ပြင်ဆင်သတ်မှတ်ခြင်းမရှိတဲ့ မြန်မာနိုင်ငံကအလုပ်သမားထုရဲ့ တစ်နေ့လုပ်ခလစာနှုန်းထားဟာ ခရမ်းချဉ်သီး ငပိချက်ဟင်းတစ်ခွက်ကုန်ကျစရိတ်ထက် နည်းပါးလာတာတွေ့ရပါတယ်။ 

ကုန်ဈေးနှုန်းကအဆမတန်ပင်မြင့်တက်နေတာကြောင့်  ခရမ်းချဉ်သီးဟင်းတစ်ခွက်ရဲ့နှုန်းထားဟာ ၆၀၀၀ ကျပ်မှ ၇၀၀၀ ကျပ်ကြားရှိနေပြီး မြန်မာနိုင်ငံရဲ့တစ်နေ့လုပ်ခဟာ ၄၈၀၀ ကျပ်သာရှိနေသေးလို့  အဆိုပါခရမ်းချဉ်သီးငပိချက်ဟင်းချက်စားနိုင်ဖို့ပင် အလှမ်း​ဝေးလာတယ်လို့ သိရပါတယ်။ 

ခရမ်းချဉ်သီး ငပိချက်ဟင်းတစ်ခွက်ဖြစ်လာဖို့ ခရမ်းချဉ်သီး ၂၀သား ၂၄၀၀ ကျပ်၊ ငရုတ်သီးစိမ်းတစ်ခါခပ် ၅၀၀ ကျပ်၊ နံနံပင်တစ်ခါခပ် ၅၀၀ကျပ်၊  ငပိစိမ်းစား ၁၀၀၀ ကျပ်၊ ဆီတစ်ဆယ်သား ၁၀၀၀ ကျပ်နဲ့တို့စရာသခွားသီးသို့မဟုတ် ချဉ်ဖတ်ဖြင့်စားသုံးပါက  ခရမ်းချဉ်သီးငပိချက်ဟင်းတစ်ခွက်ရဲ့  ကုန်ကျစရိတ်နှုန်းထားဟာ ၆၀၀၀ နဲ့ ၇၀၀၀ ကြားရှိနေတာပါ။ 

"တစ်နေ့လုပ်ခလစာက ၄၈၀၀ က​နေ တိုးပြီးမသတ်မှတ်လာဘူး။ ထောက်ပံ့ကြေးတစ်ထောင်တစ်ထောင်တော့ တိုးပါတယ်။ တစ်ထောင်တိုးတာနဲ့ကုန်ဈေးနှုန်းကနှစ်ဆမြင့်လာတယ်ဆိုတော့ ပိုတောင်ခက်ခဲလာတယ်။ခရမ်း ချဉ်သီးတစ်ခါချက်ကို တို့စရာဘာညာအပါဆို ၇ထောင်၈ထောင်လောက်အထိရှိနိုင်တယ်။ အသားငါးဈေးတင်တက်တာမဟုတ်ဘူး။ အသီးအရွက်ကပိုဆိုးနေတယ်လို့ အလုပ်သမားတစ်ဦးကဆိုပါတယ်။ 

မြန်မာနိုင်ငံရဲ့အနည်းဆုံးအခကြေးငွေတစ်နေ့လုပ်ခ ၄၈၀၀ ကျပ်ကို  ၂၀၁၈ ခုနှစ် ကနေစတင်ပြဌာန်းထားတာ ခုချိန်ထိပြောင်းလဲပြင်ဆင်မှုမရှိသေးဘဲ မူလအတိုင်း ၄၈၀၀ ကျပ်သာပေးကာ ထောက်ပံ့ကြေးဟုဆိုကာ ကျပ်တစ်ထောင်သာနှစ်ကြိမ်တိုးခဲ့လို့ ကျပ် ၆၈၀၀ သာဖြစ်ပါတယ်။ 

"လစာကသုံးသိန်းခွဲလောက်ရတယ်။ လုပ်တာကနှစ်နှစ်လောက်ရှိပြီ။ အိုတီရှိမှရတာပါ။  အိုတီမရှိရင်တော့ ၂၈ လောက်ပဲရတယ်။  လောက်တယ်လည်းမဟုတ်ပါဘူး။ ကုန်ဈေးနှုန်းတွေကတစ်ဖြေးဖြေးတက်နေတာ။ အမြဲတမ်းတက်နေတာ။ လစာတိုးတာကတစ်နေ့တစ်ထောင် တစ်လလုံးမှသုံးသောင်းလောက်ပဲတိုးတယ်။ အဲ့တာနဲ့အဆင်မပြေဘူး"လို့ အလုပ်သမားတစ်ဦးကဆိုပါတယ်။  

မြန်မာနိုင်ငံရဲ့အနိမ့်ဆုံးလုပ်ခလစာဟာ ၂နှစ်တစ်ကြိမ်ပြင်ဆင်သတ်မှတ်ရမှာဖြစ်ပေမဲ့ ၂၀၁၈ က​နေ ၂၀၂၄ ရောက်သည့် တိုင်အောင် ၆ နှစ်ကြာ ပြောင်းလဲလာတာမရှိဘဲနဲ့ ၂၀၂၃ အောက်တိုဘာမှ ထောက်ပံ့ကြေးအနေနဲ့ ကျပ်တစ်ထောင်ဆိုပြီးနိုင်ငံတော်က တိုးပေးထားပြီး အနည်းဆုံးအခကြေးငွေ ၄၈၀၀ ကျပ်ကိုတော့ ပြင်ဆင်ခြင်းမရှိတာကြောင့် လက်ရှိမြင့်တက်နေတဲ့ကုန်ဈေးနှုန်းတွေအရ အခက်အခဲကြုံနေကြရတာဖြစ်ပါတယ်။ 

Application - https://bit.ly/3oNDLga
Website Link - https://www.myanmarlabournews.com
Telegram Link - https://t.me/myanmarlabournews 

#MyanmarLabourNews