လှိုင်သာယာမြို့နယ် ၊ တွင်းအသင်းတိုက်ဝန် ဦးထွန်းညိုလမ်းမှာ ဖွင့်လှစ်ထားတဲ့ He Me T garment မှာ အလုပ်လုပ်ကိုင်နေတဲ့ အမျိုးသားအလုပ်သမားဦးရေကို အောက်တိုဘာလ (၂) ရက်မှာ စစ်တပ်က လာရောက်ကောက်ယူသွားတယ်လို့ အလုပ်သမားတွေက ပြောပါတယ်။
ဒီကနေ့ စစ်တပ်ရဲ့ စာရင်းကောက်ယူတာခံရတဲ့ He Me T garment မှာတော့ အမျိုးသား လူဦးရေ (၂၀၀) ကျော် ရှိနေပါတယ်။ စက်ရုံကတော့ sinsay, OUTDOOR စတဲ့အမှတ်တံဆိပ်တွေကို ချုပ်လုပ် နေတာပါ။
“စစ်သား (၂၅) ယောက်လောက်ရှိတယ်။ လုပ်ငန်းခွင်ထဲထိ ရောက်လာတာ။ ပြီးတော့ ယောကျာ်းလေး အလုပ်သမားစာရင်းတွေ တောင်းတယ်။ သိရသလောက်တော့ စစ်မှုထမ်းဖို့ စာရင်းကောက်တယ် ပြောတယ်။ အလုပ်ရှင်ကလည်း ထုတ်ပေးလိုက်တယ်။ စစ်တပ်ကတော့ (၁၃) ရက်နေ့ကျရင် ထပ်လာမယ်လည်း ပြောသွားတယ်။ ကျွန်တော်တို့ကတော့ စိတ်ပူတယ်။ သူတို့က စစ်မှုထမ်းဖို့အတင်းလူစုနေတာဆိုတော့ အလုပ်ပဲ ဆက်လုပ်ရမလား။ နားရတော့မလား တွေးမရတော့ဘူး”လို့ He Me T garment ရဲ့ အမျိုးသား အလုပ်သမားတစ်ဦးက ပြောပါတယ်။
စစ်မှုထမ်းဥပဒေကို စတင်ကျင့်သုံးဖို့ ထုတ်ပြန်ကြေညာပြီးနောက်ပိုင်းမှာ အလုပ်သမားအများစုဟာ လုပ်ငန်းခွင်တွေက တိမ်းရှောင်တာတွေ ရှိခဲ့ဖူးပါတယ်။ လက်ရှိမှာတော့ လုပ်ငန်းခွင်တွေဟာ ပုံမှန်ပြန်လည် လည်ပတ်နေတာဖြစ်ပြီး စစ်တပ်ကတော့ စက်ရုံအလိုက် အမျိုးသားအလုပ်သမားစာရင်းတွေ ကောက်ယူတဲ့ အခြေအနေတွေ စတင်လာတာပဲ ဖြစ်ပါတယ်။
“စိတ်တော်တော်ပူတယ်။ သတင်းတွေဖတ်မိတာက ညဖက်အပြင်ထွက်တာတွေ၊ ဆိုင်ထိုင်တာတွေကိုပဲ အန္တရာယ်ရှိတယ်။ လူစုဆောင်းခံရမယ် ကြားမိတာပါ။ အခုမှ အလုပ်လုပ်နေရင်း စစ်မှုထမ်းဖို့ စာရင်းကောက်ခံရ တယ်ဆိုတော့ ကျွန်တော်တို့ ဘာဆက်လုပ်ရမလဲပေါ့။ အိမ်ကသိရင်တော့ ပြန်ခေါ်မှာပဲ။ ကျွန်တော်လည်း အခြေအနေကြည့်ပြီး တစ်ခုခုစီစဉ်ရမယ်တော့ တွေးမိတယ်”လို့ အထည်ချုပ် အလုပ်သမားတစ်ဦးက ပြောပါတယ်။
ပြည်တွင်းမှာ စစ်မှုထမ်းဥပဒေကို စတင်ကျင့်သုံးချိန်ကစပြီး စစ်ကောင်စီဟာ အသက် (၁၈) နှစ်ကနေ (၃၅) နှစ်အတွင်းက လူငယ်တွေကို နည်းမျိုးစုံနဲ့ ကန့်သတ်မှုတွေ လုပ်ဆောင်နေတာပါ။ စက်ရုံအများစုမှာတော့ အသက် (၂၀) ကျော် လူငယ်အများစု လုပ်ကိုင်နေကြတာပဲ ဖြစ်ပါတယ်။
