SPRING RIVER KNITTING (MYANMAR) သိုးမွှေး အထည်ချုပ်စက်ရုံက လုပ်လစာတိုးမြင့်ရေး တောင်းဆိုနေတဲ့ အလုပ်သမားခေါင်းဆောင်တွေကို စစ်တပ်ခေါ် ဖမ်းခိုင်းမယ်ဆိုပြီး စက်ရုံတာဝန်ရှိတွေက ခြိမ်းခြောက်နေတယ်လို့ မြန်မာနိုင်ငံအထွေထွေအလုပ်သမားသမဂ္ဂများအဖွဲ့ချုပ် FGWM ကို အလုပ်သမားတွေက ပြောပါတယ်။
‘’စက်ရုံမန်နေဂျာက အလုပ်သမားခေါင်းဆောင်တွေကို စက်ရုံဘက်က ပေးတဲ့ လုပ်ခလစာကိုလက်မခံပဲ ဆန္ဒဆက်ပြနေရင် မြို့နယ်မီးသတ်ဦးစီး အရာရှိက စစ်တပ်ကိုခေါ်ပေးမယ်တဲ့၊ နင်တို့ကို စစ်တပ်ခေါ်ဖမ်းခိုင်းလို့ ရတယ်’’ဆိုပြီး မန်နေဂျာက ပြောတယ်" လို့ အလုပ်သမားတွေက ပြောပါတယ်။
တောင်းဆိုမှု ပြုလုပ်နေတဲ့ ဇွန် ၄ ရက်မှာ စက်ရုံကိုမီးသတ်ဦးစီးဌာနက တာဝန်ရှိသူတွေ စစ်ဆေးချိန်မှာ အလုပ်သမားတွေ ဆန္ဒပြတာကို တွေ့ပြီး အခုလို ပြောခဲ့တာပါ။
SPRING RIVER KNITTING (MYANMAR) စက်ရုံမှာ ဇွန်လ ၂ ရက်ကစပြီး လုပ်ခလစာ တောင်းဆိုနေကြတာဖြစ်ပါတယ်။ ဒေးကြေး ကျပ် ၁၀,၀၀၀၊ ရက်မှန်ကြေး ၆၀,၀၀၀၊ အိုတီကြေး တစ်နာရီ ၂,၀၀၀ ပေးဖို့ အလုပ်ရပ်ပြီး စက်ရုံဝန်းထဲမှာအလုပ်သမားတွေက တောင်းဆိုနေကြတယ်လို့ အလုပ်သမား တွေက ပြောပါတယ်။
ဇွန်လ ၃ ရက်မှာ စက်ရုံဘက်က အလုပ်သမားတွေတောင်းဆိုနေတဲ့ ဒေးကြေးကို မပေးနိုင်ဘူးလိုငြင်းဆန်ပြီး ဒေကြေး ၈,၈၀၀ နဲ့ ရက်မှန်ကြေးကို ပေးနေကြ အတိုင်း ပေးမယ်ဆိုပြီး စက်ရုံဘက်က ညှိနှိုင်းခဲ့ပေမဲ့ အလုပ်သမားတွေဘက်က လက်မခံပဲ တောင်းဆိုမှုဆက်လုပ်နေတာဖြစ်လို့သိရတယ်။
"စက်ရုံမှာ ညပိုင်း အချိန်ပိုတွေ ၉နာရီ၊ ၁၀နာရီထိခေါ်၊ စနေလိုနေ့တွေမှာတောင် ည ၉နာရီထိ အချိန်ပိုခေါ်တယ် ။ အောလင်းတွေလည်း ညလုံးပါက်ဆင်းရတယ်။ဒီလို ညဘက်တွေ နောက်ကျမှအိမ်ပြန်ရတာ လုံခြုံမှုမရှိဘူး။ တနင်္ဂနွေနေ့ဆိုလည်း အိုတီကို မဆင်းမနေရ ဆင်းနေရတယ်။ အိမ်ပြန်ရင် ဖယ်ရီကားကို စက်ရုံအရှေ့မှာ မိနစ် ၂၀ လောက်စောင့်ရတယ်။ စက်ရုံမှာ အသက်မပြည့်သေးတဲ့ ကလေးအလုပ်သမားတွေလည်းရှိတယ်။ စံချိန်ဆို မတရားတောင်းတယ် မလုပ်နိုင်လည်း လုပ်ပေးရတယ် ။ အိမ်သာတောင်ထသွားလို့မရဘူး"လို့ အလုပ်သမားတွေက FGWM ကိုပြေထားပါတယ်။
SPRING RIVER KNITTING (MYANMAR) သိုးမွှေး စက်ရုံက လှိုင်သာယာမြို့၊ ရွှေလင်ပန်းစက်မှုဇုန်မှာ ရှိပြီး လုပ်သား ၆၀၀ ကျော် လုပ်ကိုင်နေပါတယ်။ စက်ရုံက BETTY&CO ၊ BETTY BARCLAY တံဆိပ် အထည်တွေ ချုပ်လုပ်နေ ပါတယ်။
