လုပ်ခတိုးမြှင့်ပေးဖို့ တောင်းဆိုမှု ၁၀ ရက် အထိ ရှိလာပြီ ဖြစ်ပေမဲ့ ညှိနှိုင်းမှုတွေ မပြီးပြတ်သေးဘူးလို့ Myanmar Fala Fala အထည်ချုပ်အလုပ်သမားတွေက ပြောပါတယ်။ ဇူလိုင် ၁၇ ရက်ကတည်းက လုပ်ခ ရက်တွက် ဒေးကြေး နဲ့ အချိန်ပိုကြေး တွေ တိုးမြှင့်ပေးဖို့ တောင်းဆိုနေတာဖြစ်ပါတယ်။
“တောင်းထားတဲ့ အထဲက တနင်္ဂနွေနေ့ကို လုပ်ခ ကျပ်တသောင်းပေဖို့ကို လိုက်လျောတယ်။ နောက်ရက်မှန်ကြေး ရှေ့ဘော နောက်ဘော သတ်မှတ်ပေးဖို့လည်း အဆင်ပြေတယ်။ ညနေ ၄ ခွဲ ဂိတ်ပတ်စ် ယူပြန်တာ ရက်မှန်ကြေး မဖြုတ်ဖို့လည်း အဆင်ပြေတယ်။ ဒေးကြေး ၁၂၀၀၀ နဲ့ အိုတီ ၂၇၀၀ ပေးဖို့တော့ စက်ရုံဘက်က လုံးဝ မလိုက် လျှောဘူး ဖြစ်နေတယ်” လို့ အလုပ်သမားတွေက ပြောပါတယ်။
လက်ရှိ ဒေးကြေး ကျပ် ၁၀၀၀၀နဲ့ အိုတီကြေး တစ်နာ ကျပ် ၂၁၀၀ ပဲ ရရှိလို့ တိုးမြှင့်ပေးဖို့တောင်းဆိုနေတာလို့ ပြောပါတယ်။ တောင်းဆိုချက်တွေ မလိုက်လျှောနိုင်ပါက ဥပဒေတိုင်း လျှော်ကြေးပေး အလုပ်ထုတ်ဖို့ အလုပ်သမားတွေက ညှိနှိုင်းပေမဲ့ စက်ရုံဘက် လက်မခံဘူးလို့လည်း ပြောပါတယ်။
“ဒေးကြေး၊ အိုတီတွေကလည်း စက်ရုံက လုံးဝ အညှိမခံဘူး ဖြစ်နေတယ်။ တောင်းဆိုမှု ရက်ကြာလာတာနဲ့ ညှိနှိုင်းမှုတွေ အဆင်မပြေတော့၊ ဆက်ပြီး အလုပ်လုပ်ဖို့က ခက်နေတယ်။ အဲ့ကြောင့် အလုပ်ထုတ်ဖို့ ပြောရတာပါ။ စက်ရုံကလည်း အလုပ်ရက် ၁၆ ရက်အတွက် ယူပြီးထွက်ချင်ထွက်၊ မထွက်ရင် အလုပ်ဝင် ဆိုပြီးပြောနေတာ။” လို့ ပြောပါတယ်။
တောင်းဆိုမှု ပြုလုပ်နေတဲ့ ၉ ရက်ကြာ ကာလအတွင်း စက်ရုံဘက်က မော်တော်ယာဉ်တွေနဲ့ ပိတ်ဆို့တာ၊ သံဇကာတွေနဲ့ ကာရံတွေ ဆောင်ရွက်ခဲ့လို့ အလုပ်သမားတွေမှာ သောက်ရေနဲ့ သန့်စင်ခန်း အသုံးပြုဖို့ အခက်အခဲတွေနဲ့ ကြုံခဲ့ရတယ်လို့ ဆိုပါတယ်။ ဒါ့အပြင် အလုပ်ရှင်နဲ့ အလုပ်သမားကြား ညှိနှိုင်းမှုတွေကို တိုင်းအလုပ်သမားရုံးမှာ အကြိမ်ကြိမ် ပြုလုပ်ခဲ့ပေမဲ့ အဆင်ပြေမှု မရခဲ့တာလို့ အလုပ်သမားတွေက ပြောပါတယ်။
“လာမဲ့ တနင်္လာနေ့မှာ တိုင်းရုံးမှာ ထပ်ညှိမယ်လို့တော့ ပြောနေတယ်။ ပြီးပြတ်ဖို့တော့ မျှော်လင့်ထားတယ်။ ဘာတွေ ဖြစ်လာမယ်ဆိုတာ မသိနိုင်တော့ဘူး” လို့ တောင်းဆိုမှု ပါဝင်နေတဲ့ အမျိုးသမီး အလုပ်သမားတဦးက ပြောဆိုပါတယ်။
Myanmar Fala Fala Clothing အထည်ချုပ်စက်ရုံက သာဓုကန်စက်မှုဇုန်၊ မြလမ်းမှာ ရှိပြီး လုပ်သား ၂၀၀၀ ဝန်းကျင် လုပ်ကိုင်နေပါတယ်။ လက်ရှိ ကနေဒါနိုင်ငံအခြေစိုက် ကုန်အမှတ်တံဆိပ် အထည်တွေကို ချုပ်လုပ်နေတယ်လို့ Myanmar Labour News က သိထားပါတယ်။
