အလုပ်သမားအရေးလှုပ်ရှားသူဖြစ်တဲ့ သွေးစည်းညီညွတ်သော သမဂ္ဂများအဖွဲ့ချုပ် STUM ဦးဆောင်သူ ဒေါ်မျိုးမျိုးအေး ကို စွဲဆိုထားတဲ့ အမှု တွေ ထဲမှ ခြေချုပ်နှင့်ခံဝန်အက်ဥပဒေ အရစွဲဆိုသော အမှုအတွက်ခံဝန်ဖြင့် ခြောက်လနေထိုင်ရန် တရားရုံးမှ အမိန့်ချမှတ်ခဲ့တယ်လို့ STUM အဖွဲရဲ့ ထုတ်ပြန်ချက်အရသိရပါတယ်။
အောက်တိုဘာ ၂၄ ရက်က ရွှေ ပြည်သာမြိုနယ် တရားရုံးမှ ခြေချုပ်နှင့်ခံဝန်အက်ဥပဒေ ၅(၁)(စ)(ဆ) အရ သိန်း(၃၀)တန် ခံဝန်သူနှစ်ဦးဖြင့် ခြောက်လ အတွင်းကောင်းမွန်စွာ ကျင့်ကြံနေထိုင်စေရန် ခံဝန်ချုပ် ချုပ်ဆိုတဲ့ အမိန့်ချမှတ်ခဲ့တယ်လို သိရပါတယ်။
ဒေါ်မျိုးမျိုးအေးကို စစ်ကော်မရှင်က ဇူလိုင်၂၅ ရက် မှာ နေအိမ်တွင် ဖမ်းဆီးခဲ့ ပြီး ခြေချုပ်နှင့်ခံဝန်အက်ဥပဒေ၊ အသင်းအဖွဲ့မှတ်ပုံတင်ခြင်းဆိုင်ရာဥပဒေပုဒ်မ ၄၀၊ ၄၁ တိုနဲ့ တရားစွဲဆိုခဲ့ပြီးနောက် အောက်တိုဘာ ၂၀ ရက်မှာ အင်းစိန်အကျဉ်းထောင် မှ ပြန်လည် လွှတ်ပေးခဲ့ပါတယ်။
အကျဉ်းထောင်ကနေ လွှတ်စဉ်က စွဲဆိုထား တဲ့ အမှုအားလုံးအား ကို ရာဇဝတ်ကျင့်ထုံးဥပဒေပုဒ်မ ၄၉၄ အရ ရုတ်သိမ်းတယ်လို့ ပြောခဲ့ပေမယ့် လက်ရှိမှာ တရားရုံးတော်မှ ခြေချုပ်နှင့်ခံဝန်အက်ဥပဒေ ပုဒ်မ (၆)အရ စုံစမ်းစစ်ဆေးနေတဲ့ အဆင့်ဖြစ်၍ ထိုကဲ့သို ရုတ်သိမ်း၍ မရကြောင်းပြောပြီး အမိန့်တစ်ရပ်ချမှတ်ခဲ့တာဖြစ်တယ်လို့ STUM က ထုတ်ပြန်ထားပါတယ်။
ဒါ့အပြင် သင်းဖွဲမှတ်ပုံတင်ခြင်းဆိုင်ရာဥပဒေပုဒ်မ ၄၀၊ ၄၁ အမှုအတွက်ကိုလည်း အာမခံလျှောက်ထားခြင်းအား ရုံးတော်မှ ခွင့်ပြု၊ မပြုကို နောက်ရုံးချိန်းဖြစ်တဲ့ အောက်တိုဘာ ၂၇ ရက်မှာ အမိန့်ချမှတ်မယ် လို့ သိရပါတယ်။
ဒေါ်မျိုးမျိုးအေးကဲ့သို့ အဖမ်းခံရပြီး မလွတ်မြောက်သေးတဲ့ STUM အဖွဲ့ဝင် (၉)ဦးအတွက် စွဲဆိုထားတဲ့ အမှုအား ရုတ်သိမ်းပေးပါရန် လျှောက်ထားလွှာသီးသန့်တင်သွင်းခဲ့မှုကိုတော့ ရုံးတော်မှ လက်ခံခဲ့ပြီးအောက်တိုဘာ၂၇ ရက်မှာ ဥပဒေအရာရှိဘက်မှ ကန့်ကွက်လျှောက်လဲချက်တင်သွင်းမှာဖြစ်ကြောင်းသိရပါတယ်။
