စက်ရုံဖက်က အလုပ်သမားတွေအပေါ်ဥပဒေမဲ့အလုပ်ထုတ်တာတွေ၊ အကြောင်းအမျိုးမျိုးပြပြီးလစာဖြတ်တောက်တာတွေအပြင်စံချိန်တွေအလွန်အကျွံတိုးတောင်းပြီး အချိန်ပိုလုပ်အားခမပေးဘဲ ဆင်းခိုင်းနေတဲ့အတွက် HUIYUAN Garmentစက်ရုံမှအလုပ်သမားများအခက်ကြုံနေရတယ်လို့နစ်နာသူအလုပ်သမားတွေရဲ့ပြောကြားချက်တွေအရသိရပါတယ်။
HUIYUAN Garment အထည်ချုပ်စက်ရုံဟာရန်ကုန်တိုင်း၊ ဒဂုံဆိပ်ကမ်းမြို့နယ်ရှိ စက်မှု့ဇုန်ထဲကခြံအမှတ်---- မှာလုပ်သားဦးရေ ၆၀၀ နီးပါးနဲ့ လည်ပတ်လုပ်ကိုင်နေတဲ့တရုတ်နိုင်ငံသားပိုင်စက်ရုံတခုလဲဖြစ်ပါတယ်။
"ခုအစမ်းခန့် ၃လ ကျော်နေတဲ့သူတွေကိုလဲအတည်ပြုဝန်ထမ်းမခန့်သေးဘူး သူတို့အဆင်ပြေတဲ့အချိန်မှခန့်မယ်ပြောနေတယ် စံချိန်တွေဆိုလဲမတရားတိုးတောင်းပြီးရင်အချိန်ပိုတွေအလကားဆင်းခိုင်းတယ် အလုပ်ကနှစ်ရက်ပျက်တာနဲ့ဖြုတ်ပစ်တာ မိသားစုတခုခုဖြစ်လို့တောင်ဘာမှလုပ်မရဘူး"လို့ အလုပ်သမားတဦးကပြောပါတယ်။
အဆိုပါစက်ရုံအလုပ်သမားတွေအနေနဲ့လစဥ်တိုင်းစက်ရုံဖက်ကလူမှု့ဖူလုံရေးကြေးဖြတ်တောက်တာခံနေရပေမယ့် လူမှု့ဖူလုံရေးအကျိုးခံစားခွင့်များဘာတခုမှမရတဲ့အပြင်နေထိုင်မကောင်းဖြစ်လို့ခွင့်တင်ပြီးရက်ပျက်ပါကလဲစက်ရုံဖက်ကတရက်ကို ၁၇၂၀၀ ကျပ်တိတိလစာထဲကဖြတ်တောက်ခံရတယ်လို့ဆိုပါတယ်။
"စူပါဆိုတဲ့သူတွေကလဲနေ့စဥ်နဲ့အမျှမနက်လင်းတာနဲ့အဆဲနဲ့စတာပဲတော်တော်ကြမ်းကြမ်းတမ်းတမ်းတွေပြောတာ အလုပ်သမားတွေအနေနဲ့ကလဲဘယ်လိုမှပြန်ပြောလို့မရတဲ့အခြေအနေဖြစ်နေတယ်ပြီးတော့ စက်ရုံထဲမှာအသက်မပြည့်သေးတဲ့လုပ်သားတွေအများကြီးခေါ်ခိုင်းနေတယ် အလုပ်စခန့်ပြီးရင်လဲတရက်အလကားဆင်းခိုင်းတယ်" လို့အထက်ပါစက်ရုံမှအမည်မဖော်လိုသူအလုပ်သမားတဦးကပြောပါတယ်။
HUIYUAN Garment စက်ရုံမှအလုပ်သမားများအနေနဲ့
အလုပ်၀င်ရောက်လျှင်မည်သည့်စာရွက်စာတမ်းမှမလိုဘဲ မှတ်ပုံတင်တစ်ခုသာလိုအပ်ပြီး အစမ်းခန့်အလုပ်သမားအများဆုံးခေါ်ယူကာစံချိန်မတရားတောင်ခံသည့်အတွက်မချုပ်လုပ်နိုင်ခြင်း၊ဆဲဆိုခြင်းများအတွက်အလုပ်သမားများအလုပ်ထွက် အလုပ်၀င်သည့်ကိစ္စရက်များမှာနေ့တိုင်းလိုလိုရှိနေပြီး အလုပ်အကိုင်မတည်မြဲတဲ့အခြေအနေကိုကြုံတွေ့နေရတယ်လို့သိရပါတယ်။
အထက်ပါစက်ရုံအလုပ်သမားများအနေနဲ့ ၃လပြည့်ပြီးသောအလုပ်သမားများကိုအတည်ပြုဝန်ထမ်းခန့်အပ်ပေးရန်၊
စူပါများမှဆဲဆိုမှုများပြုုလုပ်နေခြင်းမပြုလုပ်ရန်၊ အချိန်ပို အလကားဆင်းပေးရခြင်းများမပြုလုပ်ရန်၊ လူမှု့ဖူလုံရေးနှင့်အလုပ်သမားဥပဒေပါအတိုင်းခံစားခွင့်များရရှိရန်စတဲ့အချက်တွေကိုရရှိဖို့လိုလားနေကြပါတယ်။
အခုလိုအလုပ်သမားအခွင့်အရေးတွေများစွာချိုးဖောက်ခံနေရပေမယ့် စက်ရုံမှာသမဂ္ဂမရှိတဲ့အတွက်ပိုအခက်ကြုံနေရတယ်လို့အလုပ်သမားတွေဖက်ကပြောဆိုနေကြပါတယ်။
HUIYUAN Garmentအထည်ချုပ်စက်ရုံဟာ sinsay အမှတ်တံဆိပ်အထည်တွေချုပ်လုပ်ဖြန့်ချီနေတဲ့စက်ရုံတခုဖြစ်တယ်လို့လဲသိရပါတယ်။
