ရွှေလင်ဗန်းစက်မှုဇုန် က Sen yu အထည်ချုပ်စက်ရုံ အလုပ်သမားတွေရဲ့ တောင်းဆိုချုပ်တွေကို ညှိနှိုင်းခဲ့ရာမှာ စက်ရုံဘက်က လုံးဝ လိုက်လျှောမှု မရှိခဲ့ဘူးလို့ အလုပ်သမားတွေက ပြောပါတယ်။ အလုပ်သမားတွေဘက် က လုပ်ခတိုးမြှင့်ပေးရေး အပါအဝင် အချက် လေး ချက်တောင်းဆိုမှုကို ဒီကနေ့ တောင်းဆိုခဲ့တာလို့ သိရပါတယ်။
“စက်ရုံဘက်က တောင်းဆိုမှု အားလုံး မလိုက်လျှောဘူး၊ ဘာမှမလုပ်ပေးနိုင်ဘူးလို့ ငြင်းတယ်၊ လာညှိတဲ့ အလုပ်သမားဦးစီးဌာနက လူတွေကလည်း ၊ သူတို့ ဆက်မညှိတော့ဘူး၊ ရုံးဖွင့်ရက်မှာ အခုဖြစ်တာတွေကို တရားဝင် လာတိုင်ဆိုပြီး ပြောတယ်” လို့ အလုပ်သမားတွေက ပြောပါတယ်။
အလုပ်သမားတွေက ဒေးကြေး ၁၂၀၀၀၊ အိုတီကြေးကို တစ်နာရီ ၂၅၀၀ တိုးပေးဖို့၊နဲ့ လုပ်ငန်းခွင်တွင်း မတရားဖိနှိပ်တဲ့ စက်လိုင်းမန်နေဂျာနဲ့ အောစူပါချုပ်ကို ထုတ်ပေးဖို့တောင်းဆိုတာခဲ့တာလို့ အလုပ်သမားတဦးက ပြောပါတယ်၊
“တောင်းဆိုတာက ဒီနေ့ ၇ ရက်က စပြီး တောင်းတာ၊ ညှိတာက မနေ့ကရယ် ဒီနေ့ရယ်ပါ။ အရင်က ဒေးကြေး ၁၀၀၀၀ ပဲရနေလို့ တိုးတောင်းတာ။ အောချုပ်နဲ့ မန်နေဂျာကတော့ လုပ်ငန်းခွင်ထဲမှာ ချယ်လှယ်။ လစာ အတိုး အလျှော့၊ အလုပ်ထုတ်တာက သူတို့စိတ်ကြိုက်လုပ်တယ်။ အလုပ်သမားတွေက သူတို့ကို ကြောက်နေရတော့ ဖိအားတအားများတယ်။ အခုညှိတော့ အလုပ်သမားဦးစီးတွေကလည်း စိတ်ရှည်ရှည်နဲ့ ညှိမပေးတော့ အခုလို အဆင်မပြေတာတွေ ဖြစ်တာ” လို့ အလုပ်သမားတွေက ပြောပါတယ်။
တောင်းဆိုမှုအတွင်း လုံခြုံရေးအဖွဲ့စအည်းတွေ၊ အလုပ်သမားဦးစီးဌာနက အရာရှိတွေ လာရောက်ခဲ့ပြီး လက်ရှိ အလုပ်သမား ၄၀၀ ဝန်းကျင် ပါဝင်နေပြီး ညအိပ်တောင်းဆိုမှုတွေ ပြုလုပ်ခဲ့တယ်လို့ အလုပ်သမားတွေက ပြောပါတယ်။
“ဒီတောင်းဆိုမှုကာလအတွင်း စက်ရုံဘက်က ကွန်တိန်နာထွက်ဖို့ လုပ်တာ၊ ဒါထွက်ရင် တောင်းတဲ့ အချက်တွေ မပြည့်မှာ မို့ တောင်းဆိုတဲ့နေရာမှာပဲ ညအိပ်ခဲ့ရတယ်။ ဒါကိုတောင် စက်ရုံဘက်က ကိုယ်ထိလက်ရောက် အပြုအမူတွေ ရှိခဲ့တယ်၊ ဒါကို လုံခြုံရေးအဖွဲ့တွေ ရှေ့မှာ လုပ်ခဲ့တာ။ ”လို့ အလုပ်သမားတွေက ပြောဆိုပါတယ်။
Sen yu အထည်ချုပ်စက်ရုံက ရန်ကုန်မြို့၊ လှိုင်သာယာမြို့နယ်၊ ရွှေလင်ဗန်းစက်မှုဇုန်၊ ဗန်းမော်အတွင်းဝန်လမ်း၊ ရွှေလင်ဗန်းအဝိုင်းအနီးမှာ ရှိပြီး အလုပ်သမား ၁၀၀၀ ဝန်းကျင်လုပ်ကိုင်နေတဲ့ တရုတ်နိုင်ငံသားပိုင် စက်ရုံဖြစ်ပါတယ်။
