Casico Garment Co.,Ltd အထည်ချုပ်စက်ရုံက ညလုံးပေါက် အချိန်ပိုကို နားချိန်မပေးဘဲ အတင်းအကျပ် လုပ်ကိုင်ခိုင်းတယ်လို့ အလုပ်သမားတွေက ပြောပါတယ်။ စက်ရုံဘက်က အချိန်ပို ညနက် ၈ နာရီခွဲ အထိလုပ်ကိုင်ခိုင်းသလို့ တချို့ရက်တွေမှာ ညလုံးပေါက် လုပ်ကိုင်ခိုင်းနေတယ်လို့ သိရပါတယ်။
“နံနက်၈နာရီ အလုပ်တက်ရပြီး ညနေ၆ခွဲ အလုပ်ဆင်းတော့ အနားလည်း မပေးဘူး အိုတီကို ည ၈ခွဲအထိ ဆက်ဆင်းပေးရတယ်။ အချိန်ပို မဆင်းချင်လဲ့ အောစူပါတွေက မဖြစ်မနေဆင်းပေးမယ်လို့ ပြောဆိုပြီး ဖိအားပေး ဆင်းခိုင်းတယ်။ စနေနေ့ဆို ညနေ ၆ နာရီကနေ ညလုံးပေါက်ကို မဆင်းမနေရ ဆင်းပေးရတယ်.”လို့ ပြောပါတယ်။
အရေးပေါ် ဂိတ်ပတ်စ် အလွယ်တကူ မရတဲ့ အပြင် ခွင့်ရက်နဲ့ ခွင့် ခံစားခွင့်တွေမပေးဘဲ ဒေးကြေးနဲ့ အခွင့်အရေးတွေ ဖြတ်တောက်ခံရတယ်လို့ ပြောပါတယ်။
"ဂိတ်ပတ်စ် မပေးတော့ နေ့ဝတ်နဲ့ အိမ်ပြန်ရတယ်။ အဲလိုဆို ဂရိတ်ကြေး ဖြတ်တယ်။ ခွင့်ရက်တွေ၊ ခံစားခွင့် မပေးဘူး။ ဆေးခွင့်လည်းမပေးဘူး။ အလုပ်ပျက်တယ်ဆိုပြီး ဒေးကြေး၊ ရက်မှန်ကြေး၊ ကျွမ်းကျင်ကြေးတွေ ဖြတ်တယ်။ စုစုပေါင်း ၆၀၀၀၀ လောက်ဖြတ်တာ။ “ လို့ ပြောပါတယ်။
လုပ်ငန်းတွင်း စက်လိုင်း မန်နေဂျာနဲ့ အောစူပါ တို့က ရိုင်းဆိုင်းစွာ ဆဲဆို စံချိန် တောင်းတယ်လို့လည်း အလုပ်သမားတွေက ပြောဆိုပါတယ်။
“အလုပ်သမား ၃ဝ လောက်ရှိတဲ့ စက်လိုင်းကို တစ်နာရီ ဘဲမွှေးထည် ၉၀အထိ တောင်းတယ်။ အလုပ်သမား တစ်ယောက်ကို သုံးပွိုင့်၊ လေးပွိုင့် ချုပ်မှ စံချိန်ရတယ်။ စက်လိုင်းမန်နေဂျာက နားမခံနိုင်အောင် ဆဲတယ်။ ေ-ာက် နဲ့ နှိုင်းတယ်။ အောစူပါကလည်း အတူပါပဲ အဲ့လိုတွေ ဆဲနေတာ။” လို့ ပြောပါတယ်။
Casico Garment Co.,Ltd အထည်ချုပ်စက်ရုံက ရန်ကုန်မြို့၊ လှိုင်သာယာမြို့နယ်၊ စက်မှုဇုန် ၃ ၊ ဆိပ်ကမ်းသာ လမ်းမှာ ရှိပြီး တရုတ်နိုင်ငံသားပိုင် စက်ရုံလို့ သိရပါတယ်။ အလုပ်သမား ၄၀၀ ဝန်းကျင်နဲ့ Lutique, Radwear တံဆိပ် ဘဲမွှေးထည်တွေ ချုပ်လုပ်နေတယ်လို့ အလုပ်သမားတွေက ပြောဆိုထားပါတယ်။
