တရုတ်နိုင်ငံသားပိုင် BOGART LINGERIE (yangon)တွင်အထည်စံချိန်တွေ အလွန်အကျွံတောင်းခံနေပြီးမပြည့်မီပါက ကျန်ရှိတဲ့အထည်ကိုအကြွေးမှတ်ကာ အလုပ်ချိန်မတိုင်ခင်ကြိုတင်ချုပ်လုပ်ခိုင်းနေတယ်လို့အလုပ်သမားတွေကပြောပါတယ်။
ဒီစက်ရုံကိုတော့လှိုင်သာယာမြို့နယ်၊ ရွှေသံလွင်စက်မှုဇုန်၊ မင်းဧရာလမ်း၊ အမှတ်၁၁၄ မှာဖွင့်လှစ်ထားတာဖြစ်ပါတယ်။
လုပ်သားအင်အားတစ်ထောင်ကျော်နဲ့လုပ်ငန်းလည်ပတ်နေတာဖြစ်ပြီးfemina bareအမှတ်တံဆိပ်တွေကိုချုပ်လုပ်နေတာဖြစ်ပါတယ်။လုပ်ငန်းခွင်မှာ သမဂ္ဂဖွဲ့စည်းထားတာမရှိဘူးလို့ သိရပါတယ်။
"စက်လိုင်းတစ်လိုင်းမှာစူပါ၊ ဟက်ပါ၊ စက်သမား၊ စာရေးမအပါမှလူ(၃၀)ရှိပါတယ်။အဲဒါကိုတစ်နာရီကိုအထည်စံချိန်(၅၀)တောင်းပါတယ်။အထည်စံချိန်ကိုစူပါတွေကလည်း အလုပ်ရှင်အကြိုက်လိုက်ပြီးမတရားတောင်းနေပါတယ်။သူတို့တောင်းတဲ့စံချိန်မပြည့်ရင်စူပါတွေကအထည်အကြွေးမှတ်ပြီးနောက်နေ့ဆိုအလုပ်မတက်ခင်အထည်အကြွေးချုပ်ပေးဖို့အောစူပါတွေကစက်လိုင်းထိပ်ကအော်ပြီးခိုင်းပါတယ်။အထည်စံချိန်တောင်းရင်လည်းဆဲဆိုပါတယ်။ရိုင်းရိုင်းစိုင်းစိုင်းပြောပါတယ်။လူတစ်ယောက်ကစက်နှစ်လုံးလောက်ချုပ်ရပါတယ်။QC တွေကိုလည်းကြောက်ရပါတယ်။ပဲထည်ကျရင်လည်းအပြောခံရပါတယ်။ပဲထည်မထိအောင်ထိန်းချုပ်ရင်လည်းစံချိန်မရလို့ဆဲခံရပါတယ်။ရုံပေါ်ခေါ်ပြီးဝမ်တိန်ထိုးရပါတယ်။ခြိမ်းခြောက်ပြောဆိုခံရပါတယ်"လို့စက်ရုံအလုပ်သမားတစ်ဦးကပြောပါတယ်။
စက်ရုံမှာအလုပ်ချိန်ကိုနံနက်(၇)နာရီခွဲကနေည(၇)နာရီ၁၅မိနစ်အထိပုံမှန်ဆင်းရပြီးအချိန်ပိုအိုတီတွေကိုလည်းအလုပ်သမားတွေသဘောတူညီချက်မမေးဘဲ ရုံးပေါ်ကမိုက်အသုံးပြုကာအလုပ်သမားရုံးကခွင့်ပြုချက်နဲ့ခေါ်တာလို့အော်ပြောတယ်လို့သိရပါတယ်။
အချိန်ပိုမဆင်းရတဲ့အလုပ်သမားတွေကိုအလုပ်ချိန်ပြီးခါနီးမှအချိန်ပိုမခေါ်တာအသိပေးပြီးဖယ်ရီကားမပေးဘဲမိမိအစီအစဉ်နဲ့ပြန်ခိုင်းနေတာဖြစ်ပါတယ်။
"အဝေးကအလုပ်သမားတွေအချိန်ပိုမဆင်းရလည်းဖယ်ရီမစီစဉ်ပေးဘူး။ကိုယ့်ဘာသာပြန်ချင်ပြန်မပြန်နိုင်ရင်အိုတီသမားတွေဆင်းမှပြန်ရပါတယ်။ရုံးပိတ်ရက်တွေ၊ အခါကြီးရက်ကြီးတွေလည်းအချိန်ပိုတွေမဖြစ်မနေဆင်းခိုင်းပါတယ်။တန်ဆောင်မုန်းလပြည့်နေ့လည်းမဖြစ်မနေအလုပ်ဆင်းရပါတယ်။ခွင့်ခံစားခွင့်တွေလည်းဘာမှမရပါဘူး။နေမကောင်းရင်လည်းဆေးခန်းကလက်မှတ်ထိုးပေးမှပြန်ရပါတယ်။ဆေးခန်းကလည်းဖျားနာပြီးသတိလစ်မှပြန်လွှတ်တာပါ။ညနေ(၄)နာရီအလုပ်ပြီးလို့ပြန်လွှတ်ရင်လည်းဂိတ်ပတ်စာရွက်နဲ့ပြန်ရပါတယ်။ဂိတ်ပတ်က(၁၅)ယောက်လောက်ကိုပေါင်းပြီးမှဖြတ်ပေးတာပါ။လုံခြုံရေးကလည်း(၁၅)ယောက်မပြည့်ရင်ပြန်မလွှတ်ပါဘူး။တစ်ချို့ဆိုမိနစ်(၂၀),လောက်စောင့်ပြီးမှအပြင်ထွက်ရပါတယ်"လို့စက်ရုံအလုပ်သမားတစ်ဦးကပြောပါတယ်။
စက်ရုံမှာအလုပ်ရှင်၊ အလုပ်သမားသဘောတူညီချက်နဲ့ချုပ်ဆိုရတဲ့အလုပ်ခန့်ထားမှုဆိုင်ရာသဘောတူစာချုပ်ကိုမချုပ်ရသေးတဲ့အလုပ်သမားအများအပြားရှိနေပြီးအလုပ်ရှင်ဘက်ကငွေကြေးဖြတ်တောက်တာတွေကိုလည်းအလုပ်သမားတွေသဘောတူညီမှုမရှိဘဲလုပ်ဆောင်နေပါတယ်။
"ဂိတ်ပေါက်မှာကြာနေရင်ဖယ်ရီကမစောင့်ဘူးထွက်ပါတယ်။အဲဒီတော့ကိုယ့်ဘာသာပြန်ရပါတယ်။နောက်စက်ရုံမှာရှောင်တခင်ခွင့်ယူလည်းထောက်ခံချက်တောင်းပါတယ်။နောက်ပြီးဒေးကြေး၊ထောက်ပံ့ကြေး၊ရက်မှန်ကြေးတွေကိုတပြေးညီမပေးပါဘူးဂရိတ်ခွဲပြီးပေးပါတယ်။ရက်မှန်ကြေးဆိုရင်တစ်သောင်းခွဲလေးသောင်းထိပေးပါတယ်"လို့အလုပ်သမားတစ်ဦးကပြောပါတယ်။
စက်ရုံအလုပ်သမားတွေအနေနဲ့လုပ်ငန်းခွင်းကချိုးဖောက်ခံရတာတွေကိုမြန်မာနိုင်ငံကုန်ထုတ်နှင့်စက်မှုလက်မှုအလုပ်သမားများအဖွဲ့ချုပ်(IWFM)ကိုဆက်သွယ်အကူအညီတောင်းခံထားတာဖြစ်ပါတယ်။
အလုပ်သမားတွေအနေနဲ့ဥပဒေပါခံစားခွင့်များရရှိရေး၊ အလုပ်သမားများသဘောတူညီမှုမရှိဘဲပိုက်ဆံမဖြတ်တောက်ရေး၊ အလုပ်သမားများချုပ်နိုင်စွမ်းရှိတဲ့အထည်စံချိန်တောင်းခံရေး၊တစ်ဖက်သတ်တောင်းခံနေတဲ့စံချိန်တွေကိုအထည်အကြွေးမသတ်မှတ်ရေး၊အောစူပါတွေဆဲဆိုတာနဲ့ရိုင်းစိုင်းစွာမလုပ်ဖို့တားမြစ်ပေးရေး၊ နေ့ထူးနေ့မြတ်တွေမှာအချိန်ပိုမခေါ်ရေးနဲ့ဖယ်ရီအခက်အခဲကိုဖြေရှင်းပေးရေးစတာတွေကိုလိုလားနေတာဖြစ်ပါတယ်။
