G-Yuan Packaging Material (Myanmar) စက်ရုံက အလုပ်သမားတဦး အတင်းအကျပ် အလုပ်ထုတ်ခံ ခဲ့ရတယ် လို့ သိရပါတယ်။ ပြီးခဲ့တဲ့ ၂၀၂၀ ခုနှစ်ကတည်းက ဖွင့်လှစ်ထားတဲ့ အဲဒီ စက်ရုံဟာ ကတ္ထူ၊ စက္ကူ စက်ရုံဖြစ်ပြီး ငမိုးရိပ်လမ်း၊ ဝါးတစ်ရာစက်မှုဇုန်မှာ လုပ်သား တရာဝန်းကျင်နဲ့ လုပ်ငန်း လည်ပတ်နေတယ်လို့ သိရပါတယ်။
အလုပ်ထုတ်ခံရတဲ့ Store/Driver အလုပ်သမားဟာ ဇန်နဝါရီ ၁ရက်က စက်ရုံတရုံကို ပစ္စည်းသွားရောက် ပို့ဆောစဉ် လက်ခံတဲ့ စက်ရုံက လုံခြုံရေးဝန်ထမ်းနဲ့ အခြေအတင်ဖြစ်ခဲ့တယ်လို့ သွေးစည်းညီညွတ်သောသမဂ္ဂများ အဖွဲ့ချုပ် STUM က ထုတ်ပြန်ထား ပါတယ် ။
အဲဒီလို အခြေအတင် ဖြစ်ပွားတဲ့အတွက် အလုပ်ထုတ်ခံခဲ့ရ အလုပ်သမားကို စက်ရုံပိုင်ရှင် အကိုနဲ့ စကားပြန်က ခံဝန် ထိုးခိုင်းခဲ့တယ်လို့ သိရပါတယ်။ ဖေဖော်ဝါရီ ၅ ရက် ညနေပိုင်းမှာတော့ အခြေအတင်ဖြစ်ပွားခဲ့လို့ စက်ရုံအော်ဒါ ထိခိုက် ဆုံးရှုံး နစ်နာမှု ဖြစ်ရပြီး တဘက် စက်ရုံကလည်း အလုပ်ထုတ်ဖို့ ဖိအားပေးခဲ့တဲ့အပြင် အလုပ်မထုတ်ပါက အဲဒီစက်ရုံဘက်က လက်တွဲလုပ်ဖို့ မဖြစ်နိုင်ဘူးလို့ ပြောကြားတယ် ဆိုပြီး Store/Driver အလုပ်သမားကို စက်ရုံတာဝန်ရှိသူတွေက အတင်းအကျပ် ထွက်စ ာတင်ခိုင်းခဲ့တယ်လို့ သိရပါတယ်။
“မီးခြစ်တောင်းတာကနေ အခြေအတင်ဖြစ်တာဆိုတော့ တန်းထုတ်ရလောက်အောင် မဟုတ်ဘူးလေ ။ ဘာဖြစ်တာလဲ ဆိုတာမျိုး သိအောင်လုပ်ဖို့ ။ နောက် ပထမ ဝမ်တိန်၊ ဒုတိယဝမ်တိန် ဆိုပြီး သွားရမှာ ။ အဲလို ဖြစ်တယ်ဆိုတိုင်း တန်းထုတ်လို့ မရဘူး “ လို့ သွေးစည်းညီညွတ်သောသမဂ္ဂများ အဖွဲ့ချုပ် STUM အဖွဲ့က ပြောပါတယ်။
အလုပ်သမားက ထွက်စာမတင်ပေးနိုင်ကြောင်းပြောဆိုခဲ့လို့. ထွက်စာမတင်လည်း စက်ရုံက အလုပ်ထုတ် လိုက်ပြီဖြစ်လို့ နောက်ရက်ကစ အလုပ်ဆင်းဖို့ မလိုတော့ဘူး ပြောဆို အလုပ်ထုတ် ခံခဲ့ရတာလို့ သိရပါတယ်။
“အလုပ်ထုတ်ခံရတဲ့ အလုပ်သမားက ရှေ့မှာ ဝမ်တိန်လည်းမရှိခဲ့ဘဲ တန်းထုတ်တယ် ၊ ပြဿနာတက်ခဲ့တယ် ဆိုတိုင်း ကိုယ့်လူအမှားပဲ မဟုတ်ဘူး ။ တဘက်လူ အမှားလည်း ဖြစ်နိုင်တာပေါ့ ။ ကိုယ့်ဆီက လူပဲ ထုတ်လိုက်မယ်ဆိုတာ မျိုးတော့ လက်မခံနိုင်ဘူး “ လို့ STUM အဖွဲ့က ပြောပါတယ်။
အလုပ်ထုတ်ခံခဲ့ရတဲ့ အလုပ်သမားဟာ လုပ်သက် ၂ နှစ်ကျော် လုပ်ကိုင်ထားပေမဲ့ လက်ရှိအချိန်အထိ ဒေးကြေး ၄၈၀၀ ကျပ် သာရရှိနေတယ်လို့လည်း သိရပါတယ်။ အလုပ်သမား ၁၀ ဦးနဲ့ အထက်ရှိ လုပ်ငန်းတွေက အလုပ်သမားတွေကို နေ့စဉ် အနည်းဆုံးအခကြေးငွေ ၄၈၀၀ ကျပ်အပြင် ထောက်ပံငွေ ၁၀၀၀ ကျပ်ကို ၂၀၂၃ ခုနှစ် အောက်တိုဘာလက စပြီး တိုးမြှင့်ပေးဖို့ အလုပ်သမားဝန်ကြီးဌာန ထုတ်ပြန်ထားပါတယ်။
