ဂျာမနီနိုင်ငံအခြေစိုက် အားကစားဝတ်စုံ အမှတ်တံဆိပ် Jako ဟာ မှ အထည်ချုပ် လုပ်သားနှစ်ဦးကို အာဏာသိမ်း စစ်ကောင်စီက ဖမ်းဆီးခဲ့တတာကြောင့် မြန်မာနိုင်ငံအတွင်း ရင်းနှီးမြှုပ်နှံမှုတွေကို ရုပ်သိမ်းဖို့ ကြေညာခဲ့တာကို Ecotextile News က ဇူလိုင်လ ၄ ရက်မှာ ဖော်ပြထားပါတယ်။
Jako အမှတ်တံဆိပ် ချုပ်လုပ်နေတဲ့ ရန်ကုန်မြို့က Sun Apparel စက်ရုံ အလုပ်သမားများအတွက် ခက်ခဲတဲ့ ဆုံးဖြတ်ချက်တစ်ခု ဖြစ်တယ်လို့လည်း Jako ရဲ့ အကြီးအကဲ တစ်ဦးဖြစ်တဲ့ Heiko Rum က Ecotextile News ကို ပြောကြားခဲ့တယ်လို့ ဖော်ပြထားပါတယ်။
"စစ်တပ်ရဲ့ အကြမ်းဖက်မှုနဲ့ ဖိနှိပ်မှုပုံစံမှန်သမျှကို ရှုတ်ချပြီး အခြေအနေကို တစိုက်မတ်မတ် ရှုတ်ချပါတယ်။ ဒီလိုစိန်ခေါ်မှုတွေရှိနေပေမဲ့ အလုပ်သမားတွေကို ကူညီထောက်ပံ့ဖို့နဲ့ ကျွန်တော်တို့ရဲ့ လုပ်ဖော်ကိုင်ဖက်တွေနဲ့ ရေရှည်ဆက်ဆံရေးကို ထိန်းသိမ်းဖို့ ကတိကဝတ်ပြုထားပါတယ်" လို Heiko Rum က ပြောကြားထားပါတယ်။
Sun Apparel Myanmar အထည်ချုပ်စက်ရုံဟာ ရန်ကုန်တိုင်း လှိုင်သာယာမြို့ စက်မှုဇုန် (၅) ၊မလိခလမ်းမှာ ရှိပြီး ထိုင်းနိုင်ငံသား ပိုင်ဆိုင်တယ်လို့ သိရပါတယ်။
Sun APPAREL Myanmar စက်ရုံက အလုပ်သမား ခေါင်းဆောင် မသီတာဝင်းကို စစ်ကောင်စီ လက်အောက်ခံ ရဲတပ်ဖွဲ့က ဇွန်လ ၁၄ ရက် ည ၁၁ နာရီလောက်မှာ ဖမ်းဆီးခဲ့တာဖြစ်ပါတယ်။ အဲဒီနောက် မသီတာဝင်းကို စစ်ကြောမေးမြန်းဖို့အတွက် စစ်ကောင်စီရဲ့ အမှတ် ၁ စစ်ဖက်ရေးရာ လုံခြုံရေးအကူ တပ်ဖွဲ့ဆီ ခေါ်သွားခဲ့ပါတယ်။
အသက် ၃၄ နှစ်အရွယ် အလုပ်သမားခေါင်းဆောင် မသီတာဝင်းနဲ့ စက်ရုံ အလုပ်သမားတွေက Day ကြေး နဲ့ ရက်မှန်ကြေး ၆ဝဝဝ ကျပ် တိုးပေးဖို့ ၊ သောက်သုံးရေကို စက်ရုံက စီစဉ်ပေးဖို့၊ အလုပ်သမား လျှောက်လမ်း အမိုးကိုပြုပြင်ပေးဖို့၊ ထမင်းစားဆောင် သီးသန့် ထားပေးဖို့ ၊ ပိတ်ရက်ခ ပြန်ပေးဖို့ ၊ (၁၅)ရက် အတွင်း အလုပ်ပျက်ပါက ကျပ် ၂၀၀၀၀ ပဲ ဖြတ်ဖို့ ဆိုတဲ့ အချက် ၆ ချက်ကို ဇွန်လ ပထမ အပတ်မှာကတည်းက တောင်းဆိုခဲ့တယ်လို့ သိရပါတယ်။
အဲ့လိုတောင်းဆိုတာကို လှိုင်သာယာ (အနောက်ပိုင်း)မြို့နယ် အလုပ်သမားရေးရာ ဆက်ဆံရေး ဦးစီးဌာနမှာ အလုပ်သမားခေါင်းဆောင် မသီတာဝင်းနဲ့ စက်ရု့ မန်နေဂျာ ဖြစ်သူတို့ ညှိနှိုင်းခဲ့ရာမှာ ပြေလည်မှုမရရှိဘဲ ဇွန် ၁၅ ရက်မှာ ဆက်လက်ညှိနှိုင်းဖို့ စီစဉ်ခဲ့တယ်လို့လည်း သိရပါတယ်။ မသီတာဝင်းကတော့ အဲဒီရက်မတိုင်မီ တရက်အလိုမှာ ဖမ်းဆီးခံခဲ့ရတာဖြစ်ပါတယ်။
Sun APPAREL Myanmar စက်ရုံက နောက်ထပ် အလုပ်သမားခေါင်းဆောင် တဦးဖြစ်တဲ့ ကိုလှိုင်ဝင်းထက် ခေါ် ကိုထက်ကိုတော့ ဇွန်လ ၁၅ ရက်မှာ စစ်ကောင်စီတပ်တွေ လုပ်ငန်းခွင်အတွင်း ဝင်ရောက်ဖမ်းဆီးခဲ့တာ ဖြစ်ပါတယ်။
လက်ရှိ အာဏာသိမ်း စစ်ကောင်စီက ခေတ်ကာလနဲ့ ညီတဲ့ လုပ်ခလစာတိုးပေးဖို့ တောင်းဆိုတဲ့ အလုပ်သမားနဲ့ အလုပ်သမားကူညီရေးအဖွဲ့ဝင် ၁၀ ဦးကို ဖမ်းဆီးထားပြီး နိုင်ငံရေးပုဒ်မတွေနဲ့ တရားစွဲကာ စစ်ခုံရုံးမှာ စစ်ဆေးဖို့ ပြင်ဆင်နေပါတယ်။
#MyanmarLabourNews
