လုပ်ငန်းခွင်အတွင်း အလုပ်ရပ်တောင်းဆိုနေတဲ့ Sen.Yu Myanmar အထည်ချုပ်စက်ရုံ အလုပ်သမားတွေက ဥပဒေအတိုင်း အလုပ်ပိတ်ရက်နဲ့ အလုပ်ဖွင့်ရက် ဒေးကြေး တန်းတူပေးဖို့ အပါအဝင် အချက် ၆ ချက်တောင်းဆိုထားတယ်လို့ သိရပါတယ်။ အလုပ်ရပ်တောင်းဆိုမှုတွေ ဧပြီ ၂၃ ရက်မှာ စတင်ခဲ့ပြီး စက်ရုံဘက်က အလုပ်ပိတ်ရက်မှာ လုပ်ခလစာကို ပုံမှန်အလုပ်ဆင်းရက်ထက် လျှော့ရှင်းနေတာကြောင့် အလုပ်သမားသမားတွေက တန်းတူပေးဖို့ တောင်းဆိုခဲ့တာ ဖြစ်ပါတယ်။
“စက်ရုံက အလုပ်ပိတ်ရက်မှာဒေးကြေး ၆၈၀၀ကျပ်ပဲ ပေးတယ်။ အလုပ်ဆင်းရတဲ့ရက်မှာ ၈၈၀၀ ပေးတာ။ အဲဒါကို အလုပ်ပိတ်ရက်ရော အလုပ်ဆင်းရက်ရော တန်းတူဒေးကြေး ၈၈၀၀ကျပ်ပေးဖို့ တောင်းဆိုတာ။ ” လို့ အလုပ်သမားတွေက ပြောပါတယ်။
၁၉၅၁ ခုနှစ် ခွင့်ရက်နဲ့ အလုပ်ပိတ်ရက် ဥပဒေမှာ ပိတ်ရက်တွေအတွက် လုပ်ခ အပြည့်ပေးရမယ်လို့ ပြဌာန်းသတ်မှတ်ထားပါတယ်။ အလုပ်ရပ်တောင်းဆိုမှုက ဧပြီ ၂၃ ရက်မှာ စတင်ခဲ့ပြီး စက်ရုံ အလုပ်သမား ၁၀၀၀ ဝန်းကျင် ပါဝင်နေ တယ်လို့ မြန်မာနိုင်ငံ အထွေထွေ အလုပ်သမားသမဂ္ဂများ အဖွဲ့ချုပ် - FGWM ဆီက သိရပါတယ်။
“အခုတော့ ဦးစီးမှူးတွေရောက်လာတယ်။ တောင်းဆိုချက်တွေ ပေးလိုက်တယ် အလုပ်သမား ဝန်ကြီးဌာနက ဦးစီးမှူးတွေအနေနဲ့ ဘယ်လိုဖြေရှင်းပေးမလည်း ကျမတို့ စောင့်ကြည့် မယ်။ ညီမတို့ တောင်းထားတဲ့အချက်တွေ မရမချင်းအလုပ်ရပ်ထားမယ် ။ ချုပ်နေတဲ့ အမှတ်တံဆိပ်တွေကို အသိပေးဖို့ ရှိပါတယ်" လို့ အလုပ်ရပ်တောင်းဆိုနေတဲ့ အလုပ်သမားတွေက ပြောပါတယ်၊၊
ဒေးကြေး ၁၁၀၀၀ ကျပ် တိုးပေးဖို့၊ အိုတီကြေး ၂၃၀၀သတ်မှတ်ပေးဖို့၊ ရက်မှန်ကြေး ၆၀၀၀၀ ပေးဖို့၊ ဂရိတ်ကြေးကိုလည်း ကျပ် တစ်သိန်းကနေ ကျပ် ၄၀၀၀၀ ကြား သတ်မှတ်ပေးဖို့၊ ပုံမှန် ၆ နာရီခွဲ အလုပ်ဆင်းပေးဖို့၊ စနေ့နေ့ကို ပုံမှန် ညနေ ၄ နာရီခွဲဆင်းပြီး အချိန်ပိုမခေါ်ဖို့၊ စက်ရုံ တာဝန်ရှိသူတွေနဲ့ ခေါင်းဆောင်တွေက ရိုင်းစိုင်းစွာ ပြုမူပြောဆိုတာတာတွေမလုပ်ဖို့ ရိုင်းစိုင်းစွာပြုမူပြောဆိုပါက EC စာချုပ်ပါ အတိုင်း ထိရောက်စွာအရေးယူဆောင်ရွတ်ပေးဖို့ အလုပ်သမားတွေက တောင်းဆိုထားပါတယ်။
SEN YU စက်ရုံက ရန်ကုန်မြို့၊လှိုင်သာယာမြို့နယ် ၊ ရွှေလင်ပန်းစက်မှုဇူန် ၊ဗန်းမော်အတွင်းဝင်လမ်းမှာရှိပြီး တရုတ်နိုင်ငံသားပိုင် စက်ရုံလို့ သိထားပါတယ်။ စက်ရုံကတော့ REDTAPE , NAUTICA, Piazzaitalia အမှတ်တံဆိပ်တွေ ချုပ်လုပ်နေတယ်လို့ အလုပ်သမားတွေက ပြောထားပါတယ်။
