Tough Way Garment Mfg Co., Ltd ပိုင် အထည်ချုပ် စက်ရုံမှာ တစ်နေ့ အလုပ်ချိန် ၁၂ နာရီကျော် လုပ်ကိုင်ရပြီး နေ့လယ်စာ စားချိန် နာရီဝက်ပဲ အနားပေးတယ်လို့ အလုပ်သမားတွေက ပြောပါတယ်။ နေ့စဉ်အလုပ်ချိန်က မနက် ၇ နာရီခွဲကနေ ည ၇ နာရီခွဲအထိ ဖြစ်ပြီး နေ့စဉ် အချိန်ပို ၃ နာရီခွဲလုပ်ကိုင်နေရတာလို့ ပြောပါတယ်။
“အလုပ်ချိန်နှင့် အချိန်ပိုအပါ တစ်နေ့လျှင် ၁၂ နာရီ) ပုံမှန်ခိုင်းတယ်။ စနေနေ့ဆို ညနေ ၅ နာရီအထိ မပြီးဘူးဆိုပြီး ၆ နာရီအထိဆင်းရတယ်။ တနင်္ဂနွေနေ့ဆို တပတ်ခြား အတင်း ဆင်းရသေးတယ်။ ဒီနေ့ ပိတ်ရက်လည်း ဆင်းနေရတာ ။ ” လို့ အလုပ်သမားတွေက ပြောပါတယ်။
စက်ရုံမှာ အလုပ်သမား ၄၀၀ ဝန်းကျင်လုပ်ကိုင်နေကြပြီး စက်ရုံအဆောင်မှာ အလုပ်သမား ၃၀/ ၄၀ နေထိုင်တယ်လို့လည်း သိရပါတယ်။ အဆောင်နေ အလုပ်သမားတွေကတော့ ည ၈ နာရီခွဲအထိ အလုပ်ဆင်းရတယ်လို့လည်း ပြောပါတယ်။
“ အလုပ်ဆင်းတာ ၇ ခွဲဆို၊ စက်ရုံမှာနေတဲ့ အလုပ်သမားက ည ၈ ခွဲအထိ လုပ်ပေးမှ ရတယ်။ ကိုယ်တွေ အလုပ်ချိန်က ၁၂ နာရီ၊ သူတို့က ၁၃ နာရီ လုပ်ပေးရတာ ။ စနေနေ့ ဆို ညနေ ၅နာရီအထိပဲ ကိုအထည်မပြည့်လို့ ပြန်မလွတ်ဘူး ၆ နာရီကျော် ထိ ဆက်လုပ် ရတယ်။ အဲ့လို ဆင်းတဲ့အချိန်အတွက် ပိုက်ဆံမပေးပါဘူး.” လို့ အလုပ်သမားတွေက ပြောပါတယ်။
ဒါ့အပြင် တနင်္ဂနွေနေ့ (နားရက်) အချိန်ပိုတွေ လုပ်ခိုင်းပေမဲ့ ဥပဒေအတိုင်း လုပ်ခလစာ မပေးဘူးလို့လည်း ပြောပါတယ်။ ဒါ့အပြင် စက်လိုင်းစူပါက အထည်စံချိန်တွေ ဖိအားပေးတောင်းပြီး ဥပဒေမဲ့ ခိုင်းစေနေတယ်လို့ လည်း ပြောဆိုထားပါတယ်။
Tough Way Garment Mfg Co., Ltd အထည်ချုပ်စက်ရုံက ရန်ကုန်မြို့၊ ရွှေပြည်သာမြို့နယ်၊ ရွှေပြည်သာစက်မှုဇုန် ၁ ၊ ကနောင်မင်းသားကြီးလမ်းမှာ ရှိပြီး လက်ရှိ SOIE တံဆိပ် အထည်တွေချုပ်လုပ်နေတယ်လို့ သိထားပါတယ်။
