အချိန်ပို အလွန်အကျွံခေါ်ယူမှုတွေကြောင့် အလုပ်သမားအရာရှိတွေ မကြာခဏ ဝင်ရောက်စစ်ဆေးနေတဲ့က New Plus အထည်ချုပ်စက်ရုံမှာ နေ့စဉ် အချိန်ပို ည ၉ နာရီအထိ လုပ်ကိုင်ခိုင်းသလို အလုပ်သမားတွေရဲ့ နားရက် ဖြစ်တဲ့ တနင်္ဂနွေနေ့တွေပါ လုပ်ကိုင်ပေးနေရတယ်လို့ ပြောပါတယ်။
“ကျွန်မတို့ အရမ်းပင်ပန်းနေပြီ။ နားချိန်ဆိုတာ ဘာမှန်းမသိတော့ဘူး။ တနင်္လာကနေ သောကြာက မနက် ၈ နာရီကနေ ည ၉ နာရီအထိ၊ စနေနဲ့ တနင်္ဂနွေက ၄ခွဲ ဆင်းရတယ်” လို့ အလုပ်သမားတွေက ပြောပါတယ်။
ပြီးခဲ့တဲ့ ဇွန်လ ၂၀ ရက်မှာ မြို့နယ် အလုပ်သမားအရာရှိတွေ စက်ရုံကို လာရောက်စစ်ဆေးပြီး ၂ ရက်အကြာမှာ အခုလို အချိန်ပို ည ၉ နာရီအထိ ခေါ်ယူနေတာလို့ အလုပ်သမားတွေက ပြောပါတယ်။ ဒါ့အပြင် နေ့လယ်စာ စားချိန်အပြီး ကတည်းက အချိန်ပိုဆင်းပြီးအထိ တဆက်တည်း အလုပ်ချိန် ၆ နာရီခွဲကနေ ၈ နာရီခွဲကြာ လုပ်ကိုင်နေရတယ်လို့ ပြောပါတယ်။
“နေ့တိုင်း တနေ့ကို အလုပ်ချိန် ၁၃ နာရီ လုပ်ပေးနေရတယ်။ ထမင်းနားချိန် နာရီဝတ် ။ ည ၇ နာရီမှာ နားလည်မှုနဲ့ မုန့်ထွက်စားလို့ရတယ်ဆိုလည်း တရားဝင်အနားပေးတာ မဟုတ်ဘူး။ ကြားမှာ အနားရတာမဟုတ်ဘူး ၉ နာရီအထိ ဆက်ဆင်းရင် တစ်ထောင်တော့ ပေးတယ်၊ ဒါပေမဲ့ ပင်ပန်းတာကို ဘာနဲ့မှ လဲလို့မရတာ။ ” လို့ အလုပ်သမား တဦးက ပြောပါတယ်။
ပြီးခဲ့တဲ့ ဇူလိုင်လထဲမှာ တနင်္ဂနွေနေ့တိုင်း နားရက်မရခဲ့အပြင် အခု ဩဂုတ်လအတွင်းမှာလည်း နားရက်မရှိ ဆက်တိုက် လုပ်ကိုင်ပေးနေရတယ်လို့ သိရပါတယ်။ အချိန်ပိုမဆင်းတာကြောင့် စက်ရုံအတွင်းက ခေါင်းဆောင်ဆို သူတွေက အလုပ်သမားတွေကို ပြောဆိုတာတွေ ရှိလို့ ငြင်းဆန်လို့ မရဘူးလို့လည်း အလုပ်သမားတွေက ပြောပါတယ်။
“စက်ရုံက အရေးကြီးတယ်ဆို ပြန်လို့က မရတော့ဘူး၊ ပြန်ရင်လည်း ခေါင်းဆောင်တွေ ပြောဆိုနေတာ။ အဆောင် မှာ နေရသူက ပြန်မှ ချက်ရပြုတ်ရ၊ မီးကလည်း မလာ၊ ညနက်တော့ ဝယ်ရခြမ်းရလည်း အဆင်မပြေနဲ့မို့ ညနက် အလုပ်ဆင်း ရတာတွေက အဆင်မပြေဘူး။ အခုဟာက စက်ရုံအခက်အခဲက အရင် ၊ ကိုယ့်ဒုက္ခက နောက်မှ ဖြစ် နေတယ်။ အရမ်းလည်း ပင်ပန်းနေတယ်။ ” လို့ ပြောပါတယ်။
New Plus စက်ရုံက တရုတ်နိုင်ငံသားပိုင်ဖြစ်ပြီး ရွှေပြည်သာမြို့နယ်၊ သာဓုကန်စက်မှုဇုန်က ကျောက်စိမ်းလမ်းမှာ ရှိပါတယ်။ အလုပ်သမား ၁၀၀၀ ဝန်းကျင်နဲ့ Feel Sky ၊ WOOLLYTEC၊ စတဲ့ အထည်တွေ၊ တခြား ကုတ်အင်္ကျီတွေ ချုပ်လုပ်နေတယ်လို့ သိထားပါတယ်။ Myanmar Labour News က နောက်ဆုံး ရရှိထားတဲ့ အချက်အလက်တွေ အရ LKM ၊ Global Work ၊ HEAR လို တံဆိပ် အထည်တွေလည်း ချုပ်လုပ်နေပါတယ်။
