လုပ်ခမလုံလောက်တာကြောင့် ရက်မှန်ကြေး ၊ ဂရိတ်ကြေးနဲ့ နှစ်ကြေး တွေတိုးပေးဖို့ အထည်ချုပ်လုပ်သားတွေ တောင်းဆိုမှုပြုလုပ်နေတယ်လို့ သိရပါတယ်။
လက်ရှိမှာ စက်ရုံမန်နေဂျာမှ ရဲနှင့်စစ်သားများခေါ်လို့ ရောက်ရှိလာကြပြီလို့ သိရပါတယ်။
"အလုပ်သမားတွေကို နင်တို့ ဆန္ဒပြချင်ရင် အောက်ကိုဆင်းပြီးပြဆိုလို့ အလုပ်သမားတွေ စက်ရုံအောက်ကိုဆင်းနေပြီ"လို့ အလုပ်သမားကပြောပါတယ်။
ရန်ကုန်တိုင်းဒေကြီး၊ ရွှေပြည်သာမြို့နယ်၊ သာဓုကန်စက်မှုဇုန် (၄)၊ ကျောက်စိမ်းလမ်း၊ အမှတ်(၈၁-B) မှာဖွင့်လှစ်ထားတတဲ့ တရုတ်နိုင်ငံသားပိုင် Sunrise Myanmar Fashion Garment အထည်ချုပ်စက်ရုံမှာ ဒီကနေ့ နေ့လည် ၁၂ နာရီက စတင်ပြီး လုပ်ငန်းခွင်အတွင်း တောင်းဆိုမှုပြုလုပ်နေတာပါ။
လုပ်ငန်းခွင်ထဲမှာ အလုပ်သမား ၈၀၀ ကျော်ရှိပြီး BURTLE, ZEROSTAGE အမှတ်တံဆိပ်အထည်တွေချုပ်လုပ်နေတာလို့ သိရပါတယ်။
အလုပ်သမားတွေအနေနဲ့ အခုတောင်းဆိုတဲ့အချက်တွေကို လွန်ခဲ့တဲ့ ၃ လကတည်းက အလုပ်ရှင်ထံ တင်ပြတောင်းဆိုခဲ့ပြီးဖြစ်တယ်လို့ ဆိုပါတယ်။ တောင်းဆိုချက်တွေကို ဖြေရှင်းပေးမယ်လို့ ပြောခဲ့ပေမယ့် ယနေ့အချိန်ထိ တုန့်ပြန်မှုမရှိတာကြောင့် စုပေါင်းတောင်းဆိုနေတာလို့ အလုပ်သမားထံကသိရပါတယ်။
"အလုပ်ရှင်ဘက်က ညှိပေးမယ်ဆိုပြီး အချိန်ဆွဲလာခဲ့တာပါ။ စက်ရုံမန်နေဂျာကလည်း အချေမငံတွေ ပြောဆိုတာတွေရှိတယ်။ အခု သက်ဆိုင်ရာ တာဝန်ခံ ခေါင်းဆောင်များအပါ အလုပ်သမားများမှ လုပ်ငန်းခွင်အတွင်းမှ အလုပ်ရပ်နားပြီး တောင်းဆိုနေတာ"လို့ အလုပ်သမားကပြောပါတယ်။
အလုပ်ချိန်အနေဖြင့် မနက် ၈ နာရီမှ ည ၇ နာရီထိ ဆင်းရပြီး လူရွေးပြီး ည ၉ နာရီထိ ဆင်းရတာတွေရှိတယ်လို့ ပြောပါတယ်။
အလုပ်သမားများတောင်းဆိုချက်တွေကတော့
၁။ ရက်မှန်းကြေး ယခင် ၄၀,၀၀၀ ကျပ်အပေါ် - ၂၀,၀၀၀ ကျပ်ထပ်တိုး၍ ၆၀,၀၀၀ ကျပ်တိုးပေးရန်။
၂။ ဂရိတ်ကြေး A+၅၁,၀၀၀ ကျပ်အစား ၁၂၀,၀၀၀ ကျပ် တိုးပေးရန်နှင့် အဆင့်အလိုက် ၂၀,၀၀၀ ကျပ် စီးတိုးပေးသွားရန်။
၃။ နှစ်အလိုက် တစ်နှစ်လျှင် ၂,၀၀၀ ကျပ် + ၃,၀၀၀ ကျပ် ထပ်တိုး၍ တစ်နှစ်လျှင် ၅,၀၀၀ ကျပ်ဖြင့် လစဉ် ထည့်သွင်းတွက်ချက်ပေးဖို့ စတာတွေဖြစ်တယ်လို့ သိရပါတယ်။
လက်ရှိမှာ အနည်းဆုံးအခကြေးငွေကို ၄၈၀၀ ကျပ် တရားဝင်သတ်မှတ်ထားပြီး အပိုထောက်ပံ့ကြေး ၁၀၀၀ ကျပ်စီ ၃ကြိမ် တိုးပေးပြီးနောက်မှာတော့ လုပ်ခက စားဝတ်နေရေးမလုံလောက်လို့ အလုပ်သမားတွေအနေနဲ့ အခုလို ရက်မှန်ကြေး နှစ်ကြေးတွေကို အလေးထားတောင်းဆိုလာကြတာလည်းဖြစ်ပါတယ်။
