အနည်းဆုံးအခကြေးငွေသတ်မှတ်ရေးဆိုင်ရာ အမျိုးသားကော်မတီက ပုဂ္ဂလိကကဏ္ဍမှ အလုပ်သမားတွေ ကို အပိုထောက်ပံ့ကြေး တစ်ရက်လျှင် ကျပ် ၁,၀၀၀ ပေးရန် အမိန့်ကြေညာချက် ထုတ်ပြန်ခဲ့မှုအပေါ် စက်ရုံ အလုပ်ရုံတွေ ဘက်မှ လိုက်နာမှုမရှိပါက အလုပ်သမားတွေ အနေနဲ့ နီးစပ်ရာ အလုပ်သမားဌာန ကို အချိန်နှင့်တစ်ပြေးညီ တိုင်ကြားနိုင်တယ်လို့ စစ်ကော်မရှင်ရဲ့ အလုပ်သမားဝန်ကြီးဌာနက အောက်တိုဘာ၂၀ ရက်မှာ ထုတ်ပြန်ကြေညာပါတယ်။
၂၀၂၅ ခုနှစ်အောက်တိုဘာ၁ရက် နေ့မှ စပြီး လက်ရှိထောက်ပံ့လျက်ရှိတဲ့ အပိုထောက်ပံ့ကြေး ကျပ် ၂,၀၀၀ အပြင်ထပ်မံပြီး ကျပ် ၁,၀၀၀ ကို ထပ်ဆောင်းကာ အလုပ်လုပ် သောရက်များနှင့် ၁၉၅၁ ခုနှစ်၊ ခွင့်ရက်နှင့်အလုပ်ပိတ်ရက်အက်ဥပဒေအရ ခံစားခွင့်ပြုရန် စစ်ကော်မရှင်ရဲ့ အနည်းဆုံးအခကြေးငွေသတ်မှတ်ရေးဆိုင်ရာအမျိုးသားကော်မတီက အောက်တိုဘာ ၁၄ ရက်မှာ ထုတ်ပြန်ခဲ့ပါတယ်။
အခုလို အမိန့်ကြေညာချက် ထုတ်ပြန်ခဲ့မှုအပေါ် အလုပ်ပိတ်ရက်များနှင့် အချိန်ပိုကြေးများတွင် အငြင်းပွားဖွယ်ဖြစ်နိုင်ချေနဲ့ စက်ရုံနှင့် လုပ်ငန်းအချို့က လိုက်နာပေးချေခြင်း မရှိတဲ့ အပေါ် စစ်ကော်မရှင်ရဲ့ အလုပ်သမားဝန်ကြီးဌာနက အခုလို ကြေညာခြင်း ဖြစ်တယ်လို့ ဆိုပါတယ်။
အလုပ်သမားတွေရဲ့ စားဝတ်နေရေးကို အထောက်အကူပြုရန် ရည်ရွယ်ပြီး အပိုထောက်ပံ့ကြေးကို ခံစားခွင့်ပြုခြင်းဖြစ်တာကြောင့် စက်ရုံ၊ အလုပ်ရုံများနဲ့ လုပ်ငန်းများ အားလုံးမှ စနစ်တကျ လိုက်နာဆောင်ရွက်စေရေးအတွက် အလုပ်သမားဝန်ကြီးဌာန ရဲ့ စစ်ဆေးရေး အရာရှိတွေ က ကွင်းဆင်းစစ်ဆေးကာ ကြပ်မတ်ဆောင်ရွက်သွားမယ်လို့လည်း ထုတ်ပြန်ချက်မှာဖေါ်ပြထားပါတယ်။
ဒါ့အပြင် အလုပ်သမားများအနေနဲ့ လည်း အပိုထောက်ပံ့ကြေး မရရှိခြင်းဖြစ်ပေါ်ပါက နီးစပ်ရာ အလုပ်သမားဌာနများ သို့ အချိန်နှင့်တစ်ပြေးညီ တိုင်ကြားနိုင်တယ်လို့ လည်း အသိပေးကြေညာထားပါတယ်။
