တရုတ်နိုင်ငံသားပိုင် Hanboom(Myanmar) Garment Co.LTD အထည်ချုပ်စက်ရုံမှာ စနေ၊ တနင်္ဂနွေ ပိတ်ရက်တွေကိုပါ အချိန်ပိုခေါ်ယူနေတယ်လို့ အလုပ်သမားတွေက ပြောပါတယ်။
ဒီစက်ရုံကို လှိုင်သာယာမြို့နယ် ရွှေလင်ဗန်း စက်မှုဇုန်မှာ ဖွင့်လှစ်ထားတာဖြစ်ပြီး လုပ်သားအင်အားတစ်ထောင်ကျော်နဲ့ လုပ်ငန်းလည်ပတ်နေတာ ဖြစ်ပါတယ်။
အချိန်ပိုခေါ်ယူတာတွေကို နေ့စဉ်လုပ်ဆောင်နေပြီး စနေ၊ တနင်္ဂနွေ ပိတ်ရက်တွေမှာပါ နားရက်မရှိ လုပ်ငန်းလည်ပတ်နေတာပါ။
“သင်္ကြန်ပြီးကတည်းက ခေါ်နေတာပါ။ နားရက်မရှိတော့ အလုပ်သမားတွေက အဆင်မပြေတော့ဘူး။ ဒါပေမယ့် မပြောရဲဘူး ဖြစ်နေတယ်။ စက်ရုံမှာ WCCကော၊ သမဂ္ဂကော ရှိပေမယ့် စက်ရုံမှူးတွေ၊ All Superတွေ ဖြစ်နေတော့ ဘာမှ မပြောရဲကြဘူး”လို့ ယင်းစက်ရုံ အလုပ်သမားတစ်ဦးက ပြောပါတယ်။
စက်ရုံဘက်က အချိန်ပို ခေါ်ယူရာတွင် မနက် (၈) နာရီမှ ည(၈)နာရီ ၄၀ မိနစ်ထိ တနင်္လာမှ စနေနေ့တိုင်း နေ့စဉ် ခေါ်ယူနေပြီး တနင်္ဂနွေ ပိတ်ရက်တွေမှာတော့ မနက် (၈) နာရီမှ ညနေ (၄) နာရီထိ ခေါ်ယူနေတယ်လို့ သိရပါတယ်။
“စနေနေ့ဆို တစ်ခါတစ်လေ (၄) နာရီထိပဲ ဆင်းရပါတယ်။ လစာကတော့ (၄၈၀၀) နဲ့ပဲ တွက်ပေးတယ်။ အချိန်ပိုကြေးက (၁၂၀၀) နဲ့ ရှင်းပေးပါတယ်။ ညဘက်ဆင်းရတဲ့ရက်တွေမှာတော့ အချိန်ပိုကြေးအပြင် မုန့်ဖိုး (၅၀၀) ထပ်ပေးတယ်။ အသွားအပြန်ကိုတော့ ဖယ်ရီ စီစဉ်ပေးတယ်။ အခုက နားရက်မရှိဖြစ်နေပေမယ့် အပြင်မှာလည်း အလုပ်အကိုင် ရှားနေတော့ အလုပ်သမားတွေက ဘာမှမပြောရဲဘဲ ငြိမ်ခံနေရတယ်”လို့ သူက ပြောပါတယ်။
Hanboom အထည်ချုပ်စက်ရုံမှာ ပြီးခဲ့တဲ့ကာလတွေကလည်း အလုပ်ရှင်၊ အလုပ်သမား အငြင်းပွားတာတွေ ရှိခဲ့တယ်လို့ သိရပါတယ်။
#MyanmarLabourNews
