Golden Colour Fashion စက်ရုံမှာ ည ၈ နာရီအထိ အချိန်ပိုခေါ်ပြီး ၊ Cutting ဌာနမှာလည်း ကြိုတင်အသိပေးအကြောင်းကြားတာမရှိဘဲ မနက်ခင်းစောစောအချိန်တွေ အတွက် အတင်းအကြပ် အချိန်ပို ခေါ်ယူနေတယ်လို့ ဇူလိုင် ၁၈ ရက်ညမှာ အလုပ်သမားတွေက STUM ကို တိုင်ကြားချက် ပေးပို့ခဲ့ပါတယ်။
ဒီစက်ရုံဟာ ရွှေပြည်သာ စက်မှုဇုန်(၃)၊ အင်းစိန်မြို့နယ်မှာတည်ရှိတာဖြစ်ပြီးတော့ Sinsay နဲ့ Kappa အမှတ်တံဆိပ်တွေ အဝတ်အထည်တွေချုပ်လုပ်နေတာဖြစ်ပါတယ်။
“စက်ရုံက ဒီနေ့ည(ဇူလိုင်လ ၁၈ ရက်) မှာ cutting ဌာနကို OT အောလင်းခေါ်ပြီး စတို ဌာနတွင် အောနိုက်ခေါ်ပါတယ်။ စက်လိုင်းဌာနတွေကိုလဲ ည ၈ နာရီ အထိ အချိန်ပို ခေါ်ယူပါတယ်” လို့ အဆိုပါစက်ရုံ အလုပ်သမားတွေက STUM ကို အကူအညီတောင်းခံထားတာပါ။
မြန်မာနိုင်ငံအလုပ်သမား ဥပဒေအရ တနေ့ကို အလုပ်ချိန် ၈ နာရီ တပတ်လျင် ၄၈ သာ အလုပ်လုပ် ခိုင်းစေခွင့်ရှိတာဖြစ်ပြီး အချိန်ခေါ်ယူရာမှာလည်း အလုပ်သမားတွေရဲ့ သဘောချက်မရှိဘဲ ခေါ်တာဖြစ်လို့ တရားမဝင် အချိန်ပိုခိုင်းစေနေတာဖြစ်တယ်လို့ STUM က ထုတ်ပြန်ထားပါတယ်။
အချိန်ပို ခေါ်ယူတာမှာလည်း တစ်နေ့ကို ၄ နာရီသာ လုပ်ခွင့်ရှိပြီး တစ်ပတ်မှာ နာရီ ၂၀ သာ လုပ်ကိုင်နိုင်တယ်လို့ အလုပ်သမား ဝန်ကြီးဌာနက သတ်မှတ်ပြဌာန်းထားပြီးသားလည်း ဖြစ်ပါတယ်။
