True Green City ကော်စေ့စက်ရုံက ကိုယ်ဝန်ဆောင်လုပ်သားတဦးကို အလုပ်သမားရုံး တိုင်ကြားလို့ ဆိုပြီး အလုပ်ကနေ ထုတ်ပယ်ခံခဲ့ရတယ်လို့ သွေးစည်းညီညွတ်သော အလုပ်သမားများ အဖွဲ့ချုပ် STUM ဆီက သိရပါတယ်။ လုပ်သက် တစ်နှစ်ရှိ အမျိုးသမီး ကို ကိုယ်ဝန်ရှိလို့ဆိုပြီး မန်နေဂျာက အလုပ်ထွက်ဖို့ အတင်းအကျပ် လက်မှတ် ထိုးခိုင်းခဲ့တယ်လို့ ပြောပါတယ်။
"နင့်မှာ ကိုယ်ဝန်ရှိနေတယ်ဆို၊ ကိုယ်ဝန်နဲ့ဆို စက်ရုံမှာထားလို့ မရဘူး။ ကိုယ်ဝန်ရှိတာကို ဘာလိုငါ့ကို မပြောတာလဲ နှုတ်ထွက်စာမှာ လက်မှတ်ထိုး"ဟု ပြောဆိုခဲ့တယ်လို့ ကာယကံရှင် အလုပ်သမားက ပြောဆိုထားပါတယ်။
ကိုယ်ဝန်ဆောင် အလုပ်သမားက ကိုယ်ဝန် တစ်လကျော်လောက်သာရှိတာမို့ စက်ရုံ တာဝန်တွေကို လုပ်ကိုင်ဖို့ လုပ်ကိုင်နိုင်တာကို ရှင်းပြပေမဲ့ စက်ရုံမန်နေဂျာက နုတ်ထွက်ဖို့ အတင်းကျပ် ထိုးခိုင်းခဲ့တာလို့ သိရပါတယ်။
အလုပ်သမားသမဂ္ဂက ညှိနှိုင်းပေးရာမှာ နေ့စားအလုပ်သမားအနေနဲ့ လုပ်ကိုင်ဖို့ စက်ရုံဘက်က ပြောဆိုခဲ့ပြီး ဇွန်လ ၁၉ ရက်မှာ သုံးလဝန်းကျင်ပဲ လုပ်ကိုင်ခွင့် ပြုမယ်ဆိုပြီး ထပ်မံပြောကြားခဲ့တယ်လို့ ပြောပါတယ်။
ဇွန် ၂၃ ရက်မှာတော့ အလုပ်သမားရုံးကို တိုင်ကြားလို့ ဆိုပြီး အလုပ်ကနေ ထုတ်ပယ်ခံရတာလို့ ကာယကံရှင် အလုပ်သမားကပြောဆိုထားပါတယ်။
True Green City Co., Ltd စက်ရုံက အလုပ်သမားသမဂ္ဂကို ဖြိုခွဲဖို့ကြိုးစာတာ၊ ဦးဆောင်သူတွေကို အလုပ်ထုတ်တာ တွေ လုပ်ဆောင်ခဲ့ပြီးနောက် ပြီးခဲ့တဲ့ ရက်ပိုင်းမှာ လုပ်ခတိုးမြှင့်ပေးဖို့ အလုပ်သမားတွေက တောင်းဆိုမှုတွေ ပြုလုပ်ခဲ့တဲ့ စက်ရုံဖြစ်ပါတယ်။ စက်ရုံက ကော်စေ့ စက်ရုံဖြစ်ပြီး ရန်ကုန်မြို့၊ ရွှေပြည်သာမြို့နယ်၊ ဝါးတရာစက်မှုဇုန်၊ မဟာမြိုင်လမ်းမှာ ဖွင့်လှစ်ထားပါတယ်။
