“ စက်ရုံဘက်က ကျွမ်းကျင်ကြေးတွေ တဝတ်နီးပါး လျှော့ချထားတယ်။ အဲဒါကြောင့် အလုပ်သမားတဦး စီရဲ့ ဝင်ငွေက ၃ပုံ ၁ပုံလောက် လျော့သွားတယ်။ ၄၈၀၀ ရတုန်းက တော်ပါသေးတယ်။ အခု ထောက်ပံ့ကြေး ဆိုတာ ကြီးရမှ လစာက တော်တော်နည်းရနေတာ ။ စားရတာလည်း မဝဘူး။ ထောက်ပံ့တာတွေလည်း မလုပ် နိုင်တော့ ဘူး။” လို့ Jiashihao(Myanmar) ရဲ့ အလုပ်သမားတဦးက ပြောပါတယ်။

 

အလုပ်သမား ၈၀၀ ဝန်းကျင် လုပ်ကိုင်နေတဲ့ ဝါးတရာစက်မှုဇုန်က Gy sen-1 (Myanmar) Apparel Co.,Ltd စက်ရုံမှာ ကျွမ်းကျင်ကြေး ၃၀,၀၀၀ ကျပ် ထိတိုးမြှင့်ရရှိခဲ့ပေမဲ့ လက်ရှိ ကျပ် ၂၅,၀၀၀ ကျပ်အထိ ဖြတ်ထောက်ပြီး ကျွမ်းကျင်ကြေး ကျပ် ၅၀၀၀ သာပေးနေတယ်လို့ သွေးစည်းညီညွတ်သောသမဂ္ဂများအဖွဲ့ချုပ် STUM ကို အလုပ်သမားတဦးက ပြောကြားပါတယ်။

အဲဒီ အလုပ်သမားဟာ Finishing Iron ရာထူးနဲ့ လုပ်ကိုင်နေတာ ၅ နှစ်နီးပါးရှိနေပြီး အလုပ်စတင်ဝင်ရောက်ခဲ့တဲ့ ၂၀၁၉ ခုနှစ်က ကျွမ်းကျင်ကြေး ၁၅၀၀၀ ရရှိခဲ့တယ်လို့ သိရပါတယ်။ လုပ်သက် ၂နှစ်အကြာမျာ ကျွမ်းကျင်ကြေး ကျပ် ၃၀၀၀၀ အထိရရှိခဲ့ပေမဲ့ နောက် ၅ လအကြာမှာ ကျွမ်းကျင်ကြေး တဝတ်ကို ဖြတ်ထောက်ခံရပြီး ကျပ် ၁၅၀၀၀ သာရရှိခဲ့တယ်လို့ သိရပါတယ်။

အခုနှစ် ဇန်နဝါရီ ၁ ရက်မှာ အကြောင်းအရင်းမသိရဘဲ ကျွမ်းကျင်ကြေး ကို နောက်ထပ် ကျပ် ၁၀၀၀၀ ထပ်မံဖြတ်တောက်တာကြောင့် ကျပ် ၅၀၀၀ သာ ရရှိနေတယ်လို့ အဲဒီအလုပ်သမား က ပြောပါတယ်။

 

“အလုပ်သမားဥပဒေမှာ အခကြေးငွေ ဖြတ်တောက်မယ်ဆိုရင် ဘာ့ကြောင့် ဖြတ်တောက်တယ်ဆိုတာကို တင်ပြ ထားရပါတယ်။ အလုပ်သမားတဦးအတွက် ရှိပြီး ခံစားခွင့်ကို အကြောင်းမဲ့ ဖြတ်တောက်ခွင့် မရှိပါဘူး။ အလရ ရဲ့ အခကြေးငွေ ပေးချေရေးဥပဒေအရ ပြန်လည် ပေးရမှာ ဖြစ်ပါတယ်။” လို့ STUM အဖွဲ့က ပြောဆိုထားပါတယ်။

 

အောက်တိုဘာလအတွင်း အလုပ်သမားဝန်ကြီးဌာနက ထောက်ပံကြေး ကျပ် ၁၀၀၀ ပေးဖို့ ကြေညာချက် ထွက်ပေါ်လာပြီးနောက် မူလရရှိနေတဲ့ ကျွမ်းကျင်ကြေးတွေ ပိုမို ဖြတ်ထောက်ခံခဲ့ရတယ်လို့ အလုပ်သမားတွေက ပြောပါတယ်။

 

“ ကျွမ်းကျင်ကြေး ဖြတ်တောက်တာတွေက ငါးထောင်၊ တသောင်းဖြတ်ကြသလို ။ တချို့လုပ်ငန်းရှင်တွေကတော့ လုံး၀ မပေးတော့တဲ့အထိ ရှိလာတယ်” လို့ အထည်ချုပ် အလုပ်သမားတဦးက ပြောပါတယ်။

 

နိုင်ငံအတွင်း စစ်တပ်က အာဏာသိမ်းပြီးနောက် ကုန်စျေးနှုန်းတွေ အဆမတန် မြင့်တက်နေတဲ့ အပြင် အလုပ်သမားတွေအတွက် သတ်မှတ်ထားတဲ့ ရပိုင်ခွင့် ငွေကြေးတွေကို လျော့ချခဲ့တာကြောင့် ပိုမို ကျပ်တည်း လာနေတယ်လို့ ကျွမ်းကြင်ကြေးဖြတ်တောက်ခံထားရတဲ့ အလုပ်သမားတွေက ပြောကြားထားပါတယ်။