လာမယ့် (၂၀၂၆) ခုနှစ် ပြက္ခဒိန်နှစ်အတွင်း အများပြည်သူ အလုပ်ပိတ်ရက်ပေါင်း ၃၂ ရက် ရှိကြောင်းထုတ်ပြန်ကြေညာလိုက်ပြီး အလုပ်ရုံနှင့်အလုပ်သမား စစ်ဆေးရေး ဦးစီးဌာနက သက်ဆိုင်ရာ စက်ရုံ၊ အလုပ်ရုံ နဲ့ အလုပ်ဌာနတွေကို အကြောင်းကြားထားပါတယ်။
အများပြည်သူပိတ်ရက်တွေမှာ အစားထိုးပိတ်ရက်ရှည် တွေကိုပါထည့်သွင်းကြေညာထားပြီး သင်္ကြန်ပိတ်ရက် (၉) ရက်အပါအဝင် အလုပ်ပိတ်ရက်တွေအနေနဲ့ လွတ်လပ်ရေးနေ့၊ ပြည်ထောင်စုနေ့၊တရုတ်နှစ်သစ်ကူး၊ တောင်သူလယ်သမားနေ့၊ တပေါင်းလ ပြည့်နေ့၊ တပ်မတော်နေ့၊ အလုပ်သမားနေ့၊ ကဆုန်လပြည့်နေ့၊ အာဇာနည်နေ့ ၊ဝါဆိုလပြည့်နေ့၊ အမျိုးသားနေ့၊ ခရစ္စမတ်နေ့တွေကို၂၀၂၆ခုနှစ်ပြက္ခဒိန်မှာ(၁) ရက်စီပိတ်ဖို့နဲ့ (၂)ရက်စီပိတ်ဖို့သတ်မှတ်ပေးထားတာတွေရှိပါတယ်။
"အစားထိုးပိတ်ရက်တွေတစ်ခါတည်းထည့်ထားလိုက်ပြီး ပြည်ထောင်စုနေ့ ၂ ရက် ဖြစ်သွားသလို တရုတ်နှစ်သစ်ကူးလည်း (၂) ရက်ဖြစ်သွားတယ် ပိတ်ရက်နဲ့ကပ်သွားလို့ တစ်ဆက်တည်းဖြစ်အောင်လို့ယူဆရတယ်။ဖေဖော်၀ါရီလမှာတော့ (၁၂ရက်နေ့ နဲ့ ၁၃ ရက်နေ့က ) ပြည်ထောင်စုနေ့ပိတ်ရက် ဖြစ်ပြီး ၁၆ ရက်နေ့နဲ့ ၁၇ ရက်နေ့တို့က တရုတ်နှစ်သစ်ကူးပိတ်ရက်တွေဆိုတော့၀န်ထမ်းတွေအတွက်ကတော့ ခွင့်ရက်ရှည်တစ်ခုဖြစ်လာမှာပဲဖြစ်ပါတယ်။" လို့ ရန်ကုန်မြို့နေ စက်မှုဇုန် အလုပ်သမားတစ်ဦးကပြောပါတယ်။
၂၀၂၆ခုနှစ်အတွက်အများပြည်သူအလုပ်ပိတ်ရက်ကြေညာပေးခြင်းကို နိုင်ငံတစ်ဝန်း ရုံးတွေအနေနဲ့ အလုပ်ပိတ်ရက် နဲ့ လွှဲပြောင်းနိုင်တဲ့ စာချုပ် စာတမ်းများ အက်ဥပဒေပုဒ်မ ၂၅ အရ အများပြည်သူအလုပ်ပိတ်ရက်တွေမှာ ခွင့်ရက် နဲ့ အလုပ်ပိတ်ရက် အက်ဥပဒေ နည်းဥပဒေ နဲ့ အညီ ခံစားခွင့် ပေးသွားဖို့ကို ညွှန်ကြားလိုက်ခြင်းဖြစ်ကြောင်းသိရပါတယ်။
အများပြည်သူအလုပ်ပိတ်ရက်ရှည်အနေနဲ့ မြန်မာနှစ်သစ်ကူး သင်္ကြန်ရုံးပိတ်ရက် (၉) ရက်၊ သီတင်းကျွတ် ရုံးပိတ်ရက် (၃) ရက် နဲ့ တန်ဆောင်တိုင် ရုံးပိတ်ရက် (၂) ရက် ဖြစ်ကြောင်းထုတ်ပြန်ချက်မှာဖော်ပြထားပါတယ်။
၂၀၂၆ခုနှစ်အတွင်း အများပြည်သူရုံးပိတ်ရက်ထဲမပါဝင်တဲ့နေ့တွေအနေနဲ့ကရင်နှစ်သစ်ကူးနေ့ ကျရောက်တာ မရှိဘဲ ကုရ်ဘာနီ အီးဒ်နေ့ နဲ့ ဒီပါဝလီနေ့တွေအတွက် ကျရောက်မယ့် နေ့ရက်တွေကိုလည်း သီခြားကြေညာသွားမှာ ဖြစ်တယ်လို့ဆိုပါတယ်။
မုဒြာ
