လက်ရှိ ဖြစ်ပေါ်နေတဲ့ Food Panda အစားအသောက်ပို့ဆောင်တဲ့ rider တွေအနေနဲ့ သူတို့ရဲ့ အော်ဒါကြေးပြောင်းလဲသတ်မှတ်သည့်ကိစ္စရပ်နှင့်ပတ်သက်ပြီး rider တွေနဲ့ စားသုံးသူတွေကပါ ပူးပေါင်းပြီး ဆန္ဒဖော်ထုတ်နေတာပါ။
Food Panda တာဝန်ရှိသူတွေကတော့ system error ဖြစ်တာကြောင့်လို့ အကြောင်းပြထားပြီး rider တွေ ရရှိတဲ့ ဝင်ငွေဟာ တစ်လကို ၃ သိန်းကျော်ရှိနေပြီး အနည်းဆုံးအခကြေးငွေထက်များတယ်လို့ ဆိုပါတယ်။
ယနေ့ နေ့လည် ၂ နာရီဝန်းကျင်မှာတော့ rider တွေနဲ့ ရုံးချုပ်ကတာဝန်ရှိသူတွေ တွေ့ဆုံကာညှိနှိုင်းသွားမယ်လို့ rider တွေက Myanmar Labour News ကိုပြောပါတယ်။
"အခုလက်ရှိမှာတော့ ကျတော်တို့ခေါင်းဆောင်ပိုင်း ၁၀ ယောက်နဲ့ ဒီနေ့ခင်း ၂ နာရီမှာ သွားတွေ့ဖို့ရှိပါတယ်ခဗျ ကျနော်တို့လိုချင်တာတွေနဲ့သူတို့ကို သွားပြီးတော့ ညှိနှိုင်း ဖို့ရှိပါတယ် ကျတော်တို့လိုချင်တာနဲ့ သူတို့ပေးနိုင်တာနဲ့ ပြန်ညှိမှာပေါ့ အဲ့လိုမျိုးပါ ၊ အခု rider ၁၀ ယောက်ကိုရွေးချယ်ထားပါတယ်။ ကျတော်တို့ လုံခြုံမှုကို အာမခံချက် တောင်းပြီးသားပါဗျ"လို့ သွားရောက်တွေ့ဆုံမယ့်အထဲမှာပါ ဝင်မယ့် rider တစ်ဦးက ဆိုပါတယ်။
ယခုလိုသွားရောက်တွေ့ဆုံ ညိနှိုင်းတဲ့ရလာဒ်ပေါ်မူတည်ပြီး ဆက်လက်လုပ်ဆောင်သင့်တဲ့အရာတွေကို rider တွေနဲ့ ဆွေးနွေးပြီး ဆုံးဖြတ်သွားမယ်လို့ ဆိုပါတယ်။
Food Panda အစားအသောက်ပို့ဆောင်ရေးလုပ်ငန်းက မြန်မာနိုင်ငံရှိ မြို့ပေါင်း ၁၉ မြို့ မှ စားသောက်ဆိုင်ပေါင်း ၃၀၀၀၀ ကျော်နဲ့လက်တွဲလုပ်ဆောင်နေပြီး အစားအသောက်ပို့ဆောင်ပေးသူ rider ၈၀၀၀ ကျော်ကို အလုပ်အကိုင်ဖန်တီးပေးထားတယ်လို့ ဆိုပါတယ်။
