တောင်ဒဂုန် စက်မှုဇုန်က Earth စက်ရုံမှာ ဒေးကြေးတိုးမြှင့်ပေးဖို့ တောင်းဆိုနေတယ်လို့ အလုပ်သမားတွေက ပြောပါတယ်။ လက်ရှိ ဒေးကြေး ၅၈၀၀ ပဲ ရရှိနေပြီး ကျပ် ၁၀၀၀၀ ကျော် တိုးပေးဖို့ ဒီကနေ့ မေ ၃ ရက်မှာ စတင်တောင်းဆိုနေတာလို့ အလုပ်သမားတွေက ပြောပါတယ်။
“ ဒေးကြေး ၅၈၀၀ ကနေ ကျပ် ၁၃၀၀၀ အထိ တိုးပေးဖို့ တောင်းနေတာပါ။ စက်ရုံက ETEC စက်ရုံ နဲ့ တစ်ဝန်းထဲပါ။ ရုံနာမည်ပဲ ကွဲတာ။” လို့ အလုပ်သမားတဦးက Myanmar Labour News ကို ပြောပါတယ်။
ETEC စက်ရုံအလုပ်သမား ၂၀၀၀ ကျော်ကလည်း မေ ၂ ရက်မှာ လုပ်ခတိုးမြှင့်ရေးကို အလုပ်ရပ် တောင်းဆို ခဲ့ကြပါတယ်။ Earth စက်ရုံ နဲ့ ETEC စက်ရုံ တွေဟာ အီလစ်ထရောနစ်စက်ရုံတွေဖြစ်ကြပြီး Earth စက်ရုံ အလုပ်သမား ၃၀၀ ဝန်းကျင်ကတော့ ဒီကနေ့ မေ ၃ ရက်မှာ လုပ်ငန်းရပ်တန့်တောင်းဆို နေကြတာပါ။
“မနက်ပိုင်းက ညှိနှိုင်းတယ်၊ အဆင်မပြေလို့ နေ့လယ်ပိုင်းမှာ ထပ်ပြီး ညှိတာ။ ခုချိန်ထိ မပြေလည် ဘူး” လို့ အလုပ်သမားတဦးက ပြောပါတယ်။
အလုပ်သမားတွေ တောင်းဆိုထားတဲ့ လုပ်ခထက် နည်းပါးတဲ့ ဒေးကြေးကျပ် ၇၀၀၀၊ ထောက်ပံ့ ကြေး ၁၂ဝဝ နဲ့ ရက်မှန်ကြေး ကျပ် ငါးသောင်းက တရက်ပျက်ပါက ကျပ် ၁၅၀၀၀ ပဲ ပေးမယ်ဆိုပြီး စက်ရုံဘက် ညှိနှိုင်းနေတာလို့ အလုပ်သမားတွေက ပြောထားပါတယ်။
Earth Industrial (Myanmar) Company Limited က ၁၉၉၇ ခုနှစ်မှာ ထည်ထောင်ခဲ့ပြီး အီလက်ထရွန်နစ် အစိတ်အပိုင်းတွေ ဆားကစ်ဘုတ် (PCB) တွေ ထုတ်လုပ်နေတယ်လို့ ထုတ်ပြန်ထားပါတယ်။ စက်ရုံကတော့ ရန်ကုန်မြို့၊ တောင်ဒဂုန် စက်မှုဇုန် ၁ ၊ ယောက်ကော်လမ်းမှာ ဖွင့်လှစ်လုပ်ကိုင်နေပါတယ်။
