Rongda အထည်ချုပ် စက်ရုံ အလုပ်သမားတွေ လုပ်ခလစာ တိုးမြှင့်ရေး တောင်းဆိုမှုကို နှစ်ဖက်သဘောတူညီမှု ရရှိခဲ့ပြီလို့ အလုပ်သမားတွေက ပြောပါတယ်။
"ဒေးကြေး ၁၀၀၀၀ နဲ့ အိုတီ ၂၂၀၀ ပါ။ ရက်မှန်ကြေးက ၆၀၀၀၀ ပါ၊ တရက်ပျက်တာနဲ့ အကုန်ဖြတ်မယ်။ အလုပ်သမားတွေ သဘောတူလို့ စာချုပ် ချုပ်လိုက်ပါပြီ။" လို့ အလုပ်သမားတွေက ပြောပါတယ်။
တောင်းဆိုဆန္ဒပြတဲ့ ရက်နှစ်ရက်အတွက် ဒေးကြေးမရဘဲ အလုပ်ဖွင့်ရက်မှာ လုပ်ငန်းခွင်ပြန်ဝင်မှာ ဖြစ်တယ်လို့လည်း အလုပ်သမားတွေက ပြောပါတယ်။
အလုပ်သမားတွေက ဒေးကြေး ၈၈၀၀ ၊ အချိန်ပို တစ်နာရီ ၂၀၀၀ ကနေ ဒေးကြေး ၁၃၀၀၀၊ အချိန်ပို ၂၅၀၀ နဲ့ တိုက်သင့်တဲ့ ရက်မှန်ကြေးတိုးပေးဖို့ တောင်းဆိုခဲ့တာပါ။
ညှိနှိုင်းမှု အစောပိုင်းမှာ စက်ရုံဘက်က လုပ်ခပေးချေမဲ့ လုပ်ခလစာ ပုံစံ ၃ မျိုးနဲ့ ညှိနှိုင်းခဲ့ပေမဲ့ အလုပ်သမားတွေက အဲ့ဒီပုံစံတွေကို လက်မခံခဲ့ပါဘူး။
"တောင်းဆိုမှု သတင်းတက်လာပြီး အလုပ်သမားရုံးက လူကြီးတွေရောက်လာတယ်။ ဆက်ညှိတော့ ရတဲ့ ရလဒ်ကို အလုပ်သမားတွေက လက်ခံတော့ သဘောတူစာချုပ် ချုပ်နိုင်ခဲ့တာပါ။ အားလုံး ညီညွတ်လို့ အခုလို ရတာပါ။" လို့ အလုပ်သမားတဦးက ပြောပါတယ် ။
တောင်းဆိုမှုကို ဇွန် ၁၃ ရက် မနက်ပိုင်းမှာ စတင်ခဲ့ပြီး နောက်တရက်မှာ ပြီးဆုံးခဲ့တယ်လို့ ပြောပါတယ်။ Rong Da စက်ရုံမှာ အလုပ်သမား ၂၀၀၀ ကျော်ရှိပြီး ၉၀ ရာခိုင်နှုန်းက တောင်းဆိုမှုမှာ ပါဝင်ခဲ့တယ်လို့ ပြောထားပါတယ်။
RONG DA Garment စက်ရုံကို နိုင်ငံခြားရင်းနှီးမြှုပ်နှံမှုနဲ့ တည်ထောင်ထားပြီး တရုတ်နိုင်ငံသား ပိုင်ဆိုင်တယ်လို့ Myanmar Labour News ကသိရှိထားပါတယ်။ စက်ရုံကတော့ ရန်ကုန်မြို့၊ ရွှေပြည်သာမြို့နယ်၊ ဝါးတရာစက်မှုဇုန်၊ မင်းဗန္ဓုဘုရားလမ်းမှာရှိပါတယ် ။
