ရန်ကုန်၊ ရွှေပြည်သာစက်မှုဇုန် ၃၊ မင်းကြီးမဟာမင်းခေါင်လမ်းနှင့် ဦးဖိုးလှိုင်လမ်း မှာရှိတဲ့ Wan He Shou Fashion Co;Ltd အထည်ချုပ်စက်ရုံမှာ HR မန်နေဂျာကိုအလုပ်ထုတ်ပေးဖို့ အပါအဝင် တောင်းဆိုချက် ၅ ချက်ကို အလုပ်သမားတွေတောင်းဆိုနေပါတယ်။
၂၀၂၄ ဒီဇင်ဘာမှာ စက်ရုံဖွင့်လှစ်ခဲ့တာဖြစ်ပြီး Sinsay အမှတ်တံဆိပ်ချုပ်ကာ အလုပ်သမား ၆၀၀ ကျော်နဲ့ လုပ်ငန်းလုပ်ကိုင်နေတာဖြစ်ပြီး တောင်းဆိုမှုမှာပါဝင်တဲ့ လိုင်းခေါင်းဆောင်တွေကို အလုပ်ထုတ်ဖို့ ကြိုးပမ်းနေတယ်လို့ STUM က ဖော်ပြထားပါတယ်။
"OTခေါ်လို့ ဆင်းရင် မုန့်၊အအေး မကြွေးဘူး၊ထမင်းလဲ မမှာပေးဘူး။Day ကြေး တန်းတူ မပေးဘူး၊OTကြေး မပေးဘူး။ထမင်းဖိုး ၃,၀၀၀ကျပ်ပေးပြီး ကိုယ့်ဘာသာ မှာစားရတယ်။အောနိုက်၊အောလင်းအမြဲခေါ်တယ်။ ပထမ မန်နေဂျာတွေ တုန်းက ဒီလို မဟုတ်ဘူး၊မုန့်ကြွေးတယ်။ထမင်းမှာပေးတယ်။ခုမန်နေဂျာကတော့ ထမင်းဖိုး ၃၀၀၀ဘဲပေးတယ်၊အပြင်လဲပေးမထွက်ဘူး၊လစာထုတ်ရက်ဆိုလည်း အမြဲ ၇:၃၀ နာရီမှ ပြန်ရတယ်။ပြီးတော့ စနေနေ့တိုင်းအောလင်း ဆင်းရတယ်လို့ လုပ်သမားတွေက STUM ကိုပြောထားပါတယ်။
အလုပ်သမားတွေတောင်းဆိုထားတဲ့အချက် ၅ ချက်ကတော့ HR မန်နေဂျာ အား အလုပ်ထုတ်ပေးရန်၊ အောလင်း၊အောနိုက် အချိန်ပိုများ မတရား မခေါ်ရန်၊ အချိန်ပို ဆင်းရလျှင် ထမင်း၊အစားအသောက်စီစဥ်ပေးရန်၊ အိမ်သာများ ပြန်လည်ပြုပြင်ပေးရန်၊ လစာထုတ်ရက်များတွင် ၄ နာရီခွဲ ပြန်လွှတ်ပေးရန်စတဲ့အချက်တွေဖြစ်တယ်လို့ သိရပါတယ်။
