ရန်ကုန်မြို့က စက်ရုံလုပ်ငန်းရှင်အချို့ဟာ မေဒေးအလွန်ကစလို့ လုပ်သားလိုအပ်ချက်အရ အလုပ်သမားခေါ်ယူရာမှာ တစ်နေ့လုပ်အားခနှုန်းထားတွေတိုးမြှင့်ပေးပြီး အလုပ်သမားခေါ်ယူတာတွေရှိနေတယ်လို့ အလုပ်သမားတွေဆီက သိရပါတယ်။
"စက်ရုံအချို့ကတော့ ဒေးကြေး ၇၀၀၀ နဲ့ခေါ်နေတာတွေ ၆၅၀၀ နဲ့ခေါ်နေတာတွေတွေ့ရတယ်။ တခြားစက်ရုံတွေမှာ အခြားထောက်ပံ့ကြေး ၂၀၀၀၀ အပြင် မုန့်ဖိုး ၁၀၀၀၀ရယ် ရက်မှန်ကြေး ၂၀၀၀၀ကနေ ၃၀၀၀၀ဆိုပြီး တခြားတိုင်တွေမှာတိုးပေးထားတာတွေ့ရတယ်"လို့ အလုပ်သမားသမဂ္ဂအဖွဲ့ဝင်တစ်ဦးက ဆိုပါတယ်။
အဲ့ဒီလိုတိုးမြှင့်လာတာတွေဟာ မေ၁ ရက်နေ့ မေဒေးအလွန် အထည်ချုပ် စက်ရုံအချို့ကစတင်ပြုလုပ်လာကြတာဖြစ်ပြီး စက်ရုံအများစုကတော့ဒေးကြေးမတိုးဘဲ ထောက်ပံ့ကြေးထပ်တိုးခေါ်ယူမယ့ယ်လို့ ပြောဆိုလာကြတယ်လို့ သိရပါတယ်။
မြန်မာနိုင်ငံရဲ့၂၀၁၈ခုနစ် ဒေါ်လာပေါက်စျေးဟာ ၁၂၀၀နဲ့ ၁၃၀၀ စျေးတန်းရှိခဲ့ပြီး အဲ့ဒီအချိန်က သတ်မှတ်ခဲ့တဲ့ အနိမ့်ဆုံးလုပ်ခလစာဟာတရက်လုပ်ခ ၄,၈၀၀ ကျပ်ကို လက်ရှိ၂၀၂၄ခုနစ် ဒေါ်လာပေါက်စျေး ၄၀၀၀ ဝန်းကျင်ထိမြင့်တက်နေချိန်အထိ ၆ နှစ်နီးပါးကြာတိုင်တိုင် ၄၈၀၀ နဲ့သာ အလုပ်ရှင်များကပေးချေလာခဲ့ကြတာဖြစ်ပါတယ်။
လက်ရှိမြန်မာနိုင်ငံရဲ့ ကုန်စျေးနှူန်းတွေနဲ့ဒေါ်လာစျေးအရ အလုပ်သမားတစ်ယောက်ရဲ့တစ်နေ့လုပ်ခလစာဟာ ကျပ်တစ်သောင်းရသင့်တယ်လို့ပြောဆိုနေကြသလို အနည်းဆုံးအခကြေးငွေ နှုန်းထားကို တိုးမြှင့်ပြင်ဆင်သတ်မှတ်ပေးဖို့ အစဥ်တစိုက် တောင်းဆိုမှုတွေ ပြုလုပ်နေကြတာဖြစ်ပါတယ်။
သွေးစည်းညီညွတ်သောသမဂ္ဂများအဖွဲ့ချုပ် (STUM) ကလည်း မေ၁ရက်နေ့ကကျရောက်တဲ့ ၁၃၄ကြိမ်မြောက် မေဒေးနေ့မှာတရက်လုပ်ခ ကျပ် ၁၀,၀၀၀ တိုးမြှင့်ရရှိရေးကို မေဒေးနေ့ကြေညာချက်မှာ ထည့်သွင်းတောင်းဆိုထားတာလည်းတွေ့ရပါတယ်။
