မြန်မာကျွိချွမ်း (MYANMAR JU CHUAN ) ဖိနပ်စက်ရုံလုပ်သားတွေက ရက်တွက်ဒေးကြေး ကျပ် ၁၃၀၀၀ တိုးပေးဖို့ကို ဒီကနေ့ ဇွန်လ ၉ ရက်မှာ စတင်တောင်းဆိုနေတယ်လို့ သွေးစည်းညီညွတ်သော သမဂ္ဂများအဖွဲ့ချုပ် STUM ဆီက သိရပါတယ်။
စက်ရုံလုပ်သားတွေ အားလုံးနီးပါးက တောင်းဆိုမှုမှာပါဝင်နေပြီး ကုန်စျေးနှုန်းနဲ့ လူနေမှုစရိတ် အဆမတန် မြင့်မားလာပြီး စားဝတ်နေရေး ပြေလည်နိုင်စေဖို့ကို အခုလို တောင်းဆိုရတာဖြစ်တယ်လို့ အလုပ်သမားတွေက ပြောပါတယ်။
အလုပ်သမားများတောင်းဆိုချက်ထဲမှာ လုပ်ခလစာ၊ အချိန်ပိုကြေး ၊ ရက်မှန်ကြေးအပြင် စက်ရုံအတွင်း ကျန်းမာရေးစောင့်ရှောက်ပေးမှု အခြေအနေ၊ ဖယ်ရီကားသမားတွေက အလုပ်သမားတွေကို ရိုင်းပျစွာဆင်ဆံမှုတွေ၊ သောက်သုံးရေရရှိမှု၊ ခွဲခြားဆက်ဆံခံနေရမှုတွေ အပါအဝင် အချက် ၁၇ ချက်ကို တောင်းဆိုထားပါတယ်။
လက်ရှိ အလုပ်သမားတွေ ရရှိတဲ့ လုပ်ခလစာက ဖူလုံမှုမရှိလို့ လုပ်ခတိုးမြှင့်ပေးဖို့ တောင်းဆိုမှု တွေ များပြားလာပါတယ်။ တောင်းဆိုမှုပြုလုပ်တဲ့ အလုပ်သမားတွေကို စက်ရုံအများစုက အခြေခံလုပ်ခလစာနှုန်းထားကို မတိုးပေးဘဲ့ နေ့စားခ (ဒေးကြေး) လို ခိုင်မာမှု မရှိတဲ့ ထောက်ပံ့ကြေး ခေါင်းစဉ်အနေနဲ့ပဲ တိုးပေးနေတယ်လို့ STUM က ဆိုထားပါတယ်။
ဒါ့အပြင် စက်ရုံအချို့က အလုပ်ရှင်၊ အလုပ်သမား ညှိနှိုင်းရာမှာ ဝန်ကြီးဌာနက တာဝန်ရှိသူတွေ ပါဝင်တဲ့ ညှိနှိုင်းရေးအဖွဲ့တွေနဲ့သာ ဆွေးနွေးနေကြပြီး အလုပ်သမားသမဂ္ဂအဖွဲ့ချုပ် ကိုယ်စားလှယ်တွေကို ဝင်ရောက် ညှိနှိုင်းခွင့်မပြုတာတွေရှိနေတယ်လို့ STUM အဖွဲ့ ဆီက သိရပါတယ်။
မြန်မာကျွိချွမ်းဖိနပ်စက်ရုံ (MYANMAR JU CHUAN)က ရန်ကုန်မြို့၊ လှိုင်သာယာမြို့နယ်၊ ရွှေသံလွှင်စက်မှုဇုန်၊ မင်းဧရာလမ်းမှာ ဖွင့်လှစ်ထားပါတယ်။
