မြန်မာနိုင်ငံမှာ အနည်းဆုံးအခကြေးငွေပြင်ဆင်သတ်မှတ်မှာနဲ့ပတ်သက်ပြီး တိုးမြှင့်သတ်မှတ်မည့်အပေါ် အလုပ်ရှင်တချို့က ကန့်ကွက်မှုတွေရှိနေတယ်လို့ သိရပါတယ်။
“အလုပ်ရှင်တွေက မလွယ်ကူတဲ့ကြားထဲကနေ ဆက်လုပ်နေကြရတာ။ ကိုဗစ်မှာပဲတော်တော်ထိထားတာ။ အရှုံးတွေနဲ့ကနေ ပြန်စထားကြရတာဆိုတော့ လတ်တလောတိုးမြှင့်ပေးမှာကိုတော့ သဘောမတူ ဘူးလို့ပဲ ပြောရမှာ။ ဒါကကျွန်တော့်တစ်ယောက်တည်းရဲ့ဆန္ဒပါပဲ။ အခြားလုပ်ငန်းရှင်တွေလည်း ဒီလိုပဲလို့ထင်ပါတယ်။ အားလုံးကအရှိန်ပြန်ယူနေကြရတာဆိုတော့ အချိန်အတိုင်းအတာ တစ်ခုတော့စောင့် ဆိုင်းပေးဖို့ဆိုကြမှာပဲ ဒီအပေါ်တာ၀န်ရှိသူတွေကလည်း စောင့်ဆိုင်းပေးမယ်လို့ထင်ပါတယ်။ ခုဟာကလည်းကျွန်တော်ထင်တယ် သတင်းမှားပါပဲ ကျွန်တော်တို့လည်း ဘာမှမသိရသေးပါဘူး”လို့ ဒဂုံမြို့သစ်တောင်ပိုင်းမြို့နယ် စက်မှုဇုန်ရှိ စက်ရုံလုပ်ငန်းရှင်တစ်ဦးကဆိုပါတယ်။
အနည်းဆုံးအခကြေးငွေ ပြင်ဆင်သတ်မှတ်ဖို့ စီစဉ်နေတယ်လို့ စစ်ကောင်စီလက်အောက်ခံ အလုပ်သမားဝန်ကြီးဌာနက ၎င်းတို့ရဲ့ခြောက်လပတ်အစည်းဝေးမှာ ပြောကြားထားပေမယ့် ဘယ်နေ့ဘယ်ရက်မှာ ဘယ်လိုပုံစံမျိုးနဲ့ ပြင်ဆင်သတ်မှတ်မယ်ဆိုတဲ့ အသေးစိတ်ဖြေရှင်းချက်တော့ ပြောဆိုထားတာမရှိသေးဘဲ အမှန်တစ်ကယ်သာ ယခုချိန်တိုးမြှင့်သတ်မှတ်မည်ဆိုပါက အလုပ်ရှင်များရဲ့ကန့်ကွက်မှုကြောင့် ပြင်ဆင်သတ်မှတ်ဖို့ကြန့်ကြာနိုင်မယ်လို့လည်း ၎င်းကဆိုပါတယ်။
အလုပ်ရှင်တချို့က အနည်းဆုံးလုပ်ခကို တိုးပေးလိုစိတ်မရှိသေးဘဲ လက်ရှိအချိန်မှာလည်း စံချိန်တိုးတောင်းမှုတွေပြုလုပ်ကာ သတ်မှတ်စံချိန်မမီတဲ့အကြောင်းပြချက်နဲ့ အချိန်ပိုကြေးမပေးဘဲ ခိုင်းစေမှုတွေ လုပ်နေကြတယ်လို့လည်း အလုပ်သမားတွေက ဆိုပါတယ်။
ဒါ့အပြင် လက်ရှိကာလမှာ အလုပ်သမားတွေက တစ်ရက်လုပ်ခ ၈၀၀၀ ကျပ်ထက်မနည်း သတ်မှတ်ပေးဖို့ တောင်းဆိုမှုတွေရှိနေပြီး ပြင်ဆင်သတ်မှတ်မယ်ဆိုတဲ့ သတင်းအရ အနည်းဆုံးအခကြေးငွေနှုန်းထားအသစ်ကို ၇၂၀၀ ကျပ်သတ်မှတ်မယ်လို့လည်း သတင်းတွေတပြိုင်နက်ထွက်ပေါ်ခဲ့တာဖြစ်ပါတယ်။
အဲ့ဒီလိုသတင်းတွေထွက်ပေါ်လာခဲ့ပြီး လက်ရှိနိုင်ငံရေးမတည်ငြိမ်တဲ့ကာလမှာ အနိမ့်ဆုံးလုပ်ခစာပြင်ဆင်သတ်မှတ်မည်ကို ဆိုင်းငံ့ထားပေးဖို့အလုပ်ရှင်တွေဘက်က ပြောဆိုမှုတွေရှိနေတာကြောင့် အဲဒါတွေကိုထည့်သွင်းစဉ်းစားမယ့် အခြေအနေရှိတယ်လို့လည်း တာ၀န်ရှိသူတစ်ဦးကဆိုထားပါသေးတယ်။
လက်ရှိမှာ အလုပ်သမားတွေဟာ တစ်ရက်လုပ်ခ ၄၈၀၀ ကျပ်သာရရှိနေတာဖြစ်ပြီး အချိန်ပိုကြေးတွေနဲ့ ကျွမ်းကျင်ကြေးတွေ gradeကြေးတွေအပြင် အခြားသောခံစားခွင့်တွေမရှိတော့ဘဲ တစ်နေ့ကျပ်၄၈၀၀နှုန်းသာ ရရှိတာကြောင့် လက်ရှိကုန်စျေးနှုန်းမြင့်တက်မှုတွေအရ စား၀တ်နေရေးလုံလောက်မှုမရှိဘဲ အခက်အခဲတွေဖြစ်နေရတာတွေကြောင့် အနည်းဆုံးအခကြေးငွေတိုးမြှင့်သတ်မှတ်ပေးဖို့ လိုလားနေကြတာဖြစ်ပါတယ်။
အနိမ့်ဆုံးလုပ်ခလစာတစ်နေ့လျှင် ကျပ်၄၈၀၀ နှုန်းကို ၂၀၁၈ကသတ်မှတ်ခဲ့တာဖြစ်ပြီး နှစ်နှစ်တစ်ကြိမ်ပြင်ဆင်သတ်မှတ်မယ်လို့ ဆိုထားပေမဲ့ အလုပ်သမားတွေဟာ ကိုဗစ်၁၉ရောဂါဖြစ်ပွားမှုအပြင် စစ်အာဏာသိမ်းခြင်းကြောင့် နိုင်ငံရေးမတည်ငြိမ်မှုတွေကြောင့် ယခုလက်ရှိအချိန်ထိ တစ်နေ့လုပ်ခကျပ်၄၈၀၀နှုန်းသာ ရရှိလုပ်ကိုင်နေရတာဖြစ်ပါတယ်။
#MyanmarLabourNews
#MinimumWage
Photo-၂၀၂၀ ခုနှစ်ကပြုလုပ်ခဲ့တဲ့ အနည်းဆုံးအခကြေးငွေဆိုင်ရာ ညှိနှိုင်းအစည်းအဝေး။
