စစ်တပ်ကအာဏာသိမ်းပြီးတနှစ်ပြည့်တဲ့နေ့မှာပြည်သူလူထုအားလုံးပါဝင်တဲ့အသံတိတ်သပိတ်ကိုဒီကနေ့မှာပဲမြန်မာနိုင်ငံရဲ့အနယ်နယ်အရပ်ရပ်မှာဆင်နွှဲခဲ့ကြပါတယ်။
အာဏာသိမ်းစစ်ကောင်စီဟာဒီအသံတိတ်သပိတ်ကိုဖြိုခွဲဖို့နည်းမျိုးစုံနဲ့ကြိုးစားနေပြီး ဒီအထဲမှာလုပ်သားထုကိုဒီနေ့ဒီရက်မှာအလုပ်မဆင်းမနေရဖို့လုပ်ငန်းရှင်တွေဇုံကော်မတီတွေက တဆင့်အဓမ္မခြိမ်းခြောက်ခိုင်းစေနေတာတွေရှိနေပါတယ်။
"အလုပ်မဆင်းရင်နားရမယ်ပြောတယ် တနည်းအားဖြင့်ထုတ်ပစ်မယ်ပြောတာပေါ့ခုကကျမတို့ဆင်းနေရတယ်"လို့ ဒီကနေ့အခြေအနေနဲ့ပတ်သက်ပြီးရန်ကုန်မြို့ရှိအထည်ချုပ်အလုပ်သမားတဦးက MLN ကို ပြောပါတယ်။
စစ်ကောင်စီဟာစက်ရုံအလုပ်ရုံလုပ်သားတွေတင်မကပဲ Non-CDM ဝန်ထမ်းတွေကိုပါအဓမ္မခိုင်းစေဖို့ကြိုးစားနေတယ်လို့သိရပါတယ်။
အသံတိတ်သပိတ်စမယ့်မနက်၁၀ နာရီမှာအလုပ်ဆင်းခိုင်းတာတွေဖယ်ရီကားတွေနဲ့မြို့ပတ်သွားခိုင်းနေတဲ့အမိန့်စာတွေဟာစစ်ကောင်စီရဲ့သပိတ်အပေါ်ကြောက်ရွံ့မှု့ကိုပိုမိုပေါ်လွင်စေတယ်လို့သပိတ်ဦးဆောင်သူတွေကဆိုပါတယ်။
"နေ့လည်၂နာရီပြန်ချင်ပြန်ပြောတယ်ကိုယ့်အစီအစဥ်နဲ့ကိုယ်ပြန်တဲ့ဖယ်ရီပြန်မပို့ပေးဘူးအရင်ရုံးဆင်းချိန်အတိုင်းပြန်မယ်ဆိုဖယ်ရီကြိုပေးမယ်ပြောတယ်"လို့ စက်ရုံဝန်ထမ်းတဦးက MLN ကိုပြောပါတယ်။
ဒီကနေ့မှာပြည်သူတွေဖက်ကလအသံတိတ်သပိတ်ကိုအောင်မြင်အောင်ဆောင်ရွက်နသလိုစစ်ကောင်စီဖက်ကလဲလမ်းမတွေပေါ်မှာလူတွေမထွက်ထွက်လာအောင်နည်းမျိုးစုံနဲ့ကြိုးစားနေပါတယ်။
ဒီလိုကြိုးစားနေတဲ့အထဲမှာတပ်ထောက်ခံပွဲတွေလုပ်တာ၊ ဆီတွေအလကားဝေမယ်ဆိုတဲ့မက်လုံးတွေပါဝင်ပါတယ်။
ဒါပေမယ့်ဒီလိုဆောင်ရွက်ချက်တွေဟာစစ်ကောင်စီရဲ့လုပ်ရပ်တွေအပေါ်မျက်မုန်းကျိုးနေတဲ့ပြည်သူတွေအတွက်တော့အလကားအရာတွေလို့ဆိုရမှာပါ။
"ဆိုင်လာဖွင့်ခိုင်းတယ်စာလဲလာပေးသွားတယ် ဖွင့်တော့ဖွင့်ထားတယ်မရောင်းဘူးလူထုကလဲနားလည်တယ်ခုချိန်အထိကျမဆိုင်ကိုတယောက်မှလာမဝယ်ဘူး"လို့ ရန်ကုန်မြို့ကကုန်စုံဆိုင်ပိုင်ရှင်တဦးက MLN ကိုပြောပါတယ်။
စစ်ကောင်စီဖက်ကလုပ်သားတွေအပြင်စက်ရုံတွေကိုပါဒီကနေ့မတိုင်ခင်ထဲကဖိအားပေးတာတွေရှိပါတယ်။
စက်ရုံတွေဖက်ကိုစည်ပင်နဲ့စက်မှု့ဇုန်ကော်မတီကတဆင့်ဖြန့်ဝေတဲ့အမိန်စာတွေထဲမှာဒီကနေ့အလုပ်သမားတွေအနေနဲ့ခိုင်လုံတဲ့အကြောင်းပြချက်မရှိပဲအလုပ်ပျက်ကွက်ခွင့်မရှိဘူးဆိုတာအပြင်စက်ရုံလုပ်သားစာရင်းကိုပေးပို့ဖို့နဲ့ရှောင်တခင်ဝင်စစ်ပြီးနိုင်ငံရေးပုဒ်မတွေနဲ့ပါအရေးယူမယ်ဆိုပြီးခြိမ်းခြောက်ထားတာတွေပါဝင်ပါတယ်။
"ဆင်းဆိုတော့ဆင်းပေးလိုက်တယ် ညနေ၄နာရီအထိကျမအလုပ်မလုပ်ဖူးငုတ်တုတ်ထိုင်နေတာခုထိ"လို့စစစ်ကောင်စီနဲ့မကင်းတဲ့ပုဂ္ဂလိကကုမ္မဏီတခုမှာလုပ်နေတဲ့ဝန်ထမ်းတဦးကပြောပါတယ်။
ဒီကနေ့မတိုင်ခင်ထဲကစစ်ကောင်စီကပိတ်ပင်တားဆီးဖို့နည်းလမ်းမျိုးစုံနဲ့ကြိုးစားခဲ့ပေမယ့်ရန်ကုန်၊မန္တလေးအပါအဝင်မြို့ကြီးတွေမှာတိတ်ဆိတ်ခြောက်ကပ်နေပါတယ်။
ဒါပေမယ့်စက်မှု့ဇုန်တွေထဲမှာရှိတဲ့အလုပ်သမားတွေအနေနဲ့ကတော့စစ်ကောင်စီ၊လုပ်ငန်းရှင်၊ဇုံကော်မတီ၊စည်ပင်တွေရဲ့အဓမ္မခိုင်းစေမှု့ကြောင့်အလုပ်ရုံတွေထဲမှာတိတ်ဆိတ်စွာအလုပ်လုပ်နေကြရပါတယ်။
