Max Technology (နားကြပ်စက်ရုံ)တွင် အလုပ်သမားများ ငြိမ်းချမ်းစွာဆန္ဒပြနေစဉ် အလုပ်သမားတစ်ဦးအား စက်ရုံတာဝန်ရှိသူ နိုင်ငံခြားသား တရုတ်နိုင်ငံသားက ကိုယ်ထိလက်ရောက် ကျူးလွန်ခဲ့တယ်လို့ အလုပ်သမားတွေက ပြောပါတယ်။
“အလုပ်သမားအမျိုးသမီးတွေကို စောင့်တွန်းတယ်၊ ပါးရိုက်ဖို့ ရွယ်တယ် အဲ့လိုတွေ။ တယောက်ဆို ဒဏ်ရာရသွားတယ်” လို့ အမျိုးသမီး အလုပ်သမားတဦးက ပြောပါတယ်။
မတ် ၂၀ ရက် ညနေ 3နာရီခွဲမှာ ဒေးကြေး ၁၂၀၀၀နဲ့ ရက်မှန်ကြေး ၅၀၀၀၀ တိုးပေးဖို့နဲ့ ခွင့်ရက်၊ ခွင့်ခံစားခွင့်တွေ ပေးဖို့ အလုပ်သမားတွေက တောင်းဆို ဆန္ဒပြခဲ့တာလို့ အလုပ်သမားတွေက ပြောပါတယ်။ မတ် ၂၁ မှာ စက်ရုံအတွင်းညှိနှိုင်းမှုတွေ ပြုလုပ်ခဲ့ပေမဲ့ အဆင်မပြေခဲ့လို့ အလုပ်သမားတွေက ဆက်လက်တောင်းဆိုမှု ပြုလုပ်စဉ် စက်ရုံတာဝန်ရှိသူက ကိုယ်ထိလက်ရောက် ကျူးလွန်ခဲ့တာလို့ အလုပ်သမားတွေက ပြောပါတယ်။
” ညှိနှိုင်းမှုအဆင်မပြေတော့ မိန်းချပြီး တောင်းဆိုမှု ဆက်လုပ်ခဲ့တာ။ မိန်းခလုပ်ချတဲ့ အမျိုးသမီး အလုပ်သမား ကို အဲ့ တရုတ်ဆရာက ဂုတ်ဆွဲပြီး ရင်ဘတ်ကို ၂ ချက်တွန်းလိုက်တာ။ အဲ့လိုတွန်းလို့ အလုပ်သမားက အပူချောင်းနဲ့ထိပြီး အပူလောင်သွားတယ်။ ဖူလုံရေးဆေးခန်းမှာ ဆေးစာအုပ်နဲ့ ပြထားရတယ်။ “ လို့ အလုပ်သမားတဦးက ပြောပါတယ်။
Max Technology စက်ရုံမှာ အလုပ်သမား ၁၃၀၀ ကျော်ရှိပြီး တောင်းဆိုဆန္ဒပြမှာ အလုပ်သမား အားလုံးပါဝင်နေတယ်လို့ အလုပ်သမားတွေက ပြောပါတယ်။ စက်ရုံက ရန်ကုန်မြို့၊ ရွှေပြည်သာမြို့နယ်၊ ဝါးတရာ စက်မှုဇုန်မှာ ဖွင့်လှစ်ထားပြီး အီလက်ရောနစ် ပစ္စည်းတွေ ထုတ်လုပ်နေတယ်လို့ အလုပ်သမားတွေက ပြောထားပါတယ်။
