Dong Yu အထည်ချုပ် စက်ရုံမှာ အချိန်ပို ညနက် ၁၁နာရီ အထိ ဆင်းခိုင်းပြီး မဆင်းပါက သတိပေး (ဝမ်တိန်) ထိုးခိုင်းတယ်လို့ အလုပ်သမားတွေက ပြောပါတယ်။ ညနက် အချိန်ပိုတွေအပြင် ရက်သတ္တပတ်ပိတ်ရက် တနင်္ဂနွေ အချိန်ပိုမဆင်းလျှင် ဂရိတ်ချမယ်ဆိုပြီး ခြိမ်းခြောက် ပြော အတင်းအကျပ် လုပ်ကိုင်ခိုင်းတယ်လို့ ပြောပါတယ်။
“ တနင်္ဂနွေ ဆင်းခိုင်းရင် ပိုက်ဆံ လက်ငင်း မရှင်းပေးဘူး။ ၃/ ၄ရက်ကြာမှ ရှင်းပေးတယ်။ ရက်ပျက်တော့ ဂရိတ်ချ တယ်။ ဝမ်တိန် ထိုးရတယ်။ အချိန်ပို ဆိုရင်လဲ ညတိုင်း ည ၁၁ နာရီ ခေါ်တယ်။ အထည် စံချိန်က ၁၀၀၀ ပေးရ တယ်။ စံချိန်မပြည့်တာနဲ့ အော်ဟစ်ပြီး တောင်းတယ်။ အထည်မနိုင်တဲ့ နေရာတွေကို ည ၁၁ နာရီ ထိ ဆက်ခေါ် တယ်။ တခါတလေ စနေနေ့မှာ အောလင်း ခေါ်တယ်။ ရက်ပျက်တာ၊ အိုတီ မဆင်းတာတွေကို ဂရိတ်ချတာ ရုံးပေါ်က လုပ်ခိုင်းတာလို့ ပြောတယ် " လို့ အလုပ်သမားတဦးက ပြောပါတယ်။
စက်ရုံ ရဲ့အလုပ်ချိန်က မနက် ၈နာရီမှ ညနေ ၆နာရီ ခွဲထိ ပုံမှန် အလုပ်ချိန်ဖြစ်ပြီး စနေနေ့တွင် ညနေ ၄နာရီ ခွဲ အထိ ဖြစ်ပေမဲ့ ညနက် ၁၁ နာရီ အထိ လုပ်ကိုင်နေရတာလို့ အလုပ်သမားတွေက ပြောတာပါ။ နေ့လည်စာ စားပြီးကတည်း နားချိန်မပေးဘဲ အချိန်ပို ည ၆ နာရီခွဲအထိ လုပ်ကိုင်ရတယ်လို့လည်း အလုပ်သမားတွေက ပြောပါတယ်။
" အချိန်ပိုတွေ နေ့တိုင်းဆင်း နေရတာ။ ပြီးတော့ လူရွေးခေါ်တာ။ မဆင်းချင်ဘူးလို ပြောရင်လဲ မရဘူး။ မဆင်းချင် အလုပ်ထွက်၊ ဂရိတ်ချမယ်ပြောတော့ မဆင်းချင်လဲ ဆင်းနေရတယ် ။ ဆင်းတော့လည်း အိပ်ရတာက အဆင်မပြေ ဘူး။ အလုပ်ပြီးတာနဲ့ မီးတွေပိတ်ထားတော့ ခြင်တွေကိုက်နဲ့ ၊ တချို့ကျ အထည်တွေကြား၊ ခုံတွေအောက် အိပ် ရတယ်။ မနက်ရေချိုးတော့ ယောကျာ်းလေးတွေကတော့ ကိစ္စ မရှိဘူး၊ မိန်းခလေးတွေကျတော့ အဆင်မပြေဘူး။ ညနက် အချိန်ပို အထိဆင်းပြီးလည်း နောက်နေ့ အလုပ်ပြန်ဝင်ခိုင်းတာ။ ပင်ပန်းတော့ အချိန်ပို မဆင်းချင်ဘူး ။ ခေါင်းဆောင်တွေက ပြောဆိုနေတော့ ဆင်းပေးရတယ်။ တခါ ဆင်းရရင် အလုပ်သမား ၁၀၀ ဝန်းကျင်။ တစ်လ အချိန်ပိုက နာရီ ၁၀၀ နီးပါး ရှိတယ်။” လို့ ပြောပါတယ်။
လုပ်ငန်းခွင်ထဲမှ သန့်စင်ခန်းသွားလိုပါက ကတ်ယူရပြီး သောက်ရေသန့်ကို အပြင်ကမှာယူပေမဲ့ သောက်ရေ ပြတ်လတ်တာတွေ မကြာခဏ ဖြစ်လို့ အလုပ်သမားတွေမှာ အခက်အခဲတွေရှိနေတယ်လို့ အလုပ်သမားတွေက ပြောပါတယ်။ စက်ရုံအတွင်း လုပ်ငန်းခွင်ညှိနှိုင်းဖြေရှင်းရေးအဖွဲ့ WCC ဖွဲစည်းထားမရှိလို့လည်း လုပ်ငန်းခွင်အဆင်မပြေမှုတွေ ပြောဆိုဖို့ အခက်အခဲ ဖြစ်နေရတယ်လို့ ပြောဆိုထားပါတယ်။
