မလေးရှားနိုင်ငံမှာ မြန်မာအပါအဝင် တရားမဝင် နိုင်ငံခြားသားလုပ်သားတွေကို စီမံချက်နဲ့ ဖမ်းဆီးမှု ကလာမယ့် ၂၀၂၆ခုနှစ်မှာ ပိုမို ဖမ်းဆီးနိုင်တယ်လို့ Independent Chin Communities (ICC)က ဇူလိုင် ၅ရက်မှာ သတိပေးထုတ်ပြန်ထားပါတယ်။
၂၀၂၅ခုနှစ်က မလေးရှားအစိုးရဟာ အလှည့်ကျအာဆီယံဥက္ကဋ္ဌ အဖြစ် တာဝန်ထမ်းဆောင်တဲ့ နှစ် ဖြစ်သလို ၂၀၂၆ခုနှစ်ကလည်း မလေးရှား ခရီးသွားနှစ် ဖြစ်တဲ့ အတွက် အဖမ်းဆီးများမယ့်နှစ်လို့ မလေးရှားအစိုးရက သတ်မှတ်ထားတာလို့ ICCရဲ့ ထုတ်ပြန်ချက်မှာ ဖေါ်ပြထားပါတယ်။
လက်ရှိမှာ မလေးရှားရောက် မြန်မာဒုက္ခသည်များ အထူးသဖြင့် ချင်းလူမျိုးများနေထိုင်ရာ အိမ်ရာ၊ တိုက်ခန်း၊ ရပ်ကွက်တွေမှာ အနေအထိုင် မဆင်ခြင်မှုတာ ၊စည်းကမ်းမဲ့ သွားလာတာ၊ သောက်စားတာတွေကြောင့် မလေးရှားနိုင်ငံသားတွေက တိုင်ကြားတာတွေရှိနေတယ်လို့ ICCရဲ့ ကြေညာချက်မှာ ဖေါ်ပြထားပါတယ်။
တိုင်ကြားချက်ထဲမှာ အရက်မူးယစ်ပြီး အော်ဟစ်တာ၊ စကားများခိုက်ရန်ဖြစ်ပွားတာ၊၊ ညအချိန်မတော် လမ်းဘေးထိုင် အရက်သေစာသောက်စားတာ၊ လမ်းဘေးအိပ်တာ၊ ညအချိန်မတော် လမ်းဘေးနဲ့ လူနေအိမ် အောက်မှာ မူးယစ် အော်ဟစ်တာ၊ ၊ ဘောလုံးပွဲအချိန်လွန်ကြည့်တာ၊ ဘုရားကျောင်းတက်ဆင်းချိန်မှာ ရိုးးရာဝတ်စုံတွေနဲ့ အဖွဲ့လိုက်ဝိုင်းဖွဲ့စကားပြောတာ ၊ စောင့်ဆိုင်းတာ၊ အများနေထိုင်ရာ တိုက်ခန်း၊ ကွန်ဒိုတွေ၊ ပန်းခြံတွေမှာ ဖျော်ဖြေရေး၊ ပါတီနဲ့အစားအသောက်ပွဲကျင်းပတာတို့ကြောင့် တိုင်ကြားခံရမှုများတယ်လို့ ဆိုပါတယ်။
အခုလို နေထိုင်ပြုမူတွေကြောင့် ဖမ်းဆီးမှု ကြုံတွေ့ပါက Independent Chin Communities (ICC) တွေဖြစ်တဲ့ ACR, CRC, DCM, FRO နဲ့ ZAM တို့အနေဖြင့် တာဝန်ယူဖြေရှင်းပေးမှာမဟုတ်ကြောင်း ကိုလည်း သတိပေးချက်မှာ ရေးသားထားပါတယ်။
အဖမ်းအဆီးများကြုံလာခဲ့သော် ပြန်လွတ်နိုင်ဖို့ နည်းလမ်းမရှိဘဲ ဒဏ်ကြေးဆောင်ပြီး မြန်မာပြည်သို့ ပြန်ပို့ဖို့ အစိုးရရဲ့ ဆုံးဖြတ်ချက် ဖြစ်တဲ့ အတွက် မြန်မာဒုက္ခသည်များအနေနဲ့ သတိထားပြီး စည်းကမ်းရှိရှိ သွားလာနေထိုင်ဖို့ ICC ကသတိပေးထားပါတယ်။
မလေးရှား နိုင်ငံ အတွင်း တရားမဝင် နိုင်ငံခြားသား ရွှေ့ပြောင်း လုပ်သားတွေကိုနေ့စဉ် စီမံချက်နဲ့ ဖမ်းဆီးမှု တွေ ပြုလုပ် နေပြီး ဇူလိုင်လ ၈ရက်က
ပတ်ဝန်းကျင်ရဲ့ တိုင်ကြားလို့ ကွာလာလမ်ပူမြို့ ပူဒူး Jalan Loke Yew မှာ မြန်မာနိုင်ငံသား၁၈ဦးအပါအဝင် နိုင်ငံခြားသား ၆၀ ဖမ်းဆီးခံခဲ့ရတယ်လို့ မလေးရှားသတင်းဌာနတွေမှာ ဖေါ်ပြထားပါတယ်။
