အာဆီယံ The AHA Center နဲ့ သက်ဆိုင်ရာ နိုင်ငံတကာအဖွဲ့အစည်းတွေက မြန်မာနိုင်ငံအတွက် လူသားချင်းစာနာမှုဆိုင်ရာ အကူအညီတွေကို အကြမ်းဖက်အာဏာသိမ်းစစ်အုပ်စုရဲ့ လက်ထဲပေးအပ်မယ့် အပေါ် မန္တလေးအခြေစိုက် အရပ်ဘက်လူမှုအဖွဲ့အစည်း (၁၁၆) ဖွဲ့က အပြင်းအထန် ကန့်ကွက်ရှုတ်ချတယ်လို့ ဇွန်လ ၁ ရက်နေ့က ထုတ်ပြန် ကြေငြာခဲ့ပါတယ်။
စစ်အုပ်စုဟာ ပြည်သူ့ ဆန္ဒမဲဖြင့်ရွေးကောက်တင်မြှောက်ထားတဲ့ ပြည်သူ့အစိုးရခေါင်းဆောင်တွေကို မတရားဖမ်းဆီးခဲ့ပြီး နိုင်ငံတော်အာဏာကို မတရားသဖြင့် သိမ်းယူရန် ကြိုးပမ်းခဲ့သလို အာဏာဖီဆန်ပြီး ငြိမ်းချမ်းစွာဆန္ဒထုတ်ဖော်ခဲ့ကြတဲ့ ရဟန်းရှင်လူ၊ ကျောင်းသားပြည်သူတွေကို ကျည်ဆံအစစ်၊ စစ်မြေပြင်သုံး ချေမှုန်းရေးလက်နက်များသုံးပြီး အကြမ်းဖက် ဖြိုခွင်းတာ၊ ဖမ်းဆီးနှိပ်စက်တာ၊ စစ်မြေပြင်သဖွယ် ရက်စက်စွာပစ်ခတ်သတ်ဖြတ်ခြင်းတွေကို ကျူးလွန်ခဲ့တယ်လို့ အဆိုပါအဖွဲ့အစည်းတွေက ထောက်ပြထားပါတယ်။ ဒါ့အပြင် လက်ရှိအချိန်အထိ ပြည်သူပိုင်ပစ္စည်းတွေကို ဖျက်ဆီးတာ၊ မီးရှို့တာ၊ အဓမ္မယူငင်တာ၊ အမျိုးသမီး တွေအပေါ် လိင်ပိုင်းဆိုင်ရာအဓမ္မပြုကျင့်စော်ကားတာတွေအပြင် ညအချိန်မှာလည်း အကြမ်းဖက်ဝင်ရောက်ရှာဖွေ ဖမ်းဆီးတာတွေကို နေ့စဉ်ကျူးလွန်နေခဲ့တာလို့ ဆိုပါတယ်။ အဲ့ဒီအတွက် မြန်မာအာဏာသိမ်း စစ်အုပ်စုဟာ အကြမ်းဖက်အုပ်စုသာ ဖြစ်တယ်လို့ ထုတ်ပြန်ချက်မှာ ဖော်ပြပြောဆိုထားပါတယ်။
အဆိုပါ အကြမ်းဖက်စစ်အုပ်စုရဲ့ လက်ထဲသို့ လူသားချင်းစာနာမှုဆိုင်ရာ အကူအညီတွေ ကို ထိုးထည့် ပေးလိုက်တာဟာ မြန်မာလူထုအတွက် ပိုမိုဆိုးရွားတဲ့ ထိခိုက်နစ်နာမှုတွေကိုသာဖြစ်ပွားစေမှာဖြစ်ပြီး အကြမ်းဖက်စစ်အုပ်စုဟာ ၎င်း အကူအညီကို လွဲမှားစွာ အသုံးချမှာဖြစ်တာကြောင့် အမှန်တကယ် အကူအညီ လိုအပ်နေတဲ့ မြန်မာလူထုထံ လုံးဝ ရောက်ရှိမှာ မဟုတ်ဖူးလို့ ကြေငြာချက်မှာ ထောက်ပြပြောဆိုထားပါတယ်။
ပြီးခဲ့တဲ့ မေလ ၆ ရက်နေ့က ကမ္ဘောဒီးယားနိုင်ငံ၊ ဖနွမ်းပင်မြို့မှာ အာဆီယံ လူသားချင်းစာနာမှုဆိုင်ရာအကူအညီပေးရေး ညှိနှိုင်းအစည်းအဝေးတစ်ရပ်ကျင်းပခဲ့ပြီး အဆိုပါ အစည်းအဝေးကနေ မြန်မာနိုင်ငံအတွက် လူသားချင်း စာနာမှုဆိုင်ရာ အကူအညီတွေကို အာဏာသိမ်းအကြမ်းဖက်စစ်အုပ်စုလက်ထဲသို့သာ အကုန်ထည့်ဖို့ ဆုံးဖြတ်ခဲ့တာလည်းဖြစ်ပါတယ်။ဒီလို ဆုံးဖြတ်ရာမှာ မြန်မာလူထုကို အမှန်တကယ် ကိုယ်စားပြုနေတဲ့ အဖွဲ့အစည်းတွေရဲ့ သဘောထားကို ရယူခဲ့တာမရှိဘူးလို့လည်း အရပ်ဘက်အဖွဲ့အစည်းတွေက ဆိုပါတယ်။
အဲ့ဒီအထောက်အပံ့ဟာ အာဏာသိမ်းစစ်အုပ်စုရဲ့ အကြမ်းဖက်လုပ်ရပ်တွေကိုသာ အားပေးအားမြှောက် သဘောဖြစ်စေပြီး မြန်မာလူထုအပေါ် လုံးဝအကျိုးမရှိတဲ့အတွက် မန္တလေးအခြေစိုက် အရပ်ဖက်လူမှုအဖွဲ့အစည်း (၁၁၆) ဖွဲ့က ကန့်ကွက်ရှုတ်ချတာဖြစ်တယ်လို့ သိရပါတယ်။
