အလုပ်သမား အရေး ဆောင်ရွက်နေတဲ့ ဒေါ်မျိုးမျိုးအေး အပါအဝင် ၈ဦးကို အာမခံပေးမယ့်အဆုံးအဖြတ်ကို စက်တင်ဘာ ၈ ရက်မှာ အမိန့်ချမယ်လို့ သွေးစည်းညီညွတ်သောသမဂ္ဂများအဖွဲ့ချုပ်(STUM )ကနေသိရပါတယ်။
"စက်တင်ဘာလ (၈)ရက်နေ့ ရုံးချိန်းတွင် အလုပ်သမားအရေးတက်ကြွလှုပ်ရှားသူဒေါ်မျိုးမျိုးအေးနဲ့ ၈ ဦး ကို အာမခံပေးသင့် မပေးသင့် ရွှေပြည်သာတရားရုံးက ဆုံးဖြတ် ကာ အမိန့်ချမှာဖြစ်ပြီး ဖမ်းဆီးခံထားရတဲ့ ဒေါ်မျိုးမျိုးအေး အနေနဲ့ အကျဉ်းထောင်မှာ ရှိနေစဉ် ဆီးချိုဆေးရရှိပေမယ့် နေ့စဉ် ဆီးချိုစစ်ဆေးခွင့်မရရှိသလို အခြားကျန်းမာရေးအနေနဲ့ သွားမှာ အခြေအနေဆိုးဝါးစွာ ဖြစ်ပွားနေတယ်"လို့ STUM ကသတင်းထုတ်ပြန်ပါတယ်။
အာမခံကိစ္စကို ဒေါ်မျိုးမျိုးအေး တို့၈ဦးအတွက် ရှေ့နေကတဆင့် လျှောက်ထားရာမှာ ဥပဒေအရာရှိက ကန့်ကွက်လို့ စက်တင်ဘာ ၁ ရက်ကို ရုံးချိန်ပြုလုပ်ချိန်းဆိုခဲ့ပေမယ့် အာမခံကိစ္စ အဆုံးအဖြတ်မရခဲ့ဘဲ ရုံးချိန်းထပ်မံချိန်းဆိုထားတာလည်းဖြစ်ပါတယ်။
ပြီးခဲ့တဲ့ ဇူလိုင် ၂၅ ရက်ညက အလုပ်သမားအရေးဆောင်ရွက်သူ ဒေါ်မျိုးမျိုးအေးကို စစ်ကောင်စီက ဖမ်းဆီးခဲ့ပြီးနောက်ပိုင်း ဇူလိုင် ၂၈ ရက် ညမှာ STUM ရုံးကို ဝင်စီးပြီး သမီးဖြစ်သူမသင်းထက်စံနဲ့ အဖွဲ့ဝင်၊ ဝန်ထမ်း တွေကိုထပ်မံဖမ်းဆီးခဲ့ပါတယ်။
အလုပ်သမားအရေးကူညီဆောင်ရွက်ပေးနေတဲ့ (STUM) ဦးဆောင်သူ ဒေါ်မျိုးမျိုးအေးနဲ့ အဖွဲ့ဝင် ၁၀ ဦးကို စစ်ကောင်စီက ခြေချုပ်နှင့် ခံ၀န်အက်ဥပဒေ ပုဒ်မ ၅(၁)(စ)(ဆ)နဲ့ သီးခြားစီ တရားစွဲဆိုထားတာလည်းဖြစ်ပါတယ်။
