Myanmar Dongxin အထည်ချုပ်စက်ရုံက ပုတ်ပြတ် လုပ်သားတွေရဲ့ လစာကို လျှော့ချ မယ်ဆိုပြီး ပြောဆိုနေတယ်လို့ အလုပ်သမားတွေက ပြောပါတယ်။
“သူဌေးမိန်းမ စကားပြန်က ပြောတာ။ ပုတ်ပြက် အလုပ်သမားတွေကို ပေးတဲ့ လုပ်ခတွေကို လျော့မယ်။ အဲဒါကို မီတင်ခေါ်ပြောခဲ့တာ။ မကျေနပ်လည်း တိုင်ချင်တဲ့နေရာ တိုင်လို့ ပြောတယ်။ သူတို့ ပေးမှဖြစ်တာလို့လည်း ပြောတယ်။” လို့ ပြောပါတယ်။
မေလ လစာကနေ့လျှော့မှာ ဖြစ်ပြီး ပုတ်ပြတ်လုပ်သား ၁၀၀ လောက် လုပ်ကိုင်နေတယ်လို့ အလုပ်သမား တွေက ပြောပါတယ်။ ပုတ်ပြတ်လုပ်ကိုင်သူတွေက တရက် အလုပ်ချိန် ၈ နာရီအတွက် လစာ သတ်မှတ်ထားတာဖြစ်ပြီး အချိန်ပိုခ သီးခြားရရှိတာလို့ အလုပ်သမားတွေက ပြောပါတယ်။
Myanmar Dongxin အထည်ချုပ်စက်ရုံမှာ လူဦးရေ (၁၀၀၀) ဝန်းကျင် လုပ်ကိုင်နေပြီး လုပ်သား အများစုက ဒေးကြေးနဲ့ လုပ်ကိုင်သူတွေလို့ သိရပါတယ်။ စက်ရုံမှာ မီးစက်ပျက်လို့ အလုပ်သမားတွေကို ပြန်လွှတ်ပေးပေမဲ့ အဲဒီနေ့အတွက် ဒေကြေးကို ဖြတ်တောက်တယ်လို့ အလုပ်သမားတွေက ပြောပါတယ်။
“အလုပ်သမားရုံးတွေဆိုတာ သူဌေးတွေက ငွေပေးရင် အေးဆေးပဲ၊ ကြိုက်တဲ့ နေရာတိုင်လို့ ပြောထားတော့ ။ အလုပ်သမားတွေက အလုပ်လုပ်ရပြီး နစ်နာမှာကို ကြောက်ကြတာပါ။” လို့ ပြောပါတယ်။
Myanmar Dongxin Garment Co.,Ltd စက်ရုံက ရန်ကုန်မြို့၊ လှိုင်သာယာစက်မှုဇုန် ၃၊ နဝဒေးမင်းကြီးလမ်းမှာရှိပြီး တရုတ်နိုင်ငံသားပိုင် စက်ရုံဖြစ်ပါတယ်။
