ရန်ကုန်မြို့မှာ တရက် လေးနာရီ အလှည့်ကျ လျှပ်စစ်ဖြန့်ဝေ နေပေမဲ့ မိနစ် အနည်းငယ်သာ သုံးခွင့်ရတယ်လို့ ဒေသခံ ပြည်သူတွေက ပြောပါတယ်။ မတ် ၂၈ ရက် စစ်ကိုင်းငလျင် လှုပ်ခတ်ပြီးကတည်းက အလှည့်ကျစနစ်ကို ရန်ကုန်လျှပ်စစ်ဓာတ်အားပေးရေးကော်ပိုရေးရှင်း YESC က ရန်ကုန်မြို့ကို အုပ်စု ၆ အုပ်စု ခွဲပြီး ၄ နာရီ အလှည့်ကျ စနစ်နဲ့ ဖြန့်ဖြူးမယ်ဆိုပြီး ထုတ်ပြန်ထားတာ ဖြစ်ပါတယ်။
“ ၄ နာရီ အုပ်စုတွေ ခွဲတယ်ဆိုပြီး ကိုယ့်အလှည့်က ဘယ်ချိန်လာမယ် မသိဘူး၊ ငလျင်လှုပ်ပြီးကတည်းက မိနစ် နည်းနည်းလေးပဲ လာသေးတယ်။ လျှော်ရေးဖွတ်ရေး၊ စားသောက်ရေးတွေ ဒုက္ခရောက်ရတယ်။ အဓိကတော့ ပွင့်လင်းမြင်သာစွာ ထုတ်ပြန်ဖို့ပါ။ အခုဟာက ဘယ်အချိန်၊ ဘယ်လိုရမယ်ဆိုတာ ဘာမှမသိရဘူး။ “ လို့ ရန်ကုန်မြို့နေ ပြည်သူတဦးက ပြောပါတယ်။
YESC က ခွဲထားပေးတဲ့ လျှပ်စစ်မီးပေးဝေမဲ့ အုပ်စုတွေကို မြိုနယ်တွေ ဖော်ပြထားတာ မရှိသလို မြို့နယ် လျှပ်စစ်ရုံးကို မေးမြန်းရာမှာလည်း ဆက်သွယ်ရမဲ့ ဖုန်းတွေအားလုံးကို ပိတ်ထားတယ်လို့ ပြောပါတယ်။ ငလျင်ဒဏ်ကြောင့် ရန်ကုန်မြို့ကို သွယ်တန်းထားတဲ့ လျှပ်စစ်လိုင်းတွေ ထိခိုက်ခဲ့ရပြီး လက်ရှိ လျှပ်စစ် ဓါတ်အားကို ဓါတ်ငွေသုံးနဲ့ ဒီဇယ်ဓါတ်အားသုံး စက်တွေကနေ ထုတ်လုပ်နေရတယ်လို့ နီးစပ်သူတွေက ပြောဆိုပါတယ်။
“အခုက တနေကုန်မှ ၄ နာရီဆိုတော့ ဝိုင်းသုံးရတယ်။ လျှပ်စစ်ဓါတ်အားလာတဲ့ ချိန်မှာကို ခဏခဏ ပြတ်တယ်။ တနာရီလောက်ကို အပြည့်မလာတာ။ တကယ်လာတဲ့ အုပ်စုကို မေးကြည့်တော့ ၂ နာရီလောက်ပဲ ရတယ်။ အဲ့ဒီ နှစ်နာရီမှာ ကို ၁၀ မိနစ် တခါလောက်ပျတ်တယ်။ ကျွန်မတို့ဆီတော့ ၁၅ မိနစ်လောက်လာပြီး ပျက်သွားတယ်။ ပြန်မလာတော့ဘူး။ ထမင်းလည်းမကျက်၊ သုံးရေလည်း မရ ဖြစ်ရတာ။” လို့ ရန်ကုန်မြို့ ဆင်ခြေဖုန်းရပ်ကွက်မှာ နေထိုင်တဲ့ အိမ်ရှင်မတဦးက ပြောပါတယ်။
ဒီကနေ့ မတ် ၃၀ ရက် မနက် ၃ နာရာခွဲမှာ အလုံဓာတ်အားပေးစက်(၁)လုံး ရပ်တန့်သွားပြီးနောက် လည်ပတ်နေတဲ့ ဓာတ်အားပေးစက်အားလုံး ဆက်လက်ရပ်တန့်ခဲ့ပြီး ရန်ကုန်ဓာတ်အားပေးစနစ် ယာယီ ချိုယွင်းမှု ဖြစ်ပွားခဲ့တယ်လို့ YESC က နောက်ဆုံးထုတ်ပြန်ထားပါတယ်။ ဒီလို ထုတ်ပြန်ပြီးနောက်ပိုင်း ရန်ကုန်မြို့က နေရာတချို့မှာ လျှပ်စစ်မီးဖြန့်ဖြူးမှုတွေ ရှိနေပေမဲ့ မိနစ် အနည်းငယ်သာ သုံးစွဲခွင့်ရတယ်လို့ ဒေသတချို့က ပြောကြားထားပါတယ်။
