Handa 2 စက်ရုံမှာ အလုပ်သမားတွေ စုပေါင်းတောင်းဆိုမှု ပြုလုပ် နေတယ်လို့ သိရပါတယ်။ တောင်းဆိုမှုတွေက မတ်လ ၆ ရက်က စတင်ခဲ့တာဖြစ်ပြီး အလုပ်သမား တွေက အချက် ၁၀ ချက်ကို တောင်းဆိုထားတယ်လို့ သွေးစည်းညီညွတ်မှုဖြင့် မြန်မာနိုင်ငံ အထွေထွေ အလုပ်သမားသမဂ္ဂများ အဖွဲ့ချုပ် FGWM က ထုတ်ပြန်ထားပါတယ်။
အလုပ်သမားတွေက ဥပဒေပါခွင့်တွေ ပေးဖို့၊ အထည်ကြေးကို အထည်ထွက်နှုန်းအတိုင်းပေးဖို့၊ အထည်ကြေးတိုးပေးဖို့၊ ဒေးကြေး ၁၂,၀၀၀ ကျပ်နဲ့ အချိန်ပို ကြေး ၂,၅၀၀ ကျပ်အထိ တိုးပေးဖို့ ၊ ရက်မှန်ကြေး ၆၀,၀၀၀ ကျပ် တိုးပေးဖို့ ကိုယ်ဝန်ဆောင်တွေကို အလုပ်ဝန် လျော့ပေါ့ ညှာတာ ခိုင်းစေဖို့တွေအပါအဝင် အချက် ၁၀ ချက်ကိုတောင်းထားပါတယ်။
သောကြာနေ့ (မတ်လ ၆ ရက်)မှာ စက်လိုင်းဌာန (၃) ခုထဲက စက်လိုင်း (၂) က စတင် တောင်းဆိုခဲ့တာဖြစ်ပြီး စက်ရုံဘက်မှ ညှိနှိုင်းမပေးဘဲ တောင်းဆိုမှုကို ဦးဆောင်သည့် အလုပ်သမား ၂၁ ဦးကို ၂၀၂၆ ခုနှစ်၊ မတ်လ ၁၀ ရက်မှာ အလုပ်ထုတ်တဲ့ အသိပေး ကြေညာထားတယ်လို့ သိရပါတယ်။
မတ်လ ၁၁ ရက်မှာ ခေါင်းဆောင် အလုပ်သမား ၂၁ ဦးကို စက်ရုံအတွင်း ပေးမဝင်ပေမဲ့ လုပ်ငန်းခွင်အတွင်းမှာ အလုပ်သမားတောင်းဆိုမှုတွေ ဆက်လက်ပြုလုပ်နေတယ်လို့ မြန်မာနိုင်ငံ အထွေထွေအလုပ်သမားသမဂ္ဂများ အဖွဲ့ချုပ် (FGWM) ကထုတ်ပြန်ထားပါတယ်။
Handa 2 စက်ရုံက Handa Group စက်ရုံ (၄) ရုံထဲက တစ်ရုံဖြစ်ပြီး အလုပ်သမား ၃၀၀၀ ကျော် လုပ်ကိုင်နေတဲ့ တရုတ်နိုင်ငံသားပိုင် စက်ရုံလို့ သိရပါတယ်။ MADE စီမံကိန်းအဖွဲ့ဝင် စက်ရုံဖြစ်ပြီး ရန်ကုန်မြို့၊ လှိုင်သာယာမြို့နယ်၊ ရွှေလင်ဗန်းစက်မှုဇုန်၊ ဦးရွှေဘင်လမ်းနှင့် ဦးမြူး လမ်း ထောင့်မှာ လုပ်ငန်းလုပ်ကိုင်နေပါတယ်။
