ယခု ရက်ပိုင်းအတွင်းမှာပဲ စစ်ကောင်စီဖက် ကနေအလုပ်သမားတွေရဲ့တစ်နေ့အလုပ်ချိန် ၈ နာရီအတွက် အခြေခံလုပ်ခလစာ ၃၆၀၀ ကျပ်ပြန်လည်ထားရှိမယ် ဆိုတဲ့သတင်းတွေကျယ်ကျယ်ပြန့်ပြန့်ထွက်ပေါ်လာပါတယ်။
လက်ရှိအနေနဲ့ အနည်းဆုံးအခကြေးငွေက တစ်နေ့တာ အလုပ်ချိန် ၈ နာရီအတွက် ၄၈၀၀ ကျပ်သတ်မှတ်ထားတာဖြစ်ပြီး တစ်နာရီ ကို မြန်မာငွေ ကျပ် ၆၀၀ သာရရှိတဲ့ ဒီပမာဏကလည်း စက်ရုံ၊ အလုပ်ရုံက အခြေခံလုပ်သားတွေအနေနဲ့ လောက်ငှခြင်းမရှိဘူးလို့ သိရပါတယ်။
ဒီလိုသတင်းတွေထွက်ပေါ်လာတဲ့ ကိစ္စကို Myanmar Labour News အနေနဲ့အတည်ပြုနိုင်ခြင်းမရှိသေးသလို လက်ရှိ စက်ရုံအလုပ်ရုံတွေမှာလုပ်ကိုင်နေတဲ့အလုပ်သမားတွေက လဲဒီကိစ္စနဲ့ပတ်သက်ပြီးစက်ရုံတွေဖက်က အတိအလင်းကြေညာထားတာမျိုးမရှိသေးဘူးလို့ဆိုပါတယ်။
"စူပါတယောက်ကလာတော့ပြောတယ်သူတို့ကြားတယ်ပေါ့ ဒီလိုပြောင်းမယ်ဆိုတာဒါပေမယ့်စက်ရုံဖက်ကအတိအလင်းကြေငြာထားတာမျိုးတော့မရှိသေးဘူး ဖေ့ဘုတ်ဂရုတွေထဲမှာတော့ဒီကိစ္စကပြန့်နေပြီဘယ်လိုလာမယ်မသိသေးဘူးတကယ်ဆိုရင်တော့အတော်ဒုက္ခရောက်ပြီ"လို့ လှည်းကူးစက်မှု့ဇုန်ထဲကလုပ်သားတဦးကပြောပါတယ်။
၂၀၂၁ ခုနှစ်အစောပိုင်းကာလ အာဏာသိမ်းပြီးနောက်ပိုင်းမှာ စက်ရုံ၊ အလုပ်ရုံတွေမှာ လခစားတွေကနေ နေ့စားတွေအဖြစ် ပြောင်းလဲ ခိုင်းစေနေတာကိုလဲ အလုပ်သမားတွေရင်ဆိုင်နေရတယ်လို့ ဆိုပါတယ်။လက်ရှိလုပ်ခလစာမှာ အိုတီကြေးအပါအဝင် တစ်လကို တစ်သိန်းခြောက်သောင်းဝန်းကျင်လောက်နဲ့ရပ်တည်နေရတဲ့ စက်ရုံအလုပ်သမားတွေဟာဒီသတင်းအပေါ်စိုးရိမ်တကြီးရှိနေပါတယ်။
"နဂိုကတည်းကမှအိုတီကြေးတောင်မှန်မှန်မပေးတာ ဒီလိုသာပြောင်းလိုက်လို့ကတော့ဘာမှတောင်စားရမှာမဟုတ်ဖူး"လို့အထည်ချုပ်စက်ရုံလုပ်သားတဦးက ပြောဆိုပါတယ်၊
အလုပ်သမားရေးလေ့လာသူတချို့ကတော့ဒီကိစ္စဟာသွေးရိုးသားရိုးမဟုတ်ဘဲ စစ်ကောင်စီနဲ့အလုပ်ရှင်တွေဖက်ကနှပ်ကြောင်းပေးသတင်းလွှင့်လာတာမျိုးဖြစ်နိုင်တယ်လို့သုံးသပ်နေကြပါတယ်။
"ဒါကစစ်ကောင်စီဖက်ကနှပ်ကြောင်းပေးလာလို့သာအလုပ်ရှင်တွေဖက်ကဒီအသံတွေထွက်လာတာ သွေးတိုးစမ်းတဲ့သဘောစလာတာ အလုပ်သမားဖက်ကဘယ်လိုတုန့်ပြန်မလဲဆိုတဲ့သဘော ဒီဖက်ကငြိမ်နေရင်ဖြစ်ကိုဖြစ်သွားမှာလို့ပြောလို့ရတယ်"လို့သွေးစည်းညီညွတ်သောအလုပ်သမားသမဂ္ဂများအဖွဲ့ချုပ်( မြန်မာ )မှဒေါ်မျိုးအေးက MLN ကိုပြောပါတယ်။
ယခုရက်ပိုင်းအတွင်းစစ်ကောင်စီဖက်ကလုပ်တဲ့အစည်းအဝေးကိုအလုပ်ရှင်တွေတက်ရောက်ပြီးမှဒီသတင်းတွေထွက်ပေါ်လာတာလို့အလုပ်သမားတွေဖက်ကရော အလုပ်သမားရေးတက်ကြွလှုပ်ရှားသူတွေဖက်ကရော MLN ကိုပြောပါတယ်။
"အလုပ်သမားတွေအနေနဲ့ အဖွဲ့ချုပ်တွေကတိုက်ပွဲခေါ်ရင်ပါဝင်ကြဖို့တိုက်တွန်းတယ် ဒီကိစ္စကိုလုံးဝလက်မခံဖို့မှိန်းမယူကြဖို့ပြောချင်တယ်"လို့ဒေါ်မျိုးအေးကဆက်ပြောပါတယ်။
ပြီးခဲ့တဲ့ ဦးသိန်းစိန်အစိုးရလက်ထက်မှာပဲ လုပ်သားတစ်ဦးရဲ့ တစ်နေ့တာ အလုပ်ချိန် ၈နာရီအတွက် အခြေခံလုပ်ခလစာ ၃၆၀၀ မှ ၄၈၀၀ အထိရရှိဖို့လုပ်သားတွေနဲ့အလုပ်သမားသမဂ္ဂတွေတိုက်ပွဲဝင်ခဲ့တာပါ။
အနည်းဆုံးအခကြေးငွေဥပဒေကို ၂၀၁၃ ခုနှစ် မှာ ပြဌာန်းခဲ့ပြီး အခကြေးငွေနှုန်းထားကို ၂ နှစ်တစ်ကြိမ်ပြင်ဆင်သတ်မှတ်ရမယ်လို့ ဥပဒေမှာ ပြဌာန်းထားပါတယ်။ ပထမအကြိမ် အဖြစ် တစ်နေ့အလုပ်ချိန် ၈ နာရီအတွက် ကျပ် ၃၆၀၀ နဲ့ ဒုတိယအကြိမ်ကို ၂၀၁၈ ခုနှစ် မေလမှာ ၄၈၀၀ ကျပ်ထိ တိုးမြင့်ခဲ့တာပါ။တတိယအကြိမ်မြောက်ထပ်မံပြဌာန်းရမယ့် ၂၀၂၀ ပြည့်နှစ်မှာ ပြင်ဆင်သတ်မှတ်မှုလုပ်ဆောင်ရန် ပျက်ကွက်ခဲ့ပြီး လက်ရှိအချိန်ထိ ကျပ် ၄၈၀၀ နှုန်းနဲ့သာ တွက်ချက်ပေးချေနေတာဖြစ်ပါတယ်။
ယခုလို ပြည်တွင်းက အခြေခံလုပ်သားတွေဟာ အာဏာသိမ်းကာလမှာ ကုန်ဈေးနှုန်းကြီးမြင့်လာတာနဲ့ စားဝတ်နေရေး စရိတ်တွေ မြင့်တက်လာတာကြောင့် ရသင့် ရထိုက်တဲ့လုပ်ခလစာအခွင့်အရေးရရှိရေးအတွက်ရုန်းကန်နေရတဲ့အပြင် အာဏာသိမ်းစစ်အုပ်စုလက်အောက်မှာတနေ့တခြားအလုပ်သမားအခွင့်အရေးချိုးဖောက်ခံရတာတွေလည်း ကြုံတွေ့နေ့ရတာ ဖြစ်ပါတယ်။
