Xin Rui Co, Ltd အထည်ချုပ်စက်ရုံ အလုပ်သမား ၅ ဦးကို ဥပဒေမဲ့ အလုပ်ထုတ်ခဲ့တယ်လို့ အလုပ်သမားတွေက ပြောပါတယ်။
အလုပ်သမားညွှန်ကြားရေး ဦစီးဌာန (အလရ) ဦးစီးမှူးရဲ့ ညွှန်ကြားချက်ကို ဆန့်ကျင်ပြီး အခုလို အလုပ်ထုတ်ခဲ့တာလို့ သိရပါတယ်။
“အလုပ်ဝင်ချိန် ၈ နာရီ ၊ အဲဒါကို ၁၅ မိနစ်အလို ဘဲလ်တီးပြီးတယ်။ ခေါင်းဆောင်တွေ လီတာတွေက မီတင်ဆိုပြီး စကားပြောကြတယ် ။ တပတ်ဆိုရင် ၁ နာရီခွဲ ၊ တလဆို ၆ နာရီ ။ ၅၄၀၀ အလုပ်သမားက နစ်နာနေပြီ။ လုပ်အား ကို ခေါင်းပုံ ဖြတ်တာ” လို့ ပြောပါတယ်။
အလုပ်ချိန် ၁၅ မိနစ်ကြိုတင်ခေါ်တာနဲ့ ပတ်သက်ပြီး အလုပ်သမားတွေက အလရဦးစီးအရာရှိဆီကို တိုင်ကြား ခဲ့ရာမှာ အောက်တိုဘာ ၂၂ ရက် နောက်ဆုံးထား မလုပ်ဖို့ကို စာထုတ်ပြန်ခဲ့ပြီး လူမြင်ကွင်းမှာ ကပ်ထားဖို့ မှာကြားခဲ့တယ်လို့ အလုပ်သမားတွေက ပြောပါတယ်။
“ ၂၂ ရက်နေ့ ညနေ ၄ နာရီလောက်မှာ QC ၊Packing ၊Iron ဌာနတွေက အလုပ်သမား ငါးဦးကို ရုံးပေါ်ခေါ် တယ်။ နို့တစ်ကြေးတစ်လစာနဲ့ ရဖို့ရှိတဲ့ လစာ ပေးတယ်။ ပြီးတော့ အလုပ်ထုတ်တာကို လက်မှတ်ထိုးခိုင်းတယ်။ ” လို့ ပြောပါတယ်။
အလုပ်ထုတ်ခံရတဲ့ အလုပ်သမားတွေကတော့ စက်ရုံဘက်က ပေးတဲ့ ငွေကြေးတွေကို လက်မခံဘဲ အလုပ်သမား ရုံးကို တိုင်ကြားခဲ့တယ်လို့လည်း သိရပါတယ်။
Xin Rui Co., Ltd စက်ရုံမှာ စက်တင်ဘာ ၆ ရက် နေ့လယ်ပိုင်းမှာ ဝန်ကြီးဌာနက ညွှန်ကြားထားတဲ့ အလုပ်သမားတွေ အတွက် ထောက်ပံ့ကြေး တိုးမပေးလို့ အလုပ်သမားတွေ က လုပ်ငန်းခွင် အလုပ်ရပ် တောင်းဆိုခဲ့တယ်လို သိရပါတယ်။
“ထမင်းစားနားချိန်မှာ လုပ်ငန်းခွင် မဝင်ဘဲ ထောက်ပံ့ကြေး ပေးဖို့ တောင်းဆိုခဲ့တယ်။ Packing၊ Iron၊ Snak, QC ဌာနက အလုပ်သမားတွေလည်း ပါတယ်။ စက်ရုံမှူးက ထောက်ပံ့ကြေး မပေးနိုင်ဘူး၊ ကြိုက်တဲ့နေရာ သွားတိုင်ဆိုပြီး အပြင် မောင်းထုတ်ခဲ့တယ်” လို့ အလုပ်သမားတဦးက ပြောပါတယ်။
အလုပ်သမားတချို့က ထောက်ပံ့ကြေးအတွက် အလုပ်သမားရုံးကို တိုင်ကြားခဲ့ပေမဲ့ ပြောင်းလဲမှုမရှိခဲ့သလို တောင်း ဆိုမှုပြုလုပ်ခဲ့တဲ့ အလုပ်သမားတွေလည်း လုပ်ငန်းခွင် ပြန်လည်ဝင်ရောက်ခွင့်ရခဲ့တယ်လို သိရပါတယ်။
Xin Rui Co., Ltd အထည်ချုပ်စက်ရုံက လှိုင်သာယာမြို့နယ်၊ ဆရာရှမ်းလမ်း၊ ရွှေလင်ဗန်းစက်မှုဇုန်မှာ ရှိပြီး လုပ်သား ၄၀၀ ကျော်နဲ့ OVS အမှတ်တံဆိပ် အထည်တွေ ချုပ်လုပ်နေတယ်လို့ အလုပ်သမားတွေက ပြောပါ တယ်။
