Myanmar Yangon Richang Apparel Co.,Ltd (Nisho) ပိုင် အထည်ချုပ်စက်ရုံမှာ ပုံမှန် အချိန်ပို အပြင် ညနက်နဲ့ မိုးလင်း အချိန်ပိုတွေပါ လုပ်ကိုင်ပေးနေရတယ်လို့ အလုပ်သမား တွေက မြန်မာနိုင်ငံကုန် ထုတ်နှင့်စက်မှုလက်မှု အလုပ်သမားများအဖွဲ့ချုပ် (IWFM)ကို ပြောပါတယ်။
“ အဲဒီ စက်ရုံမှာက တနေ့ အချိန်ပို ပုံမှန်က ၃ နာရီ၊ တနင်္လာကနေ သောကြာအထိက ည ၁၂ နာရီအထိ အချိန်ပို ဆင်းရတယ်။ ဒါ့အပြင် စနေနဲ့ တနင်္လာနေ့တွေမှာ မိုးအလင်း အချိန်ပိုတွေပါ ဆင်းနေရတာကို တွေ့ရတယ်။” လို့ IWFM တာဝန်ရှိသူက ပြောပါတယ်။
အချိန်ပိုတွေ မဖြစ်မနေဆင်းရပြီး ရက်လကြာလာသည်နှင့်အမျှ အလုပ်သမားတွေမှာ အိပ်ရေးမဝတာ ကျန်းမာရေး ချို့တဲ့ လာတယ်လို့ ပြောပါတယ်။ ဒီကျန်းမာရေးကိစ္စတွေဖြေရှင်းရလို့ ကုန်ကျစာရိတ်များပြားလို့ လုပ်ခလစာဝင်ငွေပါလျှော့ကျ နေတယ်လို့ အလုပ်သမားတွေက ပြောပါတယ်။
“အချိန်ပိုများတော့ ခေါင်းမကြည်ဘူး။ လန်းလန်းဆန်းဆန်းလည်း မဖြစ်ဘူး။ နေထိုင်မကောင်းတွေဖြစ်တယ်။ အိုတီခကလည်း ရတာနည်းတယ်။ ကျန်းမာရေးအတွက် အစားအသောက်ပြန်ဝယ်စားရနဲ့ ဘာမှမထူးဘူး.” လို့ အလုပ်သမားတဦးက Myanmar Labour News ကို ပြောပါတယ်။
လုပ်သင်ဆိုပြီး ၁၃/၁၄/၁၅ အရွယ် ကလေးလုပ်သားတွေ ခန့်ထားပြီး လုပ်သက်သုံးလပြည့်လည်း အတည်ပြုခန့်ထားမပေးဘဲ တခြားအလုပ်သမားနည်းတူ အချိန်ပိုတွေလုပ်ကိုင်နေရတယ်လို့ အလုပ်သမားတွေက ပြောပါတယ်။
အလုပ်သင်ဆိုပြီး ၁၃၊၁၄၊၁၅အရွယ် ကလေးလုပ်သားတွေလဲ အများကြီးခေါ်ခိုင်းနေတယ်။ နေ့စားအလုပ်သမား တွေရော ကလေးတွေရာ အချိန်ပိုဆင်းရတယ်။ မဆင်းလို့မရဘူး။ လုက်သက် သုံးလပြည့်လည်း နေ့စားပဲ လုပ်ရတယ်။ ဘာအခွင့်အရေးမှမရတာ.” လို့ ပြောပါတယ်။
ဥပဒေမှာ ပြဌာန်းထားတဲ့ ခွင့်ရက်တွေနဲ့ လူမှုဖူလုံရေး ဆေးခွင့်တွေမပါ မပေးတဲ့ အပြင် အလုပ်မလာနိုင်တဲ့ ရက်တွေကို ရက်ပျက်သတ်မှတ်ပြီး ခံစားခွင့်တွေကိုပါ ဖြတ်တောက်နေတယ်လို့ အလုပ်သမားတွေက ပြောပါတယ်။
“ခွင့်လည်းမရ ၊ ရက်ပျက်ဆိုပြီး ဒေးကြေး ၁၁၀၀၀ ၊ ရက်မှန်ကြေး ၄၀၀၀၀ နဲ့ တခြားခံစားခွင့်တွေပါ အဖြတ်ခံရတယ်။ ဂိတ်ပတ်စ်ဆို ဘာလောက်အရေးကြီး မရဘူး။ အရေးပေါ်ဖြစ်လည်း မသိရဘူး။ အကုန်လုံးနစ်နာရတယ်။” လို့ အလုပ်သမားတွေက ပြောပါတယ်။
စက်ရုံ ထမင်းစားဆောင်မှာ ထမင်းစားခုံ အလုံအလောက် မရှိလို့ အောက်မှာထိုင် စားသောက်ပြီး စက်ရုံတာဝန်ရှိသူတွေဘက်က ပြင်ဆင်ဆောင်ရွက်ပေးတာမရှိဘူးလို့ အလုပ်သမားတွေက ပြောဆိုပါတယ်။
Myanmar Yangon Richang Apparel Co.,Ltd (Nisho) စက်ရုံက ရန်ကုန်မြို့၊ လှိုင်သာယာမြို့နယ်၊ ရွှေလင်းဗန်း စက်မှုဇုန်၊ ဦးရေပေါလမ်းမှာ ဖွင့်လှစ်ထားတဲ့ တရုတ်နိုင်ငံသားပိုင် စက်ရုံဖြစ်ပါတယ်။ အလုပ်သမား ၈၀၀ ဝန်းကျင် လုပ်ကိုင်နေပြီး လက်ရှိ American Holic, Calelf Class တံဆိပ်အထည်တွေ ချုပ်လုပ်နေပါတယ်။
