အလုပ်သမားတွေရဲ့ သဘောတူညီမှု မပါဘဲ မတ်လ ၁၅ ရက်ကို ပိတ်ရက်အစားထိုးရက် အဖြစ် တဖက်သတ် သတ်မှတ် ဆုံးဖြတ်ပြီး အလုပ်ဆင်းခိုင်းနေတယ်လို့ အလုပ်သမားတွေက ပြောပါတယ်။ ဒီလို သတ်မှတ်မှုကို စက်ရုံမှာ ဖွဲ့စည်းထားတဲ့ WCC အဖွဲ့ဝင်တွေကို တင်ပြခဲ့ပေမဲ့ ညှိနှိုင်းဆောင်ရွက်ပေးတာ မရှိဘူးလို့ အလုပ်သမားတွေက ပြောပါတယ်။
“စက်ရုံမန်နေဂျာက အလုပ်သမားတွေရဲ့ ဆန္ဒကို မမေးဘူး။ အလုပ်ဖွင့်ရက် ၁၅ရက်နေ့ကို အစားထိုး ပိတ်ရက် သတ်မှတ်တယ်။ တကယ် အလုပ်သမားတွေရဲ့ ဆန္ဒကို မေးရမှာ ၊ ဒါကို WCC ကိုသွားပြောတယ် ။ ငါတို့က ဘာတတ်နိုင်မှာလဲ သူတို့ ပိတ်တယ်ဆို ပိတ်တယ်ပေါ့လို့ ပြန်ပြောတယ်။ ဘာမှ ညှိနှိုင်းမပေးဘူး။ ခေါင်းဆောင် တွေလည်း အတူပဲ။ စက်ရုံကပြောတာ ခေါင်းငြိမ့်ခဲ့ပြီး ၊ အလုပ်သမားတွေ သဘောမတူတာကိုကြ ပြောမပေးဘူး ။ သူတို အပြောခံရမှာ ကြောက်တယ်၊ မျက်နှာ မရမှာ ကြောက်တယ်။ အလုပ်သမားတွေ အဆင်ပြေ မပြေ ပြန် မကြည့်ဘူး။” ဆိုပြီး စက်ရုံ အလုပ်သမားတဦးက ပြောပါတယ်။
စက်ရုံ အလုပ်နားချိန်မှာ မီးစက်ပိတ်မပေးတာကြောင့် နားချိန်မရဘဲ ဆက်လက်လုပ်ကိုင်နေရပြီး ဒီကိစ္စကို အလုပ်သမားအရာရှိတွေ လာရောက် စစ်ဆေးခဲ့ပေမဲ့ အပြောင်းအလဲ မရှိဘဲ အလုပ်သမားတွေမှာ နားချိန်မရဘဲ ဆက်လက်လုပ်ကိုင်နေရတာလို့ အလုပ်သမားတွေက ပြောပါတယ်။
“ အလုပ်သမား ဦးစီးမှူးတွေ လာစစ်တဲ့ အချိန်က နားတဲ့အချိန်မဟုတ်ဘူး။ စက်ရုံက နားချိန် အပြည့်အဝ ပေးထားတယ်၊ မနားဘဲ အလုပ်မလုပ်ရဘူးဆိုပြီးပဲ ဦးစီးမှုတွေ ကြားခဲ့ရမှာ။ တကယ်ဆို နားတဲ့အချိန်ကို လာပြီး ဝင်စစ် စေချင်တယ်။ အဲ့ဒါမှ အမှန်ကို မြင်ရမှာ။ ထမင်းစားချိန်ဆို မီးပိတ်လို့ရတယ်။ နားတဲ့လိုင်းတွေကို မပိတ်ပေးဘူး။ မပိတ်ပေးတော့ ဆက်လုပ်ရတယ်။ နားချင်တောင် မနားရဘူး။ နားနေရင်တောင် နင်တို့က အထည်ပြည့် လိုလားနဲ့။ ညနေ နားချိန်ဆိုလည်း တရုံလုံး မီးပိတ်ပေးလိုရတယ် မပိတ်ပေးဘူး။ အဲတော့ မနားတော့ဘဲ ဆက်လုပ် တဲ့ သူက လုပ်ရတယ်။ မုန့်စား နားတယ်ဆိုတာက တခြားဌာနက ဝန်ထမ်းတွေ။ စက်လိုင်း အလုပ်သမားတွေ နားရတာ မဟုတ်ဘူး ။ နားစေချင်တယ်ဆိုရင် မီးစက်ပိတ်ပါလား။ မပိတ်တော့ ခေါင်းဆောင်တွေက ခိုင်းတယ်။ ခိုင်းရတော့ ခိုင်းတယ်။ နားလဲ အပြောအဆိုခံနေတယ်” လို့ ပြောပါတယ်။
New Plus အထည်ချုပ်စက်ရုံက သာဓုကန်စက်မှုဇုန်၊ ကျောက်စိမ်းလမ်း (နွားခြံမှတ်တိုင်အနီး)က တရုတ် နိုင်ငံသားပိုင် စက်ရုံဖြစ်ပါတယ်။ လက်ရှိ အလုပ်သမား ၁၀၀၀ ဝန်းကျင်လုပ်ကိုင်နေပါတယ်။
