မြန်မာနိုင်ငံလုံးဆိုင်ရာအလုပ်သမားသမဂ္ဂများအဖွဲ့ချုပ်(CTUM)ရဲ့အမည်ကိုအသုံးပြုကာတုပလုပ်ဆောင်နေတာဟာအဖွဲ့ချုပ်ကိုကိုယ်စားမပြုသလိုသက်ဆိုင်မှုလည်းမရှိတာကိုဩဂုတ်လ(၃၀) ရက်မှာထုတ်ပြန်ကြေညာပါတယ်။
ကြေညာချက်မှာ CTUM အဖွဲ့ချုပ်ရဲ့အဖွဲ့အစည်းအမည်၊ ကိုယ်ပိုင်အမှတ်တံဆိပ်၊ စည်းတံဆိပ်၊ အလံတို့ကိုခွင့်ပြုချက်မရှိဘဲအလွဲသုံးစားအသုံးပြုတာကိုတားမြစ်ကန့်ကွက်သလိုအဖွဲ့အစည်းရဲ့ဂုဏ်သိက္ခာနဲ့ယုံကြည်မှုကိုကာကွယ်ဖို့ဥပဒေနဲ့အညီအရေးယူဆောင်ရွက်မယ်လို့ဖော်ပြထားပါတယ်။
လက်ရှိမှာ CTUM အဖွဲ့ချုပ်ရုံးခန်းအသစ်ကိုရန်ကုန်တိုင်း၊ လှိုင်သာယာမြို့နယ်(အရှေ့ပိုင်း)၊ ကျန်စစ်မင်းအိမ်ယာမှာသြဂုတ်လ(၃၁)ရက်ကစတင်ပြီးပြောင်းရွှေ့ဖွင့်လှစ်ထားမယ်လို့ထုတ်ပြန်ကြေညာတာတွေလည်းပြန့်နှံ့နေပါတယ်။
"အခုကအလွဲသုံးစားလုပ်နေတာလည်းအဖွဲ့ချုပ်မှာလုပ်ဖူးတဲ့သူတွေဆိုတော့စိတ်ထဲတော်တော်အံဩတယ်။ဒီချိန်မှာကိုယ်ကျိုးစီးပွားအတွက်အဖွဲ့နာမည်သုံးတာကိုကမလုပ်သင့်တဲ့လုပ်ရပ်ပဲလေ။သူတို့တကယ်အလုပ်သမားအရေးလုပ်ချင်တယ် ကူညီချင်တယ်ဆိုတောင်သူတို့ဘာသာအသစ်စလုပ်ကြလေ။ဒါဆိုနားလည်ပေးလို့ရသေးတယ် အခုကျပြန်တွေ့တောင်အခေါ်အပြောလုပ်ဖြစ်မယ်မထင်ဘူး"လို့အဖွဲ့ဝင်ဟောင်းတစ်ဦးကပြောပါတယ်။
CTUM အဖွဲ့ချုပ်ဟာ စစ်အာဏာသိမ်းပြီးကတည်းကအာဏာရှင်ကိုဆန့်ကျင်တာတွေကိုလုပ်ဆောင်ခဲ့ပြီးလက်ရှိမှာလည်း စစ်ကောင်စီကို အရေးယူပိတ်ဆို့တာတွေလုပ်ဆောင်နိုင်ဖို့နိုင်ငံတကာအဖွဲ့အစည်းတွေနဲ့ပူးပေါင်းလုပ်ဆောင်နေတာပဲဖြစ်ပါတယ်။
