Joy Time အထည်ချုပ် စက်ရုံမှာ လုပ်အားခ တိုးမြှင့်ပေးဖို့ လုပ်သားတွေ တောင်းဆိုမှုက ဇွန်လ ၂ ရက်မှာ နှစ်ဖက်ညှိနှိုင်းပြီး ပြေလည်မှုရရှိခဲ့တယ်လို့ သွေးစည်းညီညွတ်သောသမဂ္ဂများအဖွဲ့ချုပ် STUM က ထုတ်ပြန်ထားပါတယ်။
စက်ရုံ အလုပ်သမားတွေက အနည်းဆုံး အခကြေးငွေ တိုးမြှင့် ဖို့ မေလ ၃၀ ရက် ညနေ့ပိုင်းက စတင် တောင်းဆိုခဲ့ ကြတာပါ။ တောင်းဆိုမှုမှာ အလုပ်သမားအားလုံး ပါဝင်ခဲ့ပြီး ၃ ရက်ကြာပြီးနောက် အလုပ်ရှင်နဲ့ အလုပ်သမားကြား သဘောတူချက် ရရှိခဲ့တာ ဖြစ်ပါတယ်။
အလုပ်သမားတွေက ဒေးကြေး ၁၃,၀၀၀၊ အချိန်ပိုကြေး ၂၅၀၀ နဲ့ ရက်မှန်ကြေး ၆၀,၀၀၀ ရရှိဖို့ တောင်းဆို ခဲ့ကြပြီး နှစ်ဖက် သဘောတူချက်အရ ဒေးကြေး ၁၁,၅၀၀ ကျပ်၊ အချိန်ပိုကြေး ၂,၂၀၀ နဲ့ ရက်မှန်ကြေး ၅၀,၀၀၀ ကို အလုပ်သမားတွေ ခံစားခွင့်ရမှာ ဖြစ်ပါတယ်။
Joy Time (Myanmar) Garment စက်ရုံက ရန်ကုန်မြို့၊ ရွှေပြည်သာမြို့နယ်၊ ဝါးတစ်ရာစက်မှုဇုန်၊ ဗိုလ်တိုက်ချွန်းလမ်းမှာ ဖွင့်လှစ်ထားပြီး XSide ၊ SOUTHBLUE၊ LC WAIKIKI ၊ mavi စတဲ့ တံဆိပ်အထည်တွေ ချုပ်လုပ်နေတဲ့ CMP စက်ရုံဖြစ်ပါတယ်။
