ရန်ကုန်တိုင်းဒေသကြီးအတွင်းရှိ မြို့နယ်အချို့မှ ဝမ်းပျက်ဝမ်းလျှောရောဂါ ဖြစ်ပွားသူ သုံးရက်အတွင်း (၁၆၀) ကျော်အထိရှိလာလို့ စက်ရုံအလုပ်ရုံကအလုပ်သမားတွေအနေနဲ့ အခက်အခဲတွေကြုံလာရပြီလို့ သိရပါတယ်။
အခုလို ဝမ်းပျက်ဝမ်းလျှောရောဂါကူးစက်မှုမြင့်မားနေလို့ ပြည်သူလူထုကြား စိုးရိမ်မှုမြင့်တက်နေသလို လူဦးရေထူထပ်တဲ့ စက်ရုံ အလုပ်ရုံတွေမှာ လုပ်ကိုင်နေတဲ့ အလုပ်သမားတွေလည်း စိုးရိမ်မှုတွေ မြင့်တက်လာတာကြောင့် လာရောက်စစ်ဆေးပေးတာ ကြိုတင်ပြင်ဆင်ထား တာတွေလုပ်ဆောင်သင့်တယ်လို့ အလုပ်သမားတွေကပြောပါတယ်။
"ကျွန်မတို့စက်ရုံအလုပ်ရုံတွေမှာ အသိပညာပေးတယ်ဆိုတာတွေထက် အိမ်သာနဲ့အမှိုက်ထားရာနေရာ သောက်ရေနဲ့ထမင်းစားဆောင်တွေကို ဂရုစိုက်ပြီးစစ်ဆေးပေးချင်တာ။ ခုကအတော်လေးဖြစ်လာကြတယ် ၃ ရက်အတွင်း ၁၆၀ ကျော်ဖြစ်လာတယ်ဆိုတော့ ဒါကမသန့်ရှင်းရင်ဖြစ်နိုင်တဲ့အရာကြီး။ နောက်ပြီးစက်ရုံအများစုမှာ ဆေးအဆင်သင့်မရှိကြဘူး။ခုကဖျားလည်းဖျားကြတယ်။ ခွင့်ကလည်းယူလို့တစ်ရက်အပြင်ပိုမရဘူးဆိုတော့ ဒီ၀မ်းပျက်၀မ်းလျှောရောဂါ စက်ရုံအလုပ်ရုံတွေကိုကူးစက်လာမှာ အတော်လေးစိတ်ပူနေရတယ်"လို့ စက်ရုံအလုပ်သမားတစ်ဦးကဆိုပါတယ်။
ရန်ကုန်တိုင်းဒေသကြီးအတွင်းရှိ မြို့နယ်အချို့မှာ ပြီးခဲ့တဲ့ဇွန်လကုန်ပိုင်းကစပြီး ပြင်းထန်ဝမ်းပျက်ဝမ်းလျှော ရောဂါလက္ခဏာများဖြင့် လူနာအချို့ ဆေးရုံတက်ရောက်မှုလာတာနဲ့ပတ်သက်လို့ ရောဂါကာကွယ်ထိန်းချုပ်ရေး လုပ်ငန်းများအား ဆောင်ရွက်လျက်ရှိရာ စာသင်ကျောင်းများ၊ စက်ရုံ၊ အလုပ်ရုံများ၊ ဘုန်းတော်ကြီးကျောင်းများ၊ သီလရှင်ကျောင်းများ၊ ဘိုးဘွားရိပ်သာများ၊ ပရဟိတေဂဟာများ၊ သင်တန်းကျောင်းများ၊ ဘော်ဒါဆောင်များတွင် ပြင်းထန်ဝမ်းပျက်ဝမ်းလျှောရောဂါ ကူးစက်ဖြစ်ပွားမှုမရှိစေရေးအတွက် ကျန်းမာရေး အသိပညာပေးခြင်း၊ သောက်ရေသန့်ရှင်းရေးအတွက် ရေသန့်ဆေးပြားများဝေငှခြင်း၊ သုံးရေသန့်ရှင်းရေးအတွက် ကလိုရင်းဆေးခတ်ခြင်း၊ အစားအစာချက်ပြုတ်ပြင်ဆင်ရာတွင် ကျန်းမာရေးနှင့် ညီညွတ်ရေး၊ လက်ဆေးရန်နေရာများထားရှိကာ ရေနှင့်ဆပ်ပြာ အသင့်ထားရှိရေး၊ ယင်လုံအိမ်သာများ စနစ်တကျသုံးစွဲရေးစသည့် ရောဂါကာကွယ် ထိန်းချုပ်ရေးလုပ်ငန်းများအား အထူးအလေးပေး ဆောင်ရွက်နေတယ်လို့ စစ်ကောင်စီကဆိုထားပေမဲ့ စက်ရုံအလုပ်ရုံတွေမှာတော့ ကျန်းမာရေးအတွက်စစ်ဆေးဆောင်ရွက်တာမရှိသေးဘူးလို့ သိရပါတယ်။
အဆိုပါပြင်းထန်ဝမ်းပျက်ဝမ်းလျှောရောဂါကြောင့် ဇူလိုင် (၇) ရက်တွင် ဝမ်းပျက်ဝမ်းလျှောရောဂါနှင့် ဆေးရုံတက်ရောက် ကုသသူလူနာသစ် (၄၄) ယောက်၊ ဇူလိုင် (၆) ရက်တွင် လူနာသစ် (၆၃) ယောက်၊ ဇူလိုင် (၈) ရက်တွင် လူနာသစ် (၆၀) ယောက်ဖြစ်ပြီး ပြင်းထန်ဝမ်းပျက်ဝမ်းလျှောရောဂါလူနာ(၁၀)ဦးဝန်းကျင်ရှိကြောင်း ကျန်းမာရေးဝန်ကြီးဌာန၏ အချက်အလက်များအရ သိရပါတယ်။
"တကယ်ဆိုဒါကသာမန်ဟုတ်ဘူး။ လူသေမှုမရှိဘူး ကိုဗစ်အခံကြေင့် ကိုယ်အားခံအားနည်းပြီးသေတယ်ဆိုတာ မဟုတ်ဘူး။ သာကေတမှာ၀မ်းလျှောပြီးသေတာ ၄ ယောက်ရှိတယ်။ အဖွားကြီးတစ်ယောက်ပါပါတယ်။ သေဆုံးမရှိဘူးဆိုပြီးထုတ်ပြန်တာမှားနေတယ် တကယ်သေဆုံးခဲ့တာ"လို့ သာကေတမြို့နယ်နေ ဒေသခံတစ်ဦး ကဆိုပါတယ်။
အဆိုပါရောဂါဟာ ဈေးများမှတဆင့်ရောဂါကူးစက်ပြန့်ပွားမှုမရှိစေရေးအတွက် ဈေးများတွင် ပတ်ဝန်းကျင်သန့်ရှင်းမှုအား Checklist များအသုံးပြု၍စစ်ဆေးပြီး လိုအပ်ချက်များအား အမြန်ဆုံးဖြည့်ဆည်းပြုပြင်ပေးရန် လိုအပ်သလို လက်ရှိတွင် ပြင်းထန်ဝမ်းပျက်ဝမ်းလျှော ရောဂါဖြစ်ပွားသူ လူနာအားလုံး၏ အခြေအနေမှာ သက်သာကောင်းမွန်လျက် ရှိတယ်လို့ သိရပါတယ်။
ဓါတ်ပုံ-ပုံဟောင်း
Application - https://bit.ly/3oNDLga
Website Link - https://www.myanmarlabournews.com
Telegram Link - https://t.me/myanmarlabournews
Twitter Link - https://twitter.com/mm_labournews
Gmail Link- myanmarlabournews@gmail.com
