေဟာအခက်အခဲတွေဖြစ်နေပါတယ်။
"အရင်ကလှည်းတန်းစင်တာဘေးမှာနေတာတစ်လနှစ်သိန်းပဲ။နောက်တော့ဗဟိုလမ်းခိုင်ရွှေဝါဘက်ပြောင်းတော့အစကနှစ်သိန်းခွဲကနေ လေးသိန်းထိတောင်းတယ်။သုံးသိန်းရှစ်သောင်းနဲ့သားအမိနှစ်ယောက်တည်းနေတာပါ။
လူပိုမရှိပါဘူးဆိုပြီးပြောနေတယ်။ပွဲစားခတစ်လစာပေးရတယ်။ရေဖိုးတစ်လကိုးထောင်ပေးရတယ်။မီတာခကတော့သုံးသလောက်ပေးပါပဲ။ဒီနေရာကဈေးကြီးလို့တခြားနေရာရှာလည်းမတိမ်းမယိမ်းပဲ"လို့ဗဟိုလမ်းခိုင်ရွှေဝါမှတ်တိုင်အနီးမှာနေထိုင်သူတစ်ဦးကပြောပါတယ်။
ဒါ့အပြင် အိမ်ငှားရမ်းမည်ဆိုပါက ယခင်နေထိုင်ခဲ့တဲ့ မြို့နယ်က ထောက်ခံစာတွေ ရှိမှ အိမ်ငှားနိုင်မယ်ဆိုတဲ့အချက်တွေလည်း အိမ်ရှင်တွေဘက်က ထပ်တိုးတောင်းဆိုလာကြပါတယ်။
"မြို့ထဲမှာမကပ်နိုင်လို့။မြို့ပြင်ခေါ်မလား ရွှေပြည်သာဘက်မှာနေဖြစ်တယ်။ဒီမှာတော့လုံးချင်းကိုနှစ်သိန်းပေးရတယ်။သွားလာရေးကဝေးတယ်။ဒါပေမယ့်လူအုပ်နဲ့နေလို့ရသေးတော့အဆင်ပြေတယ်။ကလေးများရင်အိမ်ရှင်တွေကသိပ်မငှားချင်ကြတော့မြို့ပြင်ဘက်ပဲနေလိုက်တယ်"လို့ရွှေပြည်သာမြို့နယ်မှာနေထိုင်သူစစ်ရှောင်တစ်ဦးကပြောပါတယ်။
လက်ရှိမှာရန်ကုန်မြို့တွင်းမှာစစ်ရှောင်နေထိုင်သူတွေတင်မကဘဲရန်ကုန်မြို့တွင်းမှာတင် နေအိမ်တွေကပြောင်းရွှေ့နေထိုင်သူတွေရှိနေတာပါ။
ဒီအခြေအနေတွေကြောင့်လည်းအိမ်ငှားရမ်းခတွေမြင့်တက်လာပြီးလူအရေအတွက်များတာ၊ ကလေးများတာ၊ ယောကျာ်းလေးတွေစုနေတာတွေကိုပေးမငှားတာတွေအထိရှိလာပါတယ်။
"အစကအောက်ထပ်မှာအမနေတာပါ။အခုကစစ်ရှောင်မိသားစု ၃ စုပေါင်းနေကြတယ်။တစ်လသုံးသိန်းနဲ့ထားတယ်။အိမ်က(၁၀)ပေ(၆၀)အပြည့်ဆောက်ထားတာပါ။သူတို့ဘာသာပေါင်းနေကြတာ။အသိကချိတ်ပေးတာပါ။ငှားခကများတယ်ဆိုပေမယ့်လူကြီးတွေကောကလေးတွေပါမနည်းဘူး။"လို့လှိုင်သာယာမြို့နယ်က အိမ်ပိုင်ရှင်တစ်ဦးပြောပါတယ်။
လက်ရှိမှာတိုက်ခန်းတွေ၊ လုံးချင်းအိမ်တွေလည်းငှားရမ်းခတွေမြင့်တက်လာသလိုလူအများစုနေကြတဲ့အဆောင်တွေမှာလည်း မီတာခနှုန်းထားတက်လာတာကိုအကြောင်းပြပြီးကျပ်သောင်းဂဏန်းထိတိုးတောင်းနေတယ်လို့အဆောင်တွေမှာနေထိုင်သူတွေဆီကသိရပါတယ်။
