ထိုင်းနိုင်ငံသို့ ပို့ဆောင်ပေးမယ်ဆိုကာ အလုပ်သမား ၅၀၀ ဦးထံမှ ကျပ်သိန်းပေါင်း တစ်သောင်းကျော် လိမ်လည်ထားတယ်ဆိုတဲ့ JMK အေဂျင်စီကို ဒီကနေ့ဇွန်၅ရက်နေ့မှာ စတင်စစ်ဆေးနေတယ်လို့ သိရပါတယ်။
"ဒီကနေ့မှစစစ်တာ။ ဘာမှမကြားရ မသိရသေးဘူး" လို့ အေဂျင်စီ အသိုင်းအဝိုင်းမှ သိရပါတယ်။
အဆိုပါ JMK အေဂျင်စီအနေနဲ့ အလုပ်သမားတွေကို ထိုင်းနိုင်ငံ၊ ဖစ်ဘူရီမြို့၊ သုံးဘီးဆိုင်ကယ်စက်ရုံနဲ့ သံပန်းတံခါး အလုပ်တွေမှာ အလုပ်ရရှိ လုပ်ကိုင်ရမယ်ဆိုကာ အလုပ်သမား ၅၀၀ ဦးထံမှ ကျပ်သိန်း တစ်သောင်းကျော်အထိ လိမ်လည်ထားတာလို့ သတင်းတွေထွက်ပေါ်လာတာကြောင့် ကရင်ပြည်နယ်အလုပ်သမားဦးစီးဌာနက ခေါ်ယူစစ်ဆေးတယ်လို့ သိရပါတယ်။
အဆိုပါအလုပ်သမားတွေဟာ ထိုင်းကို ပို့ပေးမယ်ဆိုတာ စာချုပ်ချုပ်ထားပေမဲ့ ချုပ်ဆိုပြီး ၇ လခန့်ကြာသည့်အထိ ထိုင်းနိုင်ငံသို့ပို့ဆောင်ပေးခြင်းမရှိသလို ကောက်ယူထားတဲ့ငွေကြေးပြန်လည်မပေးအပ်တဲ့အပြင် ပတ်စ်ပို့တွေ သိမ်းဆည်းထားတယ်လို့အလုပ်သမားတွေက ဆိုထားပါတယ်။
အဲဒီလိုသတင်းတွေထွက်ပေါ်လာတာကြောင့် ကရင်ပြည်နယ် အလုပ်သမား ညွှန်ကြားမှု ဦးစီးဌာနကနေ စစ်ဆေးမှုပြုလုပ်ဖို့ဇွန်၁ရက်နေ့က ဆင့်ခေါ်ခဲ့တာဖြစ်ပြီး ယနေ့ ဇွန်လ ၅ ရက်နေ့ နံနက် ၁၁ နာရီကတွေ့ဆုံစစ်ဆေးခဲ့တာဖြစ်ကာ ယင်းသို့တွေ့ဆုံစစ်ဆေးမှုနဲ့ပတ်သက်ပြီး လတ်တလောမှာတော့တစ်စုံတစ်ရာ ထုတ်ပြန်ထားတာမျိုးတော့ မရှိသေးသလို ပြည်ပကိုအလုပ်သမားစေလွှတ်နေတဲ့အေဂျင်စီအသိုင်းအဝိုင်းမှာလည်း တစ်စုံတစ်ရာသိရှိရခြင်းမရှိသေးဘူးလို့ သိရပါတယ်။
#MyanmarLabourNews
